1 ମନ୍‌ନେ ଚିନ୍ତା ରେମୁଆଁନେ ଉର୍ଦେ ଲେଃଏ; ମାତର୍‌ ନ୍ଲିୟାନେ ଉତର୍‌ ମାପ୍‌ରୁନେବାନ୍‌ ଡିଂଏ । 2 ରେମୁଆଁନେ ସର୍‌ତେ ଗାଲି ନିଜର୍‌ ମ୍‌ମୁଆଃଅରିଆ ନିମାଣ୍ଡାଃ ତ୍ନାଏ; ମାତର୍‌ ମାପ୍‌ରୁ ଆତ୍ମାଇଂକେ ଅଜନ୍‌ ଆଃଡିଂମ୍ୟାଃକେ । 3 ମାପ୍‌ରୁକେ ନାନେ କାମ୍‌ ଅପେଃ ବିଃ, ତେଲା ନାନେ ଚିନ୍ତା ପୁରନ୍‌ ଡିଂଏ । 4 ମାପ୍‌ରୁ ସର୍‌ତେ ସାମୁଆଁକେ ଆତ୍‌ନେ ନିଜର୍‌ ଇକ୍‌ଚା ପୁରନ୍‌ ନ୍‌ସାଃ ଡିଂବକେ; ଦୁସ୍‌ଟକେ ଡିଗ୍‌ ଦଦ୍ୟା ଦିନ୍‌ ନ୍‌ସାଃ ବକେ । 5 ମନ୍‌ଅରିଆ ଗର୍ବ ଡିଙ୍ଗ୍‌ନେ ସର୍‌ତେ ରେମୁଆଁ ମାପ୍‌ରୁ ଡାଗ୍ରା ଗ୍ରୁନା ବାଆର୍‌ଏ, ନ୍ତି ସାଃତିଲା ଡିଗ୍‌ ମେଁ ଡଣ୍ଡ୍‌ ବାଏ । 6 ଦୟା ଆରି ସତ୍‌ଅରିଆ ପାପ୍‌ନେ କେମା ଡିଂଏ, ବାରି, ମାପ୍‌ରୁନେ ସାମୁଆଁ ବୁଟମେଗ୍‌ ବାନ୍‌ ରେମୁଆଁଇଂ ଦଦ୍ୟା କାମ୍‌ ଆନ୍ତାର୍‌ମ୍ୟାଃଆର୍‌କେ । 7 ରେମୁଆଁନେ ଗାଲି ମାପ୍‌ରୁନେ ଇକ୍‌ଚା ଡିଂଲା, ମେଁ ମେଁନେ ସତ୍ରୁଇଂକେ ଡିଗ୍‌ ମେଁ ଏଃତେ ସାନ୍ତିରେ ଆଃବାସାମ୍ୟାଃକେ । 8 ଅନ୍ୟାୟ୍‌ ଏଃତେ ଜାବର୍‌ ଲାବ୍‌ବାନ୍‌ ଦରମ୍‌ ସାମୁଆଁ ଏଃତେ ଗଣ୍ଡାଃ ବାନେ ନିମାଣ୍ଡାଃ । 9 ରେମୁଆଁନେ ମନ୍‌ ନିଜର୍‌ ଗାଲି ସାମୁଆଁ ଚିନ୍ତା ଡିଂଏ; ମାତର୍‌ ମାପ୍‌ରୁ ମେଁନେ ଗାଲି ଆଃରେମ୍ୟାଃକେ । 10 ଇଃସାଙ୍ଗ୍‌ନେ ତୁମୁଆଃଅରିଆ ଗିଆନ୍‌ନେ ସାମୁଆଁ ଲେଃମ୍ୟାଃକେ, ମେଁନେ ତୁମୁଆଃ ବିଚାର୍‌ଅରିଆ ସତ୍‌କେ ଅମାନି ଆଡିଂ ଣ୍ଡୁ । 11 ସତ୍‌ ଏଜାନେ ଡୁଡୁ ଆରି କିଜି ମାପ୍‌ରୁନେ ଆରି ମୁନା‍ଅରିଆ ଲାଏଃକ୍ନେ କିଜିଗୁଣ୍ଡୁ ସାପା ମେଁନେ କାମ୍‌ । 12 କରାପ୍‌ କାମ୍‌କେ ଇଃସାଙ୍ଗ୍‌ଇଂ ଗ୍ରୁନା ଡିଂମ୍ୟାଃଆର୍‌କେ; ମେଃଡାଗ୍‌ଲା ଦରମ୍‌ ରେମୁଆଁ ବାନ୍‌ ସିଂଆଁସନ ଡାଟ୍‌ ଡିଂଚେଃ ଲେଃଏ । 13 ଦରମ୍‌ନେ ସାମୁଆଁ ଅଁନ୍‌ସା ଇଃସାଙ୍ଗ୍‌ଇଂନେ ଇକ୍‌ଚା, ବାରି, ସତ୍‌ ବାସଙ୍ଗ୍‌ନେ ରେମୁଆଁକେ ମେଇଂ ଆଲାଦ୍‌ ଡିଂମ୍ୟାଃକେ । 14 ଇଃସାଙ୍ଗ୍‌ନେ ରିସା ମଡ଼ା କବର୍‌ ବିଃନେ ଦୁତ୍‌ ରକମ୍‌; ମାତର୍‌ ଜ୍ଞାନି ରେମୁଆଁ ଆତେନ୍‌ ସାନ୍ତି ଆଃଡିଂଏ । 15 ଇଃସାଙ୍ଗ୍‌ନେ ସାର୍ମୁଆଃନେ ସାର୍ଦା‍ଅରିଆ ଜିବନ୍‌ ଲେଃଏ, ବାରି ମେଁନେ ଅନୁଗ୍ରହ ସାରାସାରି ଗୁର୍‌କ୍ନେ ଣ୍ଡିଆଃନେ ତ୍ରିଗ୍‌ଡ୍ୟାଃ ରକମ୍‌ । 16 ସୁନା ବାଦୁଲ୍‌ ଗିଆନ୍‌ ଲାବ୍‌ ଡିଂନେ ନିମାଣ୍ଡାଃ, ବାରି, ରୁପା ବାଦୁଲ୍‌ ନିମାଣ୍ଡାଃ ବାବ୍‌ନା ଲାବ୍‌ ଡିଂନେ ନିମାଣ୍ଡାଃ । 17 ଦଦ୍ୟା ଆନ୍ତାର୍‌ନେ ଦରମ୍‌ ରେମୁଆଁଇଂନେ ଅସାର୍‌ ଗାଲି, ମୁଃଡ଼ି ରେମୁଆଁ ନିଜର୍‌ ଗାଲି ଉର୍‌ଚେଃ ଅଲେଙ୍ଗ୍‌ଏ, ମେଁ ନିଜର୍‌ ପାରାନ୍‌ ରକ୍ୟା ଡିଂଏ । 18 ଆଂକାର୍‌ ବିନାସ୍‌ନେ ସେଃମଁ ଲେଃଏ, ବାରି, ଗରବ୍‌ ମନ୍‌ ବିନାସ୍‌ନେ ସେଃମଁ ଲେଃଏ । 19 ଆଂକାର୍‌ ଡିଂଣ୍ଡ୍ରେଇଂନେ ଏଃତେ ଡଙ୍ଗାକ୍ନେ ଜିନିସ୍‌ ବାଟାନେ ବାଦୁଲ୍‌ ଦରମ୍‌ ଆତ୍ମା ଏଃତେ ଦରମ୍‌ ଡିଂନେ ନିମାଣ୍ଡାଃ । 20 ମୁଃଡ଼ି ରେମୁଆଁ ପର୍‌ମେସର୍‌ନେ ସାମୁଆଁଅରିଆ ଦିଆନ୍‌ ବିଃଏ, ମେଁ ମଙ୍ଗଲ୍‌ ବାଏ, ବାରି ମାପ୍‌ରୁନେ ଡାଗ୍ରା ଜା ଆସା ବ‍ଏ, ମେଁ ନିମାଣ୍ଡାଃ । 21 ମନ୍‌ଅରିଆ ଜ୍ଞାନି ରେମୁଆଁ ବୁଦିମାନ୍‌ ଡାଗ୍‌ଚେଃ ଚିନାଜାନା ଡିଂଏ, ବାରି, ଲୁଆର୍‌ତାନେ ମ୍ବ୍ରେ ସାମୁଆଁବାନ୍‌ ଗିଆନ୍‌ ଜାବର୍‌ ଡିଂଏ । 22 ସତ୍‌ ବୁଦି, ଆତେନ୍‌ ବାଲେଃକ୍ନେ ରେମୁଆଁ ଆତ୍‌ଲା ଡିଂଡିଂକେ ଜିବନ୍‌ନେ ଜର୍‌ନାଡ଼୍ୟାଃ ରକମ୍‌; ମାତର୍‌ ଅଗ୍ୟାନ୍‌ ରେମୁଆଁଇଂ ମେଇଂନେ ଅଗ୍ୟାନ୍‌ ରେମୁଆଁ ବୁଦି ନ୍‌ସାଃ ଡଣ୍ଡ୍‌ ବାମ୍ୟାଃଆର୍‌କେ । 23 ଜ୍ଞାନିନେ ମନ୍‌ ନିଜର୍‌ ତୁମୁଆଃକେ ସିକ୍ୟା ବିଃଏ, ବାରି, ମେଁନେ ତୁମୁଆଃନେ ସାମୁଆଁ ଗିଆନ୍‌ ଆଃମ୍ନାଃଏ । 24 ମନ୍‌କେ ୱେକ୍ନେ ସାମୁଆଁ ଞ୍ଜୁଙ୍ଗ୍‌ ଟାଟା ରକମ୍‌, ଆତେନ୍‌ ମନ୍‌କେ ମ୍ବ୍ରେ ଆଃଡିଙ୍ଗ୍‌ଏ ଆରି ଗାଗ୍‌ଡ଼େନେ ଞ୍ଚ୍ୟାକେ ନିମାଣ୍ଡାଃ ଆଃଡିଂଏ । 25 ରେମୁଆଁନେ ମ୍‌ମୁଆଃଅରିଆ ମୁଃଡ଼ି ମୁଃଡ଼ିନେ ଗାଲି ସିଦା ତ୍ନାଏ, ମାତର୍‌ ତେନ୍‌ ଇଡ଼ିଂ ଗୁଗୁଏଃନେ ଗାଲି ଲେଃଏ । 26 ସ୍ଲେରେନେ କିଡ଼େସଃ ମେଁ ଆତ୍‌ଲା କାମ୍‌ ଡିଂଏ, ମେଃଡାଗ୍‌ଲା ମେଁନେ ତୁମୁଆଃ ତେନ୍‌ ନ୍‌ସାଃ ଆମେକେ ବାଦ୍ୟ ଆଃଡିଂଏ । 27 ପାପ୍‌ନିଆ ଲାଏଃକ୍ନେ ରେମୁଆଁ ଦଦ୍ୟା ଚିନ୍ତା ଡିଂଏ, ବାରି, ମେଁନେ ତୁମୁଆଃଅରିଆ ଡୁଆ ଲାଏଃକ୍ନେ ସୁଆ ରକମ୍‌ ଲେଃଏ । 28 କୁଟ୍‌ ଡିଂଣ୍ଡ୍ରେ ୱିଙ୍ଗ୍‌ଆଃ ଆଃତାର୍‌ଏ, ବାରି ନିନ୍ଦା ଡିଂଣ୍ଡ୍ରେ ଗୁଲୁଏ ସାଙ୍ଗ‍ଇଂକେ ବିନେ ବିନେ ଆଃଡିଂଏ । 29 ମୁଇଂ ବାଗୁଏଃରେ ନିଜର୍‌ ଡାଗ୍ରା ଡାଗ୍ରା ଡୁଆଣ୍ଡ୍ରେକେ ଆଃଆବଃଏ, ବାରି, ଆମେକେ ଦଦ୍ୟା ଗାଲିପାକା ୱାଡୁଙ୍ଗ୍‌ୱେଏ । 30 ମୁଃଡ଼ି ରେମୁଆଁ ନିଜର୍‌ ମ୍‌ମୁଆଃ ଲେଃମୁଆଃଏ, ମେଁ କୁଟ୍‌ ସାମୁଆଁ ଚିନ୍ତା ଡିଂନ୍‌ସାଃ ଆତେନ୍‌ ଡିଂଏ; ଜା ନିଜର୍‌ ତୁମୁଆଃକେ ତାଙ୍ଗ୍‌ଡାଃଏ, ମେଁ ଦଦ୍ୟା କାମ୍‌ ପୁରା ଆଃଡିଂଏ । 31 ବ୍ଲେକ୍ନେ ଉଗ୍‌ବଃ ସବାକ୍ନେ ମୁକୁଟ୍‌, ଆତେନ୍‌ ଦରମ୍‌ ଗାଲିଅରିଆ ବାଡିଂଏ । 32 ଜା ଲେଃଗା ରିସା ଡିଂଏ, ମେଁ ବୀର ବାନ୍‌ ମ୍ନାଃ; ବାରି, ଜା ନିଜର୍‌ ଆତ୍ମା ଆଡ଼ାତ୍ରା ସାସନ୍‌ ଡିଂଏ, ମେଁ ଇନି ଜିତେଣ୍ଡ୍ରେ ବାନ୍‌ ନିମାଣ୍ଡାଃ । 33 ରେମୁଆଁଇଂ ନିସ୍‌ପତି ରାଙ୍ଗ୍‌ଡ ନ୍‌ସାଃ ଚିଟି ତ୍ଲାଗ୍‌ମ୍ୟାଃଆର୍‌କେ, ମାତର୍‌ ଆତ୍‌ନେ ଇକ୍‌ଚା ମାପ୍‌ରୁବାନ୍‌ ଡିଂଏ ।