1 ଉଃଡ଼ିବେଲା ନା ସାସନ୍‌କର୍ତା ଏଃତେ ଚୁଚଙ୍ଗ୍‌ନେ ନାକ‍ଏ, ଅଃତେନ୍‌ବେଲା ନା ସେଃମଁ ଜା ଲାଏଃକେ, ଆତେନ୍‌ ଦିଆନ୍‌ ବିଃଚେଃ ଚିନ୍ତା ଡିଂ । 2 ଅଃନା ନା କାଉରା ନାଡିଂଏ, ତେଲା ନାନେ ଲୁଗଃନ୍ନିଆ ସୁରିସଗ୍‌ ନିଜେ ବଃ । 3 ମେଁନେ ମ୍ବ୍ରେ କାଦିକେ ଲବ୍‌ ଆଡିଂଗେ; ମେଃଡାଗ୍‌ଲା ଆତେନ୍‌ ଆସା ବିଃନେ କାଦି । 4 ସାକାର୍‌ ଡିଂ ନ୍‌ସାଃ କସ୍‌ଟ କାମ୍‌ ଆଡିଂଗେ; ନା ନାନେ ନିଜେ ବୁଦିରେ ଚାଲାକି ଆଡିଙ୍ଗ୍‌ଗେ । 5 ଆଣ୍ଡିନେ ଣ୍ଡୁ, ଆତେନ୍‌ କେନ୍‌ସାଃ ନାନେ ମୁଆଃକେ କେନ୍‌ସାଃ ନାବାସଙ୍ଗ୍‌ଏ କି ଉଃଡ଼ିବେଲା ନା ମେଁ ଆଡ଼ାତ୍ରା ନାକେଏ ଆତେନ୍‌ ବୁଃଡ଼ିୱେଏ । ମେଃଡାଗ୍ଲା ଆତେନ୍‌ ୱାଲେଃନେ ଚାଃଟିଃଆଁ ପିଗ୍‌ ରକମ୍‌, ମେଁନେ ବ୍ଲେଃ ମେଲେଚେ କିତଂ ଆଡ଼ାତ୍ରା ୱାଲେଃ ୱେଏ । 6 ଦଦ୍ୟା କିକେନେ ରେମୁଆଁନେ କାଦି ଆଚଙ୍ଗ୍‌ଗେ, ବାରି, ମେଁନେ ମ୍ବ୍ରେ କାଦିକେ ଲବ୍‌ ଆଡିଂଗେ; 7 ମେଃଡାଗ୍‌ଲା ମେଁ ଡିରକମ୍‌ ମନ୍‌ରେ ନିଜେ ବାବେଏ, ମେଁ ଦେତ୍‌ରକମ୍‌; ମେଁ ଚଙ୍ଗ୍‌ ଉଗ୍‌ ଡାଗ୍‌ଚେଃ ଆନାକେ ବାସଙ୍ଗ୍‌ଏ ସତ୍‌, ମାତର୍‌ ନା‍ଅରିଆ ମେଁନେ ରୁଦୟ୍‌ ଣ୍ଡୁ । 8 ନା ମେଃନେ ଇଃକୁଡ଼ାଃ ଚଙ୍ଗ୍‌ନାଲାଏଃକେ, ଆତେନ୍‌ ନାଲୁଆର୍‌ଏ; ବାରି, ନାନେ ମ୍ବ୍ରେ ସାମୁଆଁ ନାରାଃବଃଏ । 9 ମୁର୍କନେ ନ୍‌ଲୁଗ୍‌ଅରିଆ ସାମୁଆଁ ଆବାସଙ୍ଗ୍‌ଗେ, ମେଃଡାଗ୍‌ଲା ମେଁ ନାନେ ସାମୁଆଁନେ ବୁଦି ଗ୍ରୁନା ଡିଂଏ । 10 ବାୱିର୍‌ ସାନ୍ଦି ଆରାଃଗୁଚେଗେ, ବାରି, ଆବା ଆଲେଃକ୍ନେ ରେମୁଆଁଇଂନେ ଲିଜ‍ଅରିଆ ଆଗାଗେ । 11 ମେଃଡାଗ୍‌ଲା ମେଇଂନେ ରକ୍ୟା ଡିଂଣ୍ଡ୍ରେ ବପୁ ରେମୁଆଁ; ମେଁ ନା ଏଃତେ ମେଇଂନେ ୱିଙ୍ଗ୍‌ଆଃନିଆ ବିରଦ୍‌ ଡିଂଆର୍‌ଏ । 12 ନିମାଣ୍ଡାଃ ସିକ୍ୟା‍ଅରିଆ ନାନେ ମନ୍‌ ଆରି ଗିଆନ୍‌ନେ ସାମୁଆଁଅରିଆ ନାନେ ନ୍ଲୁଗ୍‌ ବିଃ । 13 ଗଡ଼େଅକେ ସାସ୍ତି ବିଃନ୍‌ସାଃ ବୁଲ୍‌ ଆଡିଂଗେ; ନା ଆମେକେ ଡୁଡୁ ଏଃତେ ନାବଗ୍‌ଲା ଡିଗ୍‌ ମେଁ ଆଗୁଏଃ ଣ୍ଡୁ । 14 ନା ଆମେକେ ଡୁଡୁ ଏଃତେ ନାବଗ୍‌ଏ ଆରି ପାତାଲ୍‌ବାନ୍‌ ମେଁନେ ପାରାନ୍‌ ରକ୍ୟା ନାଡିଂଏ । 15 ଅ ନିଂନେ ଉଙ୍ଗ୍‌, ନାନେ ମନ୍‌ ଜ୍ଞାନି ଡିଂଲା, ନିଂନେ ମନ୍‌ ଆଃ ସାର୍ଦା ଡିଂଏ । 16 ଅଃଅଁ ନାନେ ତୁମୁଆଃ ସତ୍‌ ସାମୁଆଁ ବାସଙ୍ଗ୍‌ଲା, ନିଂନେ ମନ୍‌ ପାରାନ୍‌ ସାର୍ଦା ଡିଂଏ । 17 ନାନେ ମନ୍‌ ପାପି‍ଇଂକେ ଇର୍ସା ଆଡିଂଲେଃ, ବାରି, ନା କାଲାଆଃ ମାପ୍‌ରୁନେ ଆଡ଼ାତ୍ରା ବୁଟଚେଃ ଲାଃଲା । 18 ମେଃଡାଗ୍‌ଲା ଇନାମ୍‌ ଡିଲାଡିଗ୍‌ ଲାଏଃକେ ଆରି ନାନେ ଆସା ଆପାକ୍‌ଚିଃ ଣ୍ଡୁ । 19 ଅ ନିଂନେ ଉଙ୍ଗ୍‌, ଦ୍ରିଗ୍‌, ଜ୍ଞାନି ଡିଂ, ବାରି, ନାନେ ମନ୍‌କେ ସତ୍‌ ଗାଲି ପାକା ୱାରାଙ୍ଗ୍‌ୱେଲା । 20 ସାଗ୍ରା ଉଗ୍‌ନେ ଇକ୍‌ଚା ଡିଙ୍ଗ୍‌ଣ୍ଡ୍ରେ ଆରି ଜାବର୍‌ ଚିଲି ଚଙ୍ଗ୍‌ଣ୍ଡ୍ରେ ଏଃତେ ସାଙ୍ଗ ଆଡିଂଗେ । 21 ମେଃଡାଗ୍‌ଲା ବୁସାଃରେ ଆରି କାଉରା ରେମୁଆଁ ଗରିବ୍‌ ଡିଂଆର୍‌ଏ; ବାରି ଜୁଗ୍‌ଡିଃମୁଆଃ ରେମୁଆଁକେ ସ୍ୟାଃକ୍ନେ ଗର୍ଣ୍ଡା ଆଃସଃଏ । 22 ନାନେ ଜନମ୍‌ ବିଃଣ୍ଡ୍ରେ ଆବାନେ ସାମୁଆଁ ଦ୍ରିଗ୍‌, ବାରି, ଇୟାଙ୍ଗ୍‌ ଡୁକ୍ରି ଡିଂଲା, ଆମେକେ ଗ୍ରୁନା ଆଡିଂଗେ । 23 ସତ୍‌କେ ବିଆର୍‌, ବାରି, ଆତେନ୍‌ ଆସଗେ; ଗିଆନ୍‌, ସିକ୍ୟା ଆରି ନିମାଣ୍ଡାଃ ଚିନ୍ତା ବିଆର୍‌ । 24 ଦାର୍ମିକ୍‌ନେ ଆବା ଜାବର୍‌ ସାର୍ଦା ଡିଂଏ, ବାରି, ଜ୍ଞାନି ଉଙ୍ଗ୍‌ଡେନେ ଜନମ୍‌ ବିଃଣ୍ଡ୍ରେ ଆତେନ୍‌ ନ୍‌ସାଃ ସାର୍ଦା ଡିଂଏ । 25 ନାନେ ଆବା ଆରି ନାନେ ଇୟାଙ୍ଗ୍‌ ସାର୍ଦା ଡିଂଆର୍‌ଲେଃ, ଆନାକେ ଗର୍ବେ ସାଃଣ୍ଡ୍ରେ ସାର୍ଦା ଡିଂଲେଃ । 26 ଅ ନିଂନେ ଉଙ୍ଗ୍‌, ନାନେ ମନ୍‌ ଆନିଂକେ ବିଃଲା, ବାରି, ନାନେ ମ୍‌ମୁଆଃ ନିଂନେ ଗାଲିପାକା ଅଲେଙ୍ଗ୍‌ଚେ ସାର୍ଦା ଡିଙ୍ଗ୍‌ଲେଃ । 27 ମେଃଡାଗ୍‌ଲା ବେଶ୍ୟାନେ ସ୍ରି କୁରୁ, ବାରି, ବିନ୍‌ରେନେ ସେଲାମ୍ବୁଏଃନେ ସରୁ କୁଇଁସାଲ୍‌ ସୁଗୁଆ । 28 ଆରି ମେଁ ଡଙ୍ଗାରେ ରକମ୍‌ ବୁଃଡ଼ିମ୍ୟାଃକେ, ବାରି, ରେମୁଆଁଇଂନେ ବିତ୍ରେ ବିସାସ୍‌ଗାତ୍‌ଇଂନେ ସଂକ୍ୟା ଜବର୍‌ ଆଃଡିଂଏ । 29 ଜାନେ ଦୁକ୍‌ ? ଜାନେ ଅସାନ୍ତି ? ଜାନେ ୱିଙ୍ଗ୍‌ଆଃ ? ଜାନେ ବିରଦ୍‌ ସାମୁଆଁ ? ଜାନେ ସରାଃସରାଃ ଚିନାବାନା ? ଜାନେ ମ୍‌ମ୍ୟାଁ ବାନା ମ୍‌ମୁଆଃ ? 30 ଜାଜା ସାଗ୍ରା ଉଗ୍‌ ନ୍‌ସାଃ ଜାବର୍‌ ମୁଆଁ କଲେଃଆର୍‌ଏ, ଜାଜା ମିସୁଃକ୍ନେ ସାଗ୍ରା ତୁର୍‌ ଅଲେଙ୍ଗ୍‌ଆର୍‌ଏ । 31 ମେଇଂନେ ଅଙ୍ଗୁର୍‌ ରସ୍‌ ଚିରାଃ ବାନା ଡିଂଲା, ମୁତା‍ଅରିଆ ସବା ଆଃତ୍ନାଲା ଆରି ସ‍ଅଜ୍‌ରେ କୁଲର୍‌ପିଗ୍‌ଅରିଆ ଗାଲା, ନା ଆମେକେ ଆକେଗେ । 32 ଇଡ଼ିଂ ଆତେନ୍‌ ବୁବଃ ରକମ୍‌ ଆଃଏ ଆରି ମାଃଲାଃବଃ ରକମ୍‌ ଆଃଗୁଏଃଏ । 33 ନାନେ ମ୍‌ମୁଆଃ ବିନ୍‌ ସାମୁଆଁ କେଏ, ନାନେ ମନ୍‌ କୁଟ୍‌ ସାମୁଆଁ ବାସଙ୍ଗ୍‌ଏ । 34 ବାରି, ନା କେଣ୍ଡିଆଃ ବିତ୍ରେ ଡୁଲେଗ୍‌ଣ୍ଡ୍ରେ କି ଜାଆଜ୍‌ନେ ମାସ୍ତୁଲ ଆଡ଼ାତ୍ରା ଡୁଲେଗ୍‌ନେ ରେମୁଆଁ ରକମ୍‌ ନାଡିଂଏ । 35 ନା ନାବାସଙ୍ଗ୍‌ଏ, ମେଇଂ ଆନିଂକେ ବଗ୍‌ଆର୍‌କେ, ମାତର୍‌ ନିଂ ଚିନାବାନା ନ୍ନାଡିଂକେ ଣ୍ଡୁ; ମେଇଂ ଆନିଂକେ ବଗ୍‌ଆର୍‌କେ, ମାତର୍‌ ନିଂ ମେଃଡିଗ୍‌ ନ୍ନାମ୍ୟାଃକେ; ନିଂ ଅଃନା ନ୍ତଃଡ଼୍ୟାଃଏ ? ବାର୍‌ମୁଇଂତର୍‌ ନିଂ ଆତେନ୍‌ ନ୍ତୁର୍‌ଏ ।