1 ଆଲ ଗୁଆର୍‌ବ୍ନ ସିକେନେ ସାମୁଆଁ ସାପା ଆଃ ଶଲୋମନ୍‌ ଗୁଆର୍‌କ୍ନେ ଆରି ଯିହୁଦାନେ ଇଃସାଙ୍ଗ୍‌ ହିଜକୀୟନେ ମୁକିଆଇଂ ଆତେନ୍‌ ଗୁଆର୍‌ ଆଃଜାର୍‌ବ‍ଆର୍‌ଗେ । 2 ସାମୁଆଁ ବୁଃଡ଼ିନେ ପର୍‌ମେସର୍‌ନେ ଗଉରବ୍‌; ମାତର୍‌ ସାମୁଆଁ ତୁତୁର୍‌ନେ ଇଃସାଙ୍ଗ୍‌ନେ ଗଉରବ୍‌ । 3 କିତଙ୍ଗ୍‌ ଡିରକମ୍‌ ତିଆର୍‌ ଆରି ମଞ୍ଚ୍‌ପୁର୍‌ ଡିରକମ୍‌ ସ୍ରି, ଆରି ଦେତ୍‌ରକମ୍‌ ଇଃସାଙ୍ଗ୍‌ଇଂନେ ମନ୍‌ନେ ସାମୁଆଁ ବୁଜେନେ ଜାବର୍‌ କସ୍‌ଟ । 4 ରୁପାବାନ୍‌ ଆମାର୍‌ ଆଃତାର୍‌ବିଃପା, ତେଲା ସୁନାରି ନ୍‌ସାଃ ମୁଇଂ ତାଲା ତାର୍‌ଏ । 5 ଇଃସାଙ୍ଗ୍‌ନେ ସେଃମଁବାନ୍‌ ଦୁସ୍‌ଟ‍ଇଂକେ ସ୍ଲ ଆଃଡିଂବିଃ, ଆରି, ମେଁନେ ସିଂଆଁସନ୍‌ ଦର୍ମରେ ସାନ୍ତି ଡିଂଏ । 6 ଇଃସାଙ୍ଗ୍‌ନେ ଡାଗ୍ରା ନିଜର୍‌ନେ ଗର୍ବନେ ସାମୁଆଁ ଆବାସଙ୍ଗ୍‌ପା ବାରି, ମ୍ନାଃ ରେମୁଆଁଇଂନେ ଜାଗା‍ଅରିଆ ଆତୁଆଁଗେପା । 7 ମେଃଡାଗ୍‌ଲା ମୁଃଡ଼ି ସନ୍‌ମାନ୍‌ ବାନେ ରେମୁଆଁକେ ନାନେ ମ୍‌ମୁଁଆଃ କେଲାଏଃକେ, ମେଁ ଡାଗ୍ରା ନାନେ ଡାଆଁ ଡିଂନେ ବାଦୁଲ୍‌ ଉଲ୍‌ଟା "ଆକ୍‌ଅରିଆ ଏଃଲା" ଡାଗ୍‌ଚେଃ ଆନାକେ ବାସଙ୍ଗ୍‌ନେ ନିମାଣ୍ଡାଃ । 8 ୱିଙ୍ଗ୍‌ଆଃ ନ୍‌ସାଃ ମାର୍ୟାଃତୁଗ୍‌ ବିଚାର୍‌ ଡୁଆ ଆୱେଗେପା, ପେୱେଲା ତେନ୍‌ ଇଡ଼ିଂ ପେନେ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେ ଆପେକେ ଗିଆସଃ ଆଃଡିଂକ୍ନେ ଇଡ଼ିଂ ପେ ମେଃ ପେଡିଂଏ ? 9 ନିଜର୍‌ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେ ଏଃତେ ୱିଙ୍ଗ୍‌ଆଃଲା ସମାଦାନ୍‌ ଡିଙ୍ଗ୍‌ପା, ବାରି, ବିନ୍‌ରେନେ ବୁଃଡ଼ି ଲାଏଃକ୍ନେ ସାମୁଆଁ ଆବାସଙ୍ଗ୍‌ଗେପା । 10 ଣ୍ଡୁଲା ଦ୍ରିଗ୍‌ଣ୍ଡ୍ରେ ଆନାକେ ନିନ୍ଦା ଡିଂଆର୍‌ଲା, ନାନେ ଇଜତ୍‌ ଆୱେ ଣ୍ଡୁ । 11 ମୁଇଂ ନିମାଣ୍ଡାଃ ବାବ୍‌ରେ ତାର୍‌କ୍ନେ ବାବ୍‌ନା, ରୁପାନେ ତାଲିନିଆ ସୁନାନେ ଚିତ୍ର । 12 ସୁନାନେ ଚ୍ନଗ୍‌ଲୁଗ୍‌ ଆରି ନିମାଣ୍ଡାଃ ସୁନାନେ ସର୍ସ୍ୟା ଡିରକମ୍‌, ଦିଆନ୍‌ ବିଃଚେଃ ଦ୍ରିଗ୍‌ନେ ନ୍ଲୁଗ୍‌ ଡାଗ୍ରା ଜ୍ଞାନବାନ୍‌ ୱିଙ୍ଗ୍‌ଣ୍ଡ୍ରେ ଦେତ୍‌ରକମ୍‌ । 13 ଚାସ୍‌ବାସ୍‌ ବେଲା ଅଁସ୍‌ଡ଼୍ୟାଃନେ ଚୁଇଃ ଡିରକମ୍‌, ବେବ୍ନ ଆଡ଼ାତ୍ରା ବିସ୍‌ବାସ୍‌ ଲାଏଃକ୍ନେ ଦୁତ୍‌ ଦେତ୍‌ରକମ୍‌; ମେଃଡାଗ୍‌ଲା ମେଁ ନିଜର୍‌ ମୁକିଆଇଂନେ ପାରାନ୍‌ଅରିଆ ସାନ୍ତି ବିଃଏ । 14 ଆଗୁର୍‌କ୍ନେ ତ୍ରିଗ୍‌ଡ୍ୟାଃ ଆରି ୱେଡ଼୍ୟାଃ ଡିରକମ୍‌, ନିଜର୍‌ ଦାନ୍‌ ବିସ‍ଏରେ ମିଚ୍‌ ପ୍ରସଂସା ଡିଂଣ୍ଡ୍ରେ ଦେତ୍‌ରକମ୍‌ । 15 ସାଆସ୍‌ ସାଃନେ ବାନ୍‌ ସାସନ୍‌ ଡିଂଣ୍ଡ୍ରେକେ ବୁଜେ ନେୟାଏ, ବାରି, କ‍ଅଁଲ୍‌ ନ୍ଲିୟା ଞ୍ଚିୟା ଆଃପାକ୍‌ଚିଃଏ । 16 ଜଦି ନା ଞ୍ଜୁଙ୍ଗ୍‌ ବାନାଲାଏଃକେ ? ତେଲା ନାନେ ଉଃଡ଼ି ଦର୍‌କାର୍‌, ଅଃତେନ୍‌ ଚଙ୍ଗ୍‌; ଜାବର୍‌ ନାଚଙ୍ଗ୍‌ଲା ନା ଆତେନ୍‌ ଲୁଆର୍‌ ଜଗ୍‌ନାତ୍ଲାଗ୍‌ଏ । 17 ନାନେ ଞ୍ଚ ନା ଡାଗ୍ରା ବାସା ଲାଏଃକ୍ନେ ଡୁଆଅରିଆ ପ୍ରେକ୍‌ ପ୍ରେକ୍‌ ଆୱେଗେ, ଣ୍ଡୁଲା ମେଁ ଆନାକେ ରିସା ଡିଂଚେଃ ଗ୍ରୁନା ଡିଂଏ । 18 ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେ ବିରୁଦ୍‌ରେ ଜା ମିଚ୍‌ ସାକି ବିଃଏ, ମେଁ ଜୁଦ୍‌ ଡିଙ୍ଗ୍‌ନେ ମୁଟ୍‌ଲା, କାଣ୍ଡା ଆରି ଡିକ୍ନେ ଙାଁ ରକମ୍‌; 19 ବିପଦ୍‌ ବେଲା ଅବିସ୍‌ବାସ୍‌ ରେମୁଆଁ ଡାଗ୍ରା ବିସ୍‌ବାସ୍‌ ଡିଂନେ ଡିରକମ୍‌, ପାକ୍‌ଚିଃକ୍ନେ ଗ୍ନି ଆରି ଖଞ୍ଜନ୍‌ ପିଟ୍‌କେ ୱେଲାଏଃକ୍ନେ ଞ୍ଚ ଦେତ୍‌ରକମ୍‌ । 20 ରାସଃକିଗ୍‌ ବେଲା ସକାପାଟାଇ ଜଗ୍‌ ରାଙ୍ଗ୍‌ଡନେ ଆରି ଇରିଃ ଆଡ଼ାତ୍ରା ବିସେଃ ରସ୍‌ ତ୍ଲାଗ୍‌ନେ ରେମୁଆଁ ଡିରକମ୍‌, ମନ୍‌ ଦୁକ୍‌ରେ ଲାଏଃକ୍ନେ ରେମୁଆଁ ଡାଗ୍ରା ଅସ୍‌ମାର୍‌ ସାର୍‌ନେ ରେମୁଆଁ ଦେତ୍‌ରକମ୍‌ । 21 ନାନେ ସତ୍ରୁ କିଡ଼େସଃଲା, ଆମେକେ କାଦି ଆଃଚଙ୍ଗ୍‌; ବାରି, ଆମେକେ ଉଗ୍‌ଡ୍ୟାଃ ଡଲା, ଆମେକେ ଣ୍ଡିଆଃ ଆଃଉଗ୍‌; 22 ତେଲା ନା ମେଁନେ ବାଆଃଅରିଆ ଡୁଆକ୍ନେ ବୁରେଃସ ସଃଚେଃ ନାବ‍ଏ, ବାରି, ମାପ୍‌ରୁ ଆନାକେ ଇନାମ୍‌ ବିଃଏ । 23 ଡିରକମ୍‌ ଉତର୍‌ ପାକାନେ ୱେଡ଼୍ୟାଃ ଗୁର୍‌ନେ ଣ୍ଡିଆଃକେ ୱାଡୁଙ୍ଗ୍‌ପାଙ୍ଗ୍‌ଏ, ଦେତ୍‌ରକମ୍‌ ଚୁଗ୍‌ଲିଆ ଡିଂନେବାନ୍‌ ସାର୍ମୁଆଃଅରିଆ ରିସା ପାଙ୍ଗ୍‌ଏ । 24 ୱିଙ୍ଗ୍‌ଆଃରିଙ୍ଗ୍‌ଆଃନେ ସେଲାମ୍ବୁଏଃ ଏଃତେ ମୁଇଂଅରିଆ ବାସାନେ ବାଦୁଲ୍‌ ସିଲାପ୍‌ନେ ଆଡ଼ାତ୍ରା ମୁଇଂ କନେ ବାସାନେ ନିମାଣ୍ଡାଃ । 25 ଉଗ୍‌ଡ୍ୟାଃ ଡକ୍ନେ ପାରାନ୍‌କେ ଚୁଇଡ଼୍ୟାଃ ଡିରକମ୍‌, ସ୍ଲ ଦେସ୍‌ବାନ୍‌ ନିମାଣ୍ଡାଃ କବର୍‌ ଦେତ୍‌ରକମ୍‌ । 26 ଗଲାଡ଼୍ୟାଃ ଣ୍ଡିଆଃ କୁଣ୍ଡ୍‌ ଆରି ମ‍ଇଲା ଜର୍‌ନାଡ଼୍ୟାଃ ଡିରକମ୍‌, ଦୁସ୍‌ଟ ରେମୁଆଁ ସେଃମଁ ବୁଟମେଗ୍‌ନେ ଦାର୍ମିକ୍‌ ରେମୁଆଁ ଦେତ୍‌ରକମ୍‌ । 27 ଜାବର୍‌ ଞ୍ଜୁଙ୍ଗ୍‌ ଚଙ୍ଗ୍‌ନେ ଡିରକମ୍‌ ନିମାଣ୍ଡାଃ ଣ୍ଡୁ, ଦେତ୍‌ରକମ୍‌ ରେମୁଆଁଇଂ ନିଜର୍‌ ଗଉରବ୍‌ ତୁତୁର୍‌ନେ ନିମାଣ୍ଡାଃ ଣ୍ଡୁ । 28 ଜେ ନିଜେକେ ଅଟ୍‌କେ ଆୟା ଣ୍ଡୁ, ମେ ପାକ୍‌ଚିଃଲାଏଃକ୍ନେ ଆରି ତୁରାଃ ଆଲେଃକ୍ନେ ଇନି ରକମ୍‌ ।