1 ଡିରକମ୍‌ ନ୍ନାଃସେଙ୍ଗ୍‌କିଗ୍‌ ଅଁସ୍‌ଡ଼୍ୟାଃ ଆରି ୱେଃକିଗ୍‌ ବେଲା ଣ୍ଡିଆଃ ଗୁର୍‌ନେ, ଦେତ୍‌ରକମ୍‌ ମୁର୍କକେ ସନ୍‌ମାନ୍‌ ବିଃନେ ନିମାଣ୍ଡାଃ ଣ୍ଡୁ । 2 ଡିରକମ୍‌ କିଆପିଗ୍‌ ୱାଲେଃ ଅଲେଙ୍ଗ୍‌ନେ ବେଲା ଆରି ତାଳଚୋଞ୍ଚ ୱାଲେଃନେ ବେଲା, ଦେତ୍‌ରକମ୍‌ ସରାଃସରାଃ ବିଃବ୍ନ ଅବିସାପ୍‌ ଡାଗ୍ରା ଆପାଙ୍ଗ୍‌ ଣ୍ଡୁ । 3 ଗଡ଼ା ଆତ୍‌ଲା କୋରଡ଼ା; ଗଦ ନ୍‌ସାଃ ଲାଗାମ୍‌, ବାରି, ମୁର୍କନେ ଗାଗ୍‌ଡ଼େ ନ୍‌ସାଃ ଡୁଡୁ । 4 ମୁର୍କକେ ମେଁନେ ଅଜ୍ଞାନ୍‌ ଅନୁସାରେ ଉତର୍‌ ଆବିଃଗେପା, ଉତର୍‌ ପେବିଃଲା ପେ ଡିଗ୍‌ ମେଁନେ ସମାନ୍‌ ପେଡିଂଏ । 5 ମୁର୍କକେ ମେଁନେ ଅଜ୍ଞାନ୍‌ ଅନୁସାରେ ଉତର୍‌ ବିଃପା, ଣ୍ଡୁଲା ମେଁ ନିଜର୍‌ ମ୍‌ମୁଆଃଅରିଆ ନିଜେକେ ଜ୍ଞାନି ଡାଗ୍‌ଚେଃ ବାବେଏ । 6 ମୁର୍କନେ ନ୍ତିଅରିଆ ଜା କବର୍‌ ବାସଙ୍ଗ୍‌ ବେଏ, ମେଁ ନିଜର୍‌ ଞ୍ଚ ମନ୍‌କେ ଗୁଆଃଚେଃ କସ୍‌ଟ ବାଏ । 7 ଚଟାନେ ଞ୍ଚ ଡିରକମ୍‌ ଚଟା ଚଟା ଅଲେଙ୍ଗ୍‌ଏ, ମୁର୍କ ରେମୁଆଁନେ ତୁମୁଆଃଅରିଆ ସିକ୍ୟା ବିଃନେ ସାମୁଆଁ ଦେତ୍‌ରକମ୍‌ । 8 ଗପେନା‍ଅରିଆ ବ୍ରି ବଚେଃ ଟୁନେ ଡିରକମ୍‌, ମୁର୍କକେ ସନ୍‌ମାନ୍‌ ବିଃନେ ଦେତ୍‌ରକମ୍‌ । 9 ବୁସାଃରେନେ ନ୍ତି ଏଃତେ ଗ୍ରେଃ ସାଃନେ ଡିରକମ୍‌, ମୁର୍କ‍ଇଂନେ ତୁମୁଆଃଅରିଆ ସିକ୍ୟା ବିଃନେ ସାମୁଆଁ ଦେତ୍‌ରକମ୍‌ । 10 ଗୁଗରେ ଡିରକମ୍‌ ସାପାରେକେ ଚିନାବାନା ଆଃଡିଂଏ, ଆରି ଜା ମୁର୍କକେ ଆଜ୍‌ରି ବିଃଏ ଆରି ଜା ଗାଲିବଃ ୱେଣ୍ଡ୍ରେକେ ଆଜ୍‌ରି ବିଃଏ, ଆତେନ୍‌ ରେମୁଆଁ ଦେତ୍‌ରକମ୍‌ । 11 ନିଜେ ଲୁଆର୍‌କ୍ନେ ଡାଗ୍ରା ଆଣ୍ଡେଚେଃ ଚଙ୍ଗ୍‌ନେ ଗୁସୁଃ ଡିରକମ୍‌, ପ୍ରେକ୍‌ ପ୍ରେକ୍‌ ନିଜର୍‌ ନିର୍ବୁଦି କାମ୍‌ ଡିଂନେ ମୁର୍କ ଦେତ୍‌ରକମ୍‌ । 12 ଜା ନିଜର୍‌ ମ୍‌ମୁଆଃଅରିଆ ଜ୍ଞାନି, ଦେକ୍‌ରକମ୍‌ ରେମୁଆଁକେ କିକେନାଡିଂକେ କି ? ମେଁ ବାଦୁଲ୍‌ ମୁର୍କ ବିସ‍ଏରେ ଜାବର୍‌ ଆସା ଲାଏଃକେ । 13 ଅଲ୍‌ସୁଆ ବାସଙ୍ଗ୍‌ମ୍ୟାଃକେ, "ଗାଲିବଃ ସିଂଅଁ ଲାଏଃକେ, ଚକ୍‌ଅରିଆ ସିଂଅଁ ଲାଏଃକେ ।" 14 ଡିରକମ୍‌ କାବ୍‌ଜା ବାନ୍‌ କାପାଟ୍‌ ପୁଏଏ, ଦେତ୍‌ରକମ୍‌ ଅଲ୍‌ସୁଆ ନିଜର୍‌ ସିଙ୍ଗ୍‌ଲାଃଅରିଆ ଲେଃଚେଃ ପୁଏଏ । 15 ଅଲ୍‌ସୁଆ ତାଲିଅରିଆ ନ୍ତି ବଚେଃ ଆରି ମୁଇଂତର୍‌ ଆତେନ୍‌ ତୁମୁଆଃ ରାଙ୍ଗ୍‌ୱେ ନ୍‌ସାଃ ଆୟା ଣ୍ଡୁ । 16 ଗୁ ରୁଆ ନିମାଣ୍ଡାଃ ବିଚାର୍‌ ବିସ‍ଏରେ ଉତର୍‌ ବିଃଣ୍ଡ୍ରେ ବାନ୍‌ ଅଲ୍‌ସୁଆ ନିଜର୍‌ ମ୍‌ମୁଆଃଅରିଆ ଜ୍ଞାନି । 17 ମୁଃଡ଼ି ରେମୁଆଁ ଗାଲିଅରିଆ ୱେନେ ବେଲା ନିଜର୍‌ ମାସ୍ନାମୁଁଆଃ ରେମୁଆଁ ୱିଙ୍ଗ୍‌ଆଃଚେଃ ରିସା ଡିଂଏ, ମେଁ ଗୁସୁଃନେ ନ୍ଲୁଗ୍‌ ସାଃନେ ରେମୁଆଁ ରକମ୍‌ । 18 ସୁଆ ଡୁଆ ଲାଏଃକ୍ନେ ଙାଁ ଆରି ଆଃଗୁଏଃ ବିଃନେ ଙାଁ, ଟୁଇଙ୍ଗ୍‌ ଡିଂକ୍ନେ ବାୟା ରେମୁଆଁ ଡିରକମ୍‌; 19 ନିଜର୍‌ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେକେ ମୁଃଡ଼ି ରେମୁଆଁ ଆଃପୁଏଚେଃ ବାସଙ୍ଗ୍‌ଏ, "ନିଂ ନାଲେ ଣ୍ଡିଂଗେ"; ଆତେନ୍‌ ରେମୁଆଁ ଦେତ୍‌ରକମ୍‌ । 20 ସୁଆ ଡାଲା ସୁଆ ଲିଗ୍‌ୱେଏ, ଚୁକ୍‌ଲିଆ ରେମୁଆଁ ଆଲେଃଲା ୱିଙ୍ଗ୍‌ଆଃ ବନ୍ଦ୍‌ ଡିଂଏ । 21 ଡିରକମ୍‌ ଡୁଆଲାଏଃକ୍ନେ ଏଲେଃସକେ ଏଲେଃସ ଆରି ସୁଆକେ ସୁଆ, ଦେତ୍‌ରକମ୍‌ ୱିଙ୍ଗ୍‌ଆଃକେ ଜାବର୍‌ ଆଃଡିଂଣ୍ଡ୍ରେ ୱିଙ୍ଗ୍‌ଆଃ ଡିଂନେ ରେମୁଆଁ । 22 କୁଟ୍‌ ସାମୁଆଁ ବାସଙ୍ଗ୍‌ଣ୍ଡ୍ରେନେ ସାମୁଆଁ ଅମ୍ରୁତ୍‌ ରକମ୍‌ ମ୍ବ୍ରେ, ଆତେନ୍‌ ସୁଲୁଏଃ ବିତ୍ରେ ୱେଏ । 23 ମନ୍‌ ବିତ୍ରେ ରିସା ବଚେଃ ତୁମୁଆଃଅରିଆ ନିମାଣ୍ଡାଃ ସାମୁଆଁ ବାସଙ୍ଗ୍‌ନେ ତୁମୁଆଃ ଡିରକମ୍‌, ରୁପାନେ ଆମାର୍‌ ଏଃତେ ଲିଗ୍‌ଚେଃ ଆଃରେକ୍ନେ ଙ୍କୁଇ ଦେତ୍‌ରକମ୍‌ । 24 ଗ୍ରୁନା ଡିଂଣ୍ଡ୍ରେ ନିଜର୍‌ ତୁମୁଆଃଅରିଆ କୁଟ୍‌ ଡିଙ୍ଗ୍‌ଏ, ମାତର୍‌ ମନ୍‌ଅରିଆ ନାଲେ ଆୟା ଣ୍ଡୁ । 25 ମେଁ ମ୍ବ୍ରେ ସାମୁଆଁ ବାସଙ୍ଗ୍‌ଲା, ଆମେକେ ବିସ୍‌ବାସ୍‌ ଆଡିଂଗେ, ମେଃଡାଗ୍‌ଲା ମେଁନେ ମନ୍‌ଅରିଆ ଗୁକ୍ଲିଗ୍‌ ଗ୍ରୁନା ସାମୁଆଁ ଲେଃଏ । 26 ମେଁନେ ଗ୍ରୁନା କୁଟ୍‌ଅରିଆ ନିଜ୍‌କେ ଡିଡାଲା ଡିଗ୍‌ ମେଁନେ ଦଦ୍ୟା ଗୁନ୍‌ ସାପାରେ ଡାଗ୍ରା ତାର୍‌ଏ । 27 ଜା କୁରୁ ଗଃଏ, ମେଁ ମନ୍‌କେ ଆତ୍‌ ବିତ୍ରେ ଲଃଏ; ବାରି, ଜା ବ୍ରି ଆଃଗୁଣ୍ଡ୍‌ଲିଏ, ଆତେନ୍‌ ମେଁ ଆଡ଼ାତ୍ରା ଆଣ୍ଡେଏ । 28 ନାଲେ ବାସଙ୍ଗ୍‌ନେ ନ୍ଲିୟା ଆଜାକେ ଗ୍ରୁନା ଡିଂଏ, ଆମେକେ ଆଃ ଗ୍ରୁନା ଡିଂଏ; ବାରି, ମ୍ବ୍ରେ ମ୍ବ୍ରେ ସାମୁଆଁ ବାସଙ୍ଗ୍‌ନେ ତୁମୁଆଃ ବିନାସ୍‌ନେ କାରନ୍‌ ଡିଂଏ ।