1 ମୁଃଡ଼ି ରେମୁଆଁ ପ୍ରେକ୍‌ ପ୍ରେକ୍‌ ଚେତ୍‌ନା ବାଲା ଡିଗ୍‌ ନିଜର୍‌ ମନ୍‌କେ ଡାଟ୍‌ ଆଃଡିଙ୍ଗ୍‌ଏ, ମେଁ ନିମାଣ୍ଡା ଆଡିଙ୍ଗ୍‌ଚେ ମାର୍ୟାଃତୁଗ୍‌ ନସ୍‌ଟ ଡିଙ୍ଗ୍‌ୱେଏ । 2 ଦାର୍ମିକ୍‌ଇଂ ଜବର୍‌ ଡିଙ୍ଗ୍‌ଲା, ରେମୁଆଁଇଂ ସାର୍ଦା ଡିଂଆର୍‌ଏ; ମାତର୍‌ ଦୁସ୍‌ଟ ରେମୁଆଁ ଅଦିକାର୍‌ ବାଲା, ରେମୁଆଁଇଂ ଦୁକ୍‌ରେ ଅଃଆର୍‌ଏ । 3 ମୁଃଡ଼ି ରେମୁଆଁ ଗିଆନ୍‌କେ ଆଲାଦ୍‌ ଡିଂଏ, ମେଁ ନିଜର୍‌ ଆବାକେ ସାର୍ଦା ଆଃଡିଂଏ; ମାତର୍‌ ଜା ବେସ୍ୟାଇଂନେ ଡାଗ୍ରା ମିସୁଃଏ, ମେଁ ନିଜର୍‌ ସମ୍ପତି ନସ୍‌ଟ ଆଃଡିଂଏ । 4 ଇଃସାଙ୍ଗ୍‌ ନିମାଣ୍ଡାଃ ଚିନ୍ତା ବାନ୍‌ ଦେସ୍‌ ସାନ୍ତି ଆଃଡିଂଏ; ମାତର୍‌ ଜା ଇନାମ୍‌କେ ଆସା ଡିଂଏ, ମେଁ ଆତେନ୍‌ ଆଃଉଲ୍‌ଟେ ବିଃଏ । 5 ମୁଃଡ଼ି ରେମୁଆଁ ନିଜର୍‌ ଡୁଆ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେନେ ବିସ‍ଏରେ ମ୍ବ୍ରେ ମ୍ବ୍ରେ ସାମୁଆଁ ବାସଙ୍ଗ୍‌ଏ, ମେଁ ମେଁନେ ଞ୍ଚ ନ୍‌ସାଃ ଜାଲ୍‌ ତାଲାଗ୍‌ଏ । 6 ଦଦ୍ୟା ରେମୁଆଁନେ ପାପ୍‌ଅରିଆ ବ୍ନେଗ୍‌ ଲେଃଏ; ମାତର୍‌ ଦାର୍ମିକ୍‌ ଅସ୍‌ମାର୍‌ ସାର୍‌ଏ ଆରି ସାର୍ଦା ଡିଂଏ । 7 ଦାର୍ମିକ୍‌ ରେମୁଆଁ ଗରିବ୍‌ଇଂନେ ଗୁଆରି ବିସ‍ଏରେ ମ୍ୟାଃଏ; ମାତର୍‌ ଆତେନ୍‌ ମ୍ୟାଃନ୍‌ସାଃ ଦୁସ୍‌ଟ ରେମୁଆଁନେ ବୁଦି ଣ୍ଡୁ । 8 ନିନ୍ଦା ଡିଂଣ୍ଡ୍ରେ ଇନିକେ ଆଃୱିଙ୍ଗ୍‌ଆଃଏ; ମାତର୍‌ ଜ୍ଞାନି‍ଇଂ ରିସାକେ ଆଃଗଣ୍ଡାଃଆର୍‌ଏ । 9 ଅଗ୍ୟାନ୍‌ ରେମୁଆଁ ଏଃତେ ଗିଆନି ରେମୁଆଁନେ ଜୁକ୍ତାଜୁକ୍ତି ଡିଂଲା, ମେଁ ରିସା ଡିଂଲା କି ଲୁଆଃଲା, ମେଃଡିଗ୍‌ ସାନ୍ତି ଣ୍ଡୁ । 10 ରେମୁଆଁ ବାଗୁଏଃନେକେ ଆଲାଦ୍‌ ଡିଂନେ ରେମୁଆଁଇଂ ଦରମ୍‌ ରେମୁଆଁକେ ଗ୍ରୁନା ଡିଂଆର୍‌ଏ; ବାରି, ମେଇଂ ଦରମ୍‌ ରେମୁଆଁନେ ପାରାନ୍‌ ତୁର୍‌ଆର୍‌ଏ । 11 ମୁର୍କ ନିଜର୍‌ନେ ସାପା ରିସା ଆଃତାର୍‌ଏ; ମାତର୍‌ ଜ୍ଞାନି ଆତେନ୍‌ ସମ୍ବାଲେଚେଃ ସାନ୍ତି ଆଃଡିଙ୍ଗ୍‌ଏ । 12 ସାସନ୍‌ ଡିଂଣ୍ଡ୍ରେ ଅଃନା ନାଲେ ସାମୁଆଁଅରିଆ ଆଃନ୍ୟାଲୁଗ୍‌ଏ, ତେଲା ମେଁନେ କାମ୍‌ ଡିଂଣ୍ଡ୍ରେ ସାପାରେ ଦୁସ୍‌ଟ ଡିଂଆର୍‌ଏ । 13 ଗରିବ୍‌ ଆରି ଅନ୍ୟାୟ୍‌ ଡିଂନେ ରେମୁଆଁ ମୁଇଂଅରିଆ ମିସୁଃମ୍ୟାଃଆର୍‌କେ, ମାପ୍‌ରୁ ମ୍ବାୟାନେ ମ୍‌ମୁଆଃ ତାର୍କିଗ୍‌ ଆଃଡିଂମ୍ୟାଃକେ । 14 ମୁଃଡ଼ି ଇଃସାଙ୍ଗ୍‌ ସତ୍‌ ବାବ୍‌ରେ ଗରିବ୍‌ ରେମୁଆଁଇଂନେ ବିଚାର୍‌ ଡିଂଏ, ମେଁନେ ସିଂଆଁସନ୍‌ ସାପାଦିନା ଲେଃଏ । 15 ଡୁଡୁ ଆରି ୱିଙ୍ଗ୍‌ନେ ସାମୁଆଁ ଗିଆନ୍‌ ବିଃଏ; ମାତର୍‌ ଗଡ଼େଅକେ ମେଁନେ ଇକ୍‌ଚାରେ ଆନ୍ତାର୍‌ବିଃଲା, ମେଁ ମେଁନେ ଇୟାଙ୍ଗ୍‌ଡେକେ ଆଃଗ୍ୟାସଃଏ । 16 ଦୁସ୍‌ଟ ରେମୁଆଁଇଂ ଜାବର୍‌ ଡିଂଆର୍‌ଲା, ପାପ୍‌ ଜାବର୍‌ ଡିଂଏ; ମାତର୍‌ ଦରମ୍‌ ରେମୁଆଁଇଂ ମେଇଂନେ ବିନାସ୍‌ କେଆର୍‌ଏ । 17 ନିଜର୍‌ ଉଙ୍ଗ୍‌କେ ସାସ୍ତି ବିଃଲା, ମେଁ ଆନାକେ ସାନ୍ତି ବିଃଏ; ବାରି, ମେଁ ନାନେ ଜିବନ୍‌କେ ସୁକ୍‌ ବିଃଏ । 18 ଆଣ୍ଡିଅରିଆ ରେମୁଆଁଇଂ ଇସ୍‌ପର୍‌ନେ ଆଦେସ୍‌ ଅନୁସାରେ ଆବ୍ରୁଆଆର୍‌, ଆତ୍‌ଅରିଆନେ ରେମୁଆଁଇଂ ବିନାସ୍‌ ଡିଂଆର୍‌ଏ; ମାତର୍‌ ମୁଃଡ଼ି ରେମୁଆଁ ମାପ୍‌ରୁନେ ନିଅମ୍‌ ମାନେଃଏ, ମେଁ ନିମାଣ୍ଡାଃ । 19 ମୁଇଂ ସାମୁଆଁରେ ଦାସ୍‌ ଆବଦ୍‌ଲେ ଣ୍ଡୁ; ମେଃଡାଗ୍‌ଲା ମେଁ ବୁଜେଲା ଡିଗ୍‌ ଦିଆନ୍‌ ଆବିଃ ଣ୍ଡୁ । 20 ନା କି ସାମୁଆଁଅରିଆ ଚଞ୍ଚଲ୍‌ ରେମୁଆଁକେ କିକେନାଡିଂକେ ? ତେନ୍‌ ବାଦୁଲ୍‌ ମୁର୍କ ବିସ‍ଏରେ ଜାବର୍‌ ଆସା ଲାଏଃକେ । 21 ଜା ଗଡ଼େଅ କାଲାବାନ୍‌ ନିଜର୍‌ ଚାକର୍‌କେ ଆଲାଦ୍‌ ଡିଂଚେଃ ଜତନ୍‌ ଡିଂଏ, ଇଡ଼ିଂଡେ ଆତେନ୍‌ ଚାକର୍‌ ଆଃ ମେଁନେ ଉଙ୍ଗ୍‌ଡେ ଡିଂଚେଃ ତଃଡ଼୍ୟାଃଏ । 22 ବେସି ରିସା ଡିଙ୍ଗ୍‌ନେ ରେମୁଆଁ କିରମର ଆଃଡିଙ୍ଗ୍‌ଏ ବାରି ବେସି ପାପ୍‌ କାମ୍‌ ଆଃଗଟେଏ । 23 ରେମୁଆଁନେ ଆଂକାର୍‌ ଆମେକେ ଡାଆଁ ଆଃଡିଂଏ; ମାତର୍‌ ଜାନେ ଆତ୍ମା ଦରମ୍‌ ଡିଂଏ, ମେଁ ସନ୍‌ମାନ୍‌ ବାଏ । 24 ଜା ଡଙ୍ଗାରେ ଏଃତେ ସାଙ୍ଗ ଡିଙ୍ଗ୍‌ଏ ମେ ନିଜର୍‌ ପାରାନ୍‌କେ ଗ୍ରୁନା ଡିଂଏ, ମେଁ ପାର୍‌ମାନ୍‌ ଆଃଡିଂନେ ସାମୁଆଁ ଦ୍ରିଗ୍‌ଏ, ମାତର୍‌ ମେଃଡିଗ୍‌ ଆବାସଙ୍ଗ୍‌ ଣ୍ଡୁ । 25 ରେମୁଆଁକେ ବୁଟନେ ବ୍ନେଗ୍‌ ରକମ୍‌; ମାତର୍‌ ମାପ୍‌ରୁ ଡାଗ୍ରା ଜା ଆସା ବ‍ଏ, ମେଁ ରକ୍ୟା ବାଏ । 26 ଗୁଲୁଏରୁଆ ସାସନ୍‌ ଡିଂଣ୍ଡ୍ରେନେ ଅନୁଗ୍ରହ ଇକ୍‌ଚା ଡିଂଆର୍‌ଏ; ମାତର୍‌ ରେମୁଆଁନେ ବିଚାର୍‌ ମାପ୍‌ରୁ ବାନ୍‌ ଡିଂଏ । 27 ଅଦରମ୍‌ ଡିଂନେ ରେମୁଆଁ ଦାର୍ମିକ୍‌ ରେମୁଆଁନେ ଗ୍ରୁନାନେ ଡିଂମ୍ୟାଃକେ, ବାରି, ନିମାଣ୍ଡାଃ ଗାଲି ଅଲେଙ୍ଗ୍‌ଣ୍ଡ୍ରେ ଦୁସ୍‌ଟ ରେମୁଆଁକେ ଗ୍ରୁନା ଡିଙ୍ଗ୍‌ମ୍ୟା ।