1 ଗିଆନ୍‌ ମେଃନେ ଆୱା ଣ୍ଡୁ ? ବୁଦି ମେଃନେ ଆୱାଃସାର୍‌ ଣ୍ଡୁ ? 2 ମେଁ ଗାଲି ଆଃଡ଼ାଃ ଲାଏଃକ୍ନେ ତିଆର୍‌ ଜାଗା ଟିପେ, ସାପା ଗାଲି ମିସୁଃଡିଂକ୍ନେ ଜାଗା‍ଅରିଆ ତୁଆଁଏ । 3 ମେଁ ଇନି ଡାଗ୍ରା, ଇନି ଗିଗାନେ ଗାଲିଅରିଆ, ଗାଲିନେ ଗିଗାନେ ଜାଗା‍ଅରିଆ ଲେଃଚେଃ ୱାଃସାର୍‌ଚେଃ ୱାଚେ ବାସଙ୍ଗ୍‌ଏ, 4 ଅ ରେମୁଆଁଇଂ, ନିଂ ଆପେକେ ୱାଣ୍ଡିଂକେ; ବାରି, ରେମୁଆଁଇଂ ଆଡ଼ାତ୍ରା ନିଂନେ ସାମୁଆଁ ଲାଏଃକେ । 5 ଅ ଦରମ୍‌ ରେମୁଆଁଇଂ, ତରକ୍‌ ସାମୁଆଁ ବୁଜେପା; ଅ ମୁର୍କ ରେମୁଆଁଇଂ, ପେ ନିମାଣ୍ଡାଃ ଚିନ୍ତା ଡିଙ୍ଗ୍‌ଚେ ବାସଙ୍ଗ୍‌ନେ ସିକେପା । 6 ଦ୍ରିଗ୍‌ପା, ମେଃଡାଗ୍‌ଲା ନିଂ ନିମାଣ୍ଡାଃ ସାମୁଆଁ ମ୍ବାସଙ୍ଗ୍‌ଏ; ନିଂ ତୁମୁଆଃ ଆଃତର୍ସାଚେଃ ସତ୍‌ ସାମୁଆଁ ମ୍ବାସଙ୍ଗ୍‌ଏ । 7 ମେଃଡାଗ୍‌ଲା ନିଂନେ ତୁମୁଆଃ ସତ୍‌ ବାସଙ୍ଗ୍‌ଏ, ଦଦିଆ ସାମୁଆଁ ନିଂ ତୁମୁଆଃକେ ଗ୍ରୁନା ଡିଙ୍ଗ୍‌ମ୍ୟାଃକେ । 8 ନିଂ ତୁମୁଆଃନେ ସର୍‌ତେ ସାମୁଆଁ ଦରମ୍‌ ସାମୁଆଁ; ତେନ୍‌ ବିତ୍ରେ ଉଲ୍‌ଟା ପାଲ୍‌ଟା ସାମୁଆଁ କି କୁଟ୍‌ ସାମୁଆଁ ମେଃଡିଗ୍‌ ଣ୍ଡୁ । 9 ଜା ଆତେନ୍‌ ବୁଜେଏ, ମେଁ ନ୍‌ସାଃ ଆତେନ୍‌ ସାପା ନିମାଣ୍ଡାଃ; ବାରି, ଗିଆନ୍‌ ବାଲାଏଃକ୍ନେ ରେମୁଆଁଇଂନେ ଡାଗ୍ରା ଆତେନ୍‌ ଡିଂଡିଂକେ ସତ୍‌ । 10 ରୁପା ବାଟା ନିଂନେ ନିମାଣ୍ଡା ସିକ୍ୟା ଆରି ସ୍ରିବ୍ନ ସୁନା ବାଟା ଗିଆନ୍‌ ସାଃପା । 11 ମେଃଡାଗ୍‌ଲା ଗିଆନ୍‌ ମୁକ୍ତାବାନ୍‌ ମ୍ନା ଆରି ସର୍‌ତେ ନିଜର୍‌ ଜିନିସ୍‌ ମେଁ ଏଃତେ ସମାନ୍‌ ଡିଂନେ ଆୟା ଣ୍ଡୁ । 12 ନିଂ ଗିଆନି, ତରକ୍‌ ସାମୁଆଁକେ ନିଜର୍‌ ବାସାନେ ଜାଗା ଆଃଡିଂମ୍ବକେ, ବାରି ଗିଆନ୍‌ ଆରି ବୁଦିନେ ସାମୁଆଁଅରିଆ ସିକ୍ୟା ବାଲେଃଏ । 13 ମାପ୍‌ରୁନେ ବିସ‍ଏ ନେଙ୍ଗ୍‌ ବୁଟମେଗ୍‌ ମ୍‌ମ୍ୟାଃକେ, ଦଦ୍ୟା କାମ୍‌ ଆଡ଼ାତ୍ରା ଗ୍ରୁନା ଣ୍ଡିଙ୍ଗ୍‌ଏ; ଆଂକାର୍‌ ଆରି ବାଃଟନେ ସାମୁଆଁ ଆରି ଦଦ୍ୟା ଗାଲି ଆରି ଉଲ୍‌ଟା ପାଲ୍‌ଟା ବାସଙ୍ଗ୍‌ନେ ତୁମୁଆଃକେ ନିଂ ଗ୍ରୁନା ଣ୍ଡିଂଏ । 14 ନେଙ୍ଗ୍‌ ଡାଗ୍ରା ନିମାଣ୍ଡା ଜଜ୍‌ନା ଆରି ନିମାଣ୍ଡା ଗିଆନ୍‌ ଲାଏଃକେ; ନେଙ୍ଗ୍‌ ନିମାଣ୍ଡା ବାବ୍‌ରେ ବୁଜେ ୟାଣ୍ଡିଙ୍ଗ୍‌କେ ଆରି ବପୁ ନେଙ୍ଗ୍‌ ଡାଗ୍ରା ଲାଏଃକେ । 15 ନିଂ ବାନ୍‌ ରାଜାଇଂ ସାସନ୍‌ ଡିଂମ୍ୟାଃଆର୍‌କେ ଆରି ସାସନ୍‌ ଡିଙ୍ଗ୍‌ଣ୍ଡ୍ରେ ସତ୍‌ ବିଚାର୍‌ ଡିଂମ୍ୟାଃଆର୍‌କେ । 16 ନିଂ ବାନ୍‌ ନେତାଇଂ ଆରି ମୁକିଆ ରେମୁଆଁଇଂ ଆରି ମଞ୍ଚ୍‌ପୁର୍‌ନେ ସର୍‌ତେ ବିଚାର୍‌ ଡିଂଣ୍ଡ୍ରେଇଂ ସାସନ୍‌ ଡିଂମ୍ୟାଃଆର୍‌କେ । 17 ଜାଜା ଆନିଂକେ ଆଲାଦ୍‌ ଡିଂମ୍ୟାଃଆର୍‌କେ, ନିଂ ଆମେଇଂକେ ଆଲାଦ୍‌ ଡିଂମ୍‌ମ୍ୟାଃକେ, ବାରି ଜାଜା ଆଣ୍ଡିଅରିଆ ଆନିଂକେ ତୁର୍‌ମ୍ୟାଃଆର୍‌କେ, ମେଇଂ ଆନିଂକେ ବାଆର୍‌ଏ । 18 ନିଂଅରିଆ ଦନ୍‌ ଆରି ସନ୍‌ମାନ୍‌ ଲାଏଃକେ, ବାରି ମାଡାନେ ଦନ୍‌ ଆରି ଦରମ୍‌କରମ୍‌ ଲାଏଃକେ । 19 ନିଂନେ ଚୁଚୁ ସୁନା ବାନ୍‌ ନିମାଣ୍ଡା, ବାରି, ନିଂନେ ଆର୍ଜେନେ ନିମାଣ୍ଡାଃ ରୁପାବାନ୍‌ ନିମାଣ୍ଡାଃ । 20 ନିଂ ଦରମ୍‌ କରମ୍‌ନେ ଗାଲିଅରିଆ, ବିଚାର୍‌ନେ ଗାଲି ବିତ୍ରେ ଅଲେଙ୍ଗ୍‌ ମ୍‌ମ୍ୟାଃକେ, 21 ଆରି ଜାଜା ଆନିଂକେ ଆଲାଦ୍‌ ଡିଂମ୍ୟାଃଆର୍‌କେ, ଆମେଇଂକେ ସର୍‌ତେ ସମ୍ପତିନେ ସାକାର୍‌ ଆଃଡିଂମ୍‌ମ୍ୟାଃକେ ଆରି ମେଇଂନେ ପାଃଲିଃ ପୁରୁନ୍‌ ଆଃଡିଂମ୍‌ମ୍ୟାଃକେ; 22 ମାପ୍‌ରୁ ନିଜେ ଅଲେଙ୍ଗ୍‌ନେ ଆରାମ୍‌ବାନ୍, ମେଁନେ କାମ୍‌ ସାପା ଅଃସେ ଆଃ ଆନିଂକେ ଆଃରେ ବଗେ । 23 ଅନାଦି କାଲ୍‌ବାନ୍‌ ବା ଅଃସେ କାଲ୍‌ବାନ୍‌ ଣ୍ଡୁଲା ମଞ୍ଚ୍‌ପୁର୍‌ନେ ମୁଲ୍‌ ତିଆର୍‌ ଡିଂନେ ସିସେବାନ୍‌ ନିଂ ନ୍ଲାଏଃକେ । 24 କେଣ୍ଡିଆଃ ସାପା ଆଲାଏଃକ୍ନେ ବେଲା, ଜର୍‌ନାଡ଼୍ୟାଃ ସାପା ଣ୍ଡିଆଃ ବର୍‌ତି ଡିଂଆଲେଃକ୍ନେ ବେଲା ନିଂ ଜନମ୍‌ ଡିଂନ୍ଲେଃକେ । 25 ବାରି, କଣ୍ଡାଇଂ ଆରି କୁପ୍‌ଲିଇଂ ତିଆର୍‌ ଡିଂନେ ସିସେ ନିଂ ଜନମ୍‌ ଡିଂନ୍ଲେଃକେ; 26 ଆତେନ୍‌ ବେଲା ତୁବଃ, କି ବାଟା, କି ମଚ୍‌ପୁର୍‌ଅରିଆ ଲାଏଃକ୍ନେ ଦୁଲିନେ ଗୁଣ୍ଡ୍‌ ମେଁ ତିଆର୍‌ ଡିଂଆବଗେ । 27 ଆଣ୍ଡିନେ ବେଲା ମେଁ କିତଙ୍ଗ୍‌ ରାଜି ତିଆର୍‌ ଡିଂକେ, ଆତେନ୍‌ ବେଲା ନିଂ ଆତ୍‌ଅରିଆ ନ୍ଲେଃଗେ, ଆଣ୍ଡିନେ ବେଲା ମେଁ କେଣ୍ଡିଆଃ ଆଡ଼ାତ୍ରା ଗୁଲ୍‌ଟକ୍ନେ ସିମା ଆଃରେକେ, 28 ବାରି ଆଡ଼ାତ୍ରା ଲାଏଃକ୍ନେ କିତଙ୍ଗ୍‌ ରାଜିକେ ଡାଟ୍‌ ଆଃଡିଂକେ ଆରି କେଣ୍ଡିଆଃନେ ମୁଲ୍‌ ଜାଗାବାନ୍‌ ଜର୍‌ନାଡ଼୍ୟାଃ ସାପା ଜାବର୍‌ ଡିଂକେ; 29 ସର୍‌ତେ ଣ୍ଡିଆଃ ଡିରକମ୍‌ ମେଁନେ ନିଅମ୍‌ ଅମାନି ଡିଂଆୟା ଣ୍ଡୁ, ଆକେନ୍‌ସାଃ ଆଣ୍ଡିନେ ବେଲା ମେଁ କେଣ୍ଡିଆଃନେ ସାନ୍ଦି ଆଃରେକେ ଆରି ଆଣ୍ଡିନେ ବେଲା ମଞ୍ଚ୍‌ପୁର୍‌ନେ ପାଣ୍ଡୁସନ୍‌ ଆଃଚିନାକେ; 30 ଆତେନ୍‌ ବେଲା ନିଂ ମେଁନେ ଡାଗ୍ରା କାରିଗର୍‌ ନ୍ଲେଗେ; ବାରି, ନିଂ କାଲାଆଃ ସାନ୍ତିନେ ରେମୁଆଁ ଡିଂଚେଃ ମେଁନେ ଡାଗ୍ରା କାଲାଆଃ ସାର୍ଦା ଣ୍ଡିଂକେ । 31 ବାରି, ମେଁନେ ମଞ୍ଚ୍‌ପୁର୍‌ଅରିଆ ସାର୍ଦା ଣ୍ଡିଂକେ ଆରି ରେମୁଆଁଇଂ ଉଂଡେଇଂ ଏଃତେ ନିଂନେ ସାର୍ଦା ଲାଏଃଗେ । 32 ଆକେନ୍‌ସାଃ ଅ ନିଂନେ ଉଙ୍ଗ୍‌ଇଂ, ନିଂନେ ସାମୁଆଁ ଦ୍ରିଗ୍‌ପା, ମେଃଡାଗ୍‌ଲା ଜାଜା ନିଂନେ ଗାଲି ସାଃଆର୍‌ଏ, ମେଇଂ ନିମାଣ୍ଡାଃ । 33 ନିମାଣ୍ଡା ସାମୁଆଁ ଦ୍ରିଗ୍‌ଚେଃ ଜ୍ଞାନବାନ୍‌ ଡିଂପା; ବାରି, ଆତେନ୍‌ ଅମାନି ଆଡିଂଗେପା । 34 ଜା ନିଂନେ ସାମୁଆଁ ଦ୍ରିଗ୍‌ଏ ଆରି ନିଂ ବାଜାର୍‌ ଡାଗ୍ରା କାଲାଆଃ ଉର୍‌ ଲେଃଏ, ନିଂ କାପାଟ୍‌ନେ ଦୁଆର୍‌ବନ୍ଦ୍‌ ଡାଗ୍ରା ୱେଏ, ତେଲା ଆତେନ୍‌ ରେମୁଆଁ ନିମାଣ୍ଡାଃ । 35 ମେଃଡାଗ୍‌ଲା ଜା ଆନିଂକେ ବାଏ, ମେଁ ଜିବନ୍‌ ବାଏ ଆରି ମାପ୍‌ରୁନେ ଅନୁଗ୍ରହ ବାଏ । 36 ମାତର୍‌ ଜା ନିଂ ବିରୁଦ୍‌ରେ ପାପ୍‌ ଡିଂଏ, ମେଁ ନିଜର୍‌ ଜିବନ୍‌ନେ କେତି ଆଃଡିଂଏ; ବାକି ସାପା ରେମୁଆଁ ଆନିଂକେ ଗ୍ରୁନା ଡିଂଆର୍‌ଏ, ମେଇଂ ମରନ୍‌କେ ବଲ୍‌ ବାମ୍ୟାଃଆର୍‌କେ ।