27 Yesu bu katotoka mu mulungu, bakala dimosi di mbanza beyoyo, diba na mpeve zimbi diyiza mubwani. Tuuka ntama kedi lwatanga binkutu ko mpe kedi zakidilanga mu nzo ko, kansi yandi ku ndyamu kaka. 28 Bu kayena Yesu, wufukama ha ntadisi andi na wulooka mu ngolo ti: «Yesu, Mwana wu Nzambi Yihyokidi Kuzangama, nkye dyambu ngeye na meno e? Mulemvo aku, ku nkwamisandi ko!» 29 Kedi zonzila bobo, mu dyambu ti Yesu wutuma ku mpeve yimbi yi totoka mu nitu andi. Mu dyambu ti ntangu zizingi, mpeve beyoyo yedi mukwamisanga ni bedi mu bindikanga moko na malu mu bisengo, kansi ni kedi tabulanga byo, mboki mpeve ni yedi munatanga ku nsi yinkatu. 30 Yesu wumufuula ti: «Nkumbu aku nani e?» Yandi wuvutula ti: «Nkumbu ani babingi.» Yandi wuta bobo mu dyambu ti mpeve zimbi zizingi zikota mu yandi. 31 Mpeve zimbi zibombidila Yesu mu lembolo batuba ku bulu dinsisi.

32 Kuba na kamba di zingulu dyedi dyanga ha yulu mulandu. Na mpeve zimbi zi bombidila Yesu ka babika benda bakota mu kati di zingulu. Ni kababika benda bakota mu zingulu. 33 Mpeve zimbi zitotoka mu bakala bedyodyo na ziyenda kota mu zingulu. Kamba dimvimba di zingulu dilundumuka tuuka ku yulu mulandu natee ziyenda bwa mu dyanga na zimana dyama. 34 Minkengi mi zingulu bu bayena bobo, bawoka na bayenda mwangisa nsangu mu mbanza na mu mwa zinzo zimimvungi. 35 Bantu bayenda mu tala misamu bwedi mihyokila, batula ha bela Yesu, na bayena bakala bedyodyo di katotola mpeve zimbi wuba wuzakala ha ndambu yi malu ma Yesu, wuba wulwata binkutu na kimuntu kyandi kisikama. Bunkuta ni bu babaka.