1 Qiisaariyake qachcha'n Qornelewoosi hiyyemaake majichcho hedhemman. Isinna Ixaaliyike loliinke mannixxe kuta giddo dhibba loliinke mannike ajajallomman. 2 Isinna ifike mini hadi duuchchinni welti amanate'n jabateekenna Mageno sodata'emmake, hiyyeeyyeteenna heddo uwwa uwwammake, Magenokanna duuchchi wodda soodata'emmakemman. 3 Mitte barra barrixxa sallaane saate geyamma wodda, iimik erganji isibaa dageexxi, «Qornelewoosi» hiyyeexxi isoo ye'aa'naa waleellati uude. 4 Iimike erganjiba'a hubate uude alayyeexxi «Maye anke Gootta?» hiyye. Iimik erganjinna hiisseexxi, «Soodachcho atixxanna hiyyeeyyetee uutaattaxxi atixxi uwwa qalliyyatee'e Magenii edo shiqqe'een. 5 Ta'anna manna Iyyoophphe'a ergitettexxi Pheexiroosi hiyyemeeka Simi'oonii'i ye'isi! 6 Ta'a isi abbaayyati qarqara hedheeke goga duugaake Simi'oonike mine'n keesumumma ofo'le'een» hiyye. 7 Tennexxee Qoornelewwoosi, haasseessemmak iimiki erganji isonaa'ni gargar higeexxi me'eechchi uduma, ifike erganjuwwinaa'n lame mannanna, iittanni amanate'n jabaateeka isi'aa xuurameesa kadeeka mitte loliinka manjichcho ye'isseexxi, 8 duuchchiinxa yaane insa'ne'n kuleechchi uduma insa'nee Iyyoophphe'a erge.

9 Insa'nenna Langa baro me'inaa'ni Iyyophphe shinqee wodda, Pheexiroosi barrixxe jaane saate wodda hedheemmaxxe fooqe hana soodato'a iimi'a fuleemman. 10 Ookkonne wodda isi solo'weemmaxxee'e ito'aa yore. Isinna itaa qixxeesseemmate'ni hexxe'naani waleella uude. 11 Isinna uudeexxi leella iima banende'naa mitte lumoxxa naxaliinxe seemma labbaachchi shoolnge ifike kasi darree'n abideemmeexxi butti'a daggaa'naa afennen. 12 Tennee naxaliinxe seemma giddo gargari gargari hedheek shoole lekkaki biniinchi, godobik me'aachchuwwinna ci'a hexxemman. 13 Ookkonneechchi uudma, «Koo Pheexiroosi! Kexxettexxi konnera dulda'n iti!» hiyyaak haaso'i laqeme. 14 Pheexiroosinna hiisseexxxi, «Anke Goottaa! Kaddabaan; ani batto'eechcho yookaan diiqachchiisaachcho ite ege'nebe'non» hiyye.

15 «Mageni luqqi asseechcho ati batto'eechcho hiyya dandetabexxon» hiyyaak haaso'i higgeen laqeme. 16 Tinni yaane sasele iitta kaddeechchi uduma iikki naxaliinxe seemmashsha hedheechchi hirbange'ni iimi'a adhdheme.

17 Pheexiroosi tennee waleellaxxi tika maachcho hiyya'ni heduma ifikenni wixxixxi hiyyaa'naa'a Qornelewoosi ergemaaki manni qodhdha'ni Simi'oonika mine anfeexxi hulati edo uurre'eemman. 18 Insa'nenna ookkone mini hado ye'neexxi, «Pheexiroosi hiyyemeek Simi'ooni keesumummati kaba hedhee?» hina'n qorre. 19 Pheexiroosinna tennee iso'n leelliteemmaxxa yaane heda'nenge'ni Woyyichchi Hafuuri iso'n hiyyee qici, «Atee sasi manni hasa'neen. 20 Konne manna ergeenneki ante kadeennaxxee kexxe dirritettexxi mandebexxong insa'nenni welti me'i.» 21 Pheexiroosinna dirre'e ookkone manniibaa mareexxi «Hassinaa'neek manji anten; ha'noo mayeette daggineechchi?» hiyye.

22 Mannikinna, «No'oo dangeennek dhibba loliinka manna ajajammak Qornelewoosi darree'niten. Iso'o Ayihudiink manni duuchchi ulfeesa'neke Ayhudotiinke seera'ninna Mageno sagada'neeke eloke manjon. Isinna atee ifike minibaa ye'iseexxi ati hitaattoxxa laqaashsha Woyyichchi iimik erganji iso'n leelleen» hiyye. 23 Pheexxiroosi insa'nee mini'aa e'yisheexxi keesunse galche. Isi barriisanna ke'eexxi insa'nenni welti me'e. Iyyoophphe hedhaammake amanye dayyuwwinaa'ni mitti mitti insa'nenni welti me'e. 24 Langaxxa baranna Qiisaariya genne; Qornelewoosinna firuwwa ifikanna shiqika ifika jaaluwwa bukki asseexxi Pheexxiroosii'i heqqa'nemman.

25 Pheexiroosinna mini'a e'yee wodda Qornelewoosi isiba shiqe'e lekka isixxe'n ibeexxi isi'aa sagade. 26 Yaane kinni Pheexiroosi, «Iimi'a ke'i! Aniqqa atishshanni manjoken» hiyyeexxi isoo ke'isse. 27 Pheexxiroosinna isinni haaso'a'ni giddi'a e'yaa wodda heddi manni bukki hiyye'naa afe. 28 Pheexxiroosinna insa'ne'n, «Mitti Ayihudiink manji Ayihudake kadebaakenni welti afema yookaan insa'nek mine'n e'ya seeri no'oki ajajabaaxxa ha'noonni egendine'een. Yaane kinni ani ayyeenna batto'eke yookaan ca'aa hiyyekebaan hiyyabe'noshsha Mageni ane'ni leellishe'een» hiyye. 29 «Tennexxee ergitinee wodda ani waawoti hiyyebo'nongi ke'enneexxi dageennen; ha'noo qoro, anibaa ergitineechchita mayeete?»

30 Qornelewoosinna hiisseexxi hiyyee qici, «Shoole barra edo tenne yanna'ni sallaane saate'ni anke mine'ni soodata'eennan; cala cala hiteexxa seemma oddo'weeki manji dedhange'ni ani edo uurreexxi, 31 ‹Qornelewoosi! Mageni soodachcho atixxa laqe'een. Ati hiyyeeyyetee uutettexxi uwwanna qalliyyatee Mageni edo shiqe'een. 32 Iyyoophphe'a manjo ergitettexxi Pheexiroosi hiyyemeeka Simi'oonii'i ye'isi! Ta'a isi abbaayyati qarqara hedha'neeke, goga duugaake Simi'ooni hiyyemaake manjichchike mine'n keesumuma ofo'le'eeni.› 33 Tennexxe hirbange'ni erganjuwwa atibaa ani ergeneen; dagiyyo atixxinna eloxen. Mageni haasotattoshsha ajajeexxa duuchcha laqatee'e no'oo duuchchiingi Mageni edo bukki hineennen.»

34 Pheexiroosinna ke'eexxi hiyyee qici, «Mageni ayyi'anna gamisabaaxxa dhugaaten ani ta'aa hubatennen. 35 Fedheeke bogike manjonna kadoole Mageno sodaataakenna dhugaa hujaake kadoole Mageni isoo eeyyaan. 36 Mageni duuchchiingike Gootta kadeeke Yessuusi Kiristoosi darree'n Isira'eelike ardi'a ergeexxi nage'iinxi eloxxi odonna tennenden. 37 Iittanni Yohaannisi xamaqatixxee lallabeechchi uduma Geliila'naa'n Yihudake boga duuchcha'ni kaddeexxa yaane ha'noo egendine'een. 38 Mageni Yessuusii'i Naazireetika Woyyichchi Hafuurinninna hunnanni isoo harirreen; isinna Mageni isinni welti hedheemmaxxee mare geyee booncho duuchcha'n eloxxa assa'n, durriisinke baallomi hunda hedheekaaranna fayyise. 39 Isi Ayihudiinke boga'n hadi giddonna Iyyerusaalemike qachcha'ni asseexxe yaane duuchchi'a no'oo dhugaa kullannoken. Manni kinni isoo haqichchiinxe fanno'ni fanniseexxi shiye. 40 Yaane kinni sakkaxxa barra Mageni isoo'o reyotenaa'ni ke'isseexxi leellashsha asse. 41 Isi leeleeki duuchcha manjo'nite kaddebaangi, reyotenaa'n ke'eechchi uduma isinni welti indee ha'winneenneke, Magenikinna ediseenni no'oo fi'leemmakee, dhugaa kula isixxe kandeenneeke'niten. 42 Ardakee lallanbannoshshanna hedheeke'ninna reyeeke'ni muraashsha Mageni baallonseek isote kadeexxa dhugaa kullannoshsha isi umo ifingenninni no'oo ajaje'een. 43 Iso'ni amanaaki duuchchi summa isikenni cubbotixxa gattowwaali'i alfaaxxa wabeeko duuchcha isixxee dhugaa kuldaan.»

44 Pheexiroosi haaso'ande'n hedhee'naa hiyyichcho isika laqeeke manna duuchcha'ni Woyyichchi Hafuuri dirre. 45 Pheexiroosinni welti Iyyophphee'ni daggeemmaxxi Ayihudiinxi ammanye Mageni uwwa ifixxa Woyyichcha Hafuura Ayihudake kadebaake manna'ninna dhangalaasseemmaxxee mambe'a hite. 46 Tinni kaddeechchinna wele laagaduwwinni haasona'naanna Mageno galateeffanta'naa'a, insa'ne lanqemmaxxeeten. Eettene yanna Pheexiroosi hiyyee qici, 47 «Kunni manni no'oshshanni Woyyichcha Hafuura adhdheemmaxxee yoona wodi'ik xammaqemmabaashsha hoyyaak ayyete?» 48 Tennexxee insa'neenna Yessuusi Kiristoosike summinni xammaqeemmaashsha insa'ne ajaje. Ookkonneechchi uduma Pheexxiroosi insa'nenni welti shiixxoxxa barra turaashsha isoo kadhante.