1 Nage'ik abbaayyatenaa'n buttinake'n gennennechchi uduma oddooli iikki Maalta hiyyemaaxxa egennenne. 2 Konne oddola'n hedhaammak manni mambe'a hiyyissaaxxa arjumma no'aa asse. Xeeni genne'naa boojjessa'emaxxee giira ha'insheexxi no'oo keessunsine. 3 Phawuloosi haasume bukki asseexxi giirate'n uggee wodda eebbinjokenaa'n kexxeexxa buute mitte giddii'n fuldeexxi Phawuloosixxa anga iddite. 4 Maltake oddoolk manni Phawuloosixxe anga'n buute rarraate'naa afee wodda «Kunni manji manjo anga sa'a isixxi kokaken; abbaayyatike danbala'anaan nage'ik fuloolenna midde dhugaatixxe murteken hiyyemeek mageni isi hedhoti hedho'a isoo waalebaan.» 5 Phawulloosi kinni buute hargufeexxi giirate'n fixxe; mitte midhenshshanna iso'ni gelteba'a. 6 Iikki manninna «Haanonna haanota bisi isik darshuu yookaan dedhangen ibe reyuu» hiyya'n isoo heqa'neman; yaane kinni heddo yanna heqqineexxi mitte midhenshanna midde iso'n geltebaaxxa uundee wodda yaada ifika jijjirreexxi, «Kunni manjichchiqqa adana magenoken» hine.

7 Ookkone he'nennake boonchi bira Puplyoosi hiyyemaake ookkone oddolike galchallike boga hedhemman. Kunni manjichchi mine ifike'n adhdheexxi sase barra elo qico no'oo keessunseen. 8 Eettene yanna Puplyoosik anni eebbijikinna albaateeti ela gopheeman; Phawuloosinna isibaa mareexxi isi'aa soodate. Angatanna isi hana uggeexxi isoo fayyise. 9 Tinni kaddee wodda oddola ookkone'n weli dhibemeemmaki manni daga'n fayye. 10 Heddo oruwwinninna no'oo ulfeesine; insa'ne markabake'ni me'a ke'nenne wodda no'aa hasisaachcho duuchcha markabake'ni no'aa feene.

11 Sase agenjo Malta turrennelchi uduma haarso duuchcha ookkone oddola'n tureeke Isikindiriyake markaba'n ofolle ke'ne me'innenne. Kunn markab Isikindiriyake kadaa wodda isi hananna ookkone Lakko magenuwwik yookaan Diyosiqoroosike baandira hedheemman. 12 Sirakuusika qachcha genneennexxi ookko'o sase barra turrenne. 13 Ookko'n markabik me'inneenneexxi Regiyuumi hiyyemaake qachcha'ni gennenne; langaxxa barra bita'ixxi diidallo didalleessiteemmaxxee Putiyoluusika qachcha genneennek itti aandaaxxe barra'nitemman. 14 Ookkoonna amaayne dayyuwwa anfenne; insa'nenna torbaane barra insa'nenni welti turrannoshsha no'oo kadhante. Ookkonneechchi uduma Roomi'a me'inneenne. 15 Roomike qachcha'ni hedheemmak amaanye dayyuwwi no'oxxa daga laqeexxi Afiyusi Faruusi qico'ninna «Sase galduma» hiyyemaake boonchi qico'n no'oo qophedho'a dage; Phawuloosinna insa'nee afee wodda Mageno galateeffateexxi dayyeeffate.

16 Roomi e'yinnennechchi uduma Phawuloosi isoo heqaake mitte loliinke manjichchinni welti qofitinni ookkoo hedhaashsha asseme.

17 Sase barra uduma Phawuloosi Roomike qachcha'n hedhaammaka Ayihudiinka akeekisanjuwwa ye'ise. Bukki hinee woddanna insa'ne'n hiyyee qici, «Anke dayyuwwa, ani Isira'eelike ardika yookaan anke annuwwixxa aada gareertaaxxa mitte yaanenna assebe'nongi Iyyerusaalemi anee usurreexxi Roomike mannixxe anga'n anee sa'isiine une'een. 18 Roomik manni anee qoreechchi uduma reyote'e geessissaaxxa balleessa ane'ni afa gopheemmaxxee anee tola wocci asso'a hasseemman. 19 Ayihudi xaa'nee wodda kinni anxe yaane'a annaa Qeesaarii'i afeennen hiyyenne malee arda anka ku'lannoxxi yaane hexxemmabaan. 20 Ha'noo uudateenna haaso'atee ye'eennechchi tenne buutoxxeeten; ani konne haachchabinni usuremennechchi Isira'eeli'a uwwendeexxe addachchiisaxxe buutoxxeeten.»

21 Insa'nenna hiissine hine haasonee qici, «Atixxee borreessendeexxi mitte borro Yihudake boginaa'n no'o'n geltebaan. Ookkoo'n dageeke dayyuwwinna atixxee shiqiseexxi yookaan mittetinna elobaaxxi yaane hexxebaan. 22 Kaddo malee manni tenne haarooxxa amana booncho duuchcha'ni manni giba'neexxa egenneennaxxee tenne yaanexxee atiki yaadi maachcho kadeexxa lanqonna'a enaannen.»

23 Barratanna isi'a abindeechchi uduma heddo manna kandeexxi Phawuloosi hedhammake minibaa dange. Isinna gorsii'ni hashshi qico'ni Mageniinxe moottumaxxee insa'ne'n dhugaa kula'n ifisa'neemman. Yessuusixxee Muuseke seerinaa'ninna wabeekotike Maxaafinaa'n haaso'a'n insa'nee amannashsha assatee wo'laane. 24 Mitti mitti Phawuloosi hiyyemmaxxa amane adhdhe, weli kinni amaneba'a. 25 Insa'nenna weli aaga gonphemmaxxee Phawuloosinna konneechchin butti'a hedheeka muuxatika haaso'a haaso'ee wodda gargar hinge; isinna hiyyeexxi haaso'ee qici, «Woyyichchi Hafuuri annuwwa ha'nookee wabeekichcha Issayaasi darree'n haaso'ee wodda dhugaate haaso'een.

26 «‹Konne ardiba marte insa'nee hitatto qici,

«Laqa, laqa laqqinaan yaane kinni qalbeefaatinabaan;

uudatanna uuddinaan yaane kinni hubatinabaan.»

27 Tinninna kaddeechchi konne ardixxi qalbe dillote'eemmaxxeeten;

insa'ne mansha ifixxanna duuchche'ne'eemmaxxeeten;

ille ifixxanna himmi asse'ne'eemmaxxeeten;

Iittate kada gophee'ya ille ifixxenni anfeexxi,

mansha ifixxenni lanqeexxi,

qalbee ifixxenninna qalbeeffanteexxi

hinge'naa silat ani insa'nee fayyisannan.›

28 «Tennexxee Mageniinxi anjira Ayihudake manna kadebaake manni'a ergendeexxa egendino'a eeyyannen; insa'nenna lanqaan!» 29 Tennee haaso'eechchi uduma Ayihudiinki manni jaba qico weli anni weli moroma'n me'e.

30 Phawuloosinna lame wogga duuchcha kireeffate'eemake mine'n ofo'lee; isiba'a daga'aammaka manna duuchchanna gammsahshot keesunsa'nemman. 31 Ayyinna isoo hoyya'nebaangi Mageniinxa mootumma lallaba'n Gootta Yessuusi Kiristoosixxee lumooshsha ifisee barachchiisa'nemman.