1 Aphiloosi Qorontoosi hedhema wodda Phawuloosi alike bogi giddii'n sa'eexxi Efesooni'a dage. Ookkonna heenooxxa hordofeeyye afeexxi 2 «Amandinee wodda woyyichcha Hafuura adhdhitineema'a?» hiyyeexxi insa'ne qore. Insa'ne kinni «Waawo'o, Woyyichchi Hafuuri hedheexxa midde lanqe'e egenebe'non» hine hiisine haasonne.

3 Phawuloosinna «Heene xammaqemanni xammaqendineemmata?» hiyye qore; Insa'nenna «Yohaannisixxe xammaqanite» hineexxi hiissine haasonne.

4 Phawuloosinna «Yohaannisixxi xammaqa aadde aagatixxe xammaqamman; Yohaannisi ardake'n, ‹Ani udumi'a dagaake'n amanne!› hiyya'emmam; isinna Yessuusiten» hiyye.

5 Tenne lanqee wodda Gootta Yessuusike summinni xamaqemme. 6 Phawuloosi anga ifixxa insa'ne hana uggee wodda woyyichchi Hafuuri insa'ne hana dirree'naa wele laagadinni haasonne; raagakanna haasoonne. 7 Iikki manninna tommenna lamii qicomman.

8 Phawuloosi Ayihudiinke magenoonfachchotike mine'ni e'ya'n Mageniinxe mootummaxxee inse'nee moroma'ninna amanichchiinsa'n sase agenjo duuchcha soda'a belo haso'nemman. 9 Yaane kinni mitti mitti murumi hiyye amanaake kadeexxi Goottiinke ora ardi edo boshshina'emman; tennexxee Phawuloosi insa'nenaa'ni gargar hige me'e; Hordofeeyyetanna qofitinni adhdheexxi Xiraanoosike barachchotike galmi giddo barra barra'n insa'nee barsiisa'n insa'nenni welti haaso'a'emman. 10 Phawuloosinna tenne iitta asseek lame wogga'nitemman; tennexxee Issiyake aurajja'n hedheemmake Ayihudikinna Girkeek manni duuchchi Goottiinka hiyyichcho laqa dandeenne.

11 Magen Phawuloosixxe anga'n maso mambe'uwwa huja'nemman. 12 Tennexxee Phawuloosika biso tuqqeexxa seemmanna maarrabe ela gepheeke manna'n iyyemarraa wodda iikki ela gophpheeki manni dhukubakenaa'ni fayyya'nemman; fuggichchi hafuuruwwinna insa'nenaa'n fulaa'nemman. 13 Fuggichcha hafuuruwwa fulcha'ni booncho booncho'n maremaammake Ayihudiinke manni giddii'n mitti mitti, «Phawuloosi lallabammake Yessuusike summinni fuldinaashsha ha'noo ajanja'ennen» hiyya'ni fuggichcha hafuuruwwa mannakenaa'n fulchatee wo'laana'nemman. 14 Ayihudiinke umo qeesichcho kadeeke Asiqewwaxxi labbaxxi torbaane oosenna tennende assitaamman. 15 Fuggichchi hafuurinna, «Yessuusi ege'neennen; Phawuloosinna ege'neennen; ha'noo kinni ayeera?» hiyye.

16 Fuggichcha hafuura afeemaki manjichchi insa'ne'ni utaale hudhe abideexxi duuchchinga injifate. Insa'nenna maddoneexxi duuwwinni minii'ni baanje fulle. 17 Tinni yaane Efesooni hedhemmake Ayihudiinke manna'ninna Girkeeke manna'n laqendee wodda duuchchiinge'n soda'a galde. Gootti Yessuusik summinna lumo qico ulfeesseme. 18 Amanyet giddi'ni heddi manni dagga'ni hujemmaxxa ifixxa cubbo ifise faaci'a'n danga'emman. 19 Heddi moraamaak manni morotika ifi ifika maxaafuwwa bukki assine iyyedangeexxi ardi edo giirate'n gube. Ookkone insa'neke maxaafuwwi hir hedemaa wodda onde tomme kuma birret sibljo kade. 20 Konne qicinni Goottiinki hiyyichchi hunnati ba'lata'ninna injifata'n me'a'nemman.

21 Tinni duuchcha kadeechchinni uduma Phawuloosi Meqedooniyaanii'ninna Akkaayiyaa giddii'n sa'eexxi Iyyerusaalemi'a me'o'a irrik mudhdheexxi «Ookko geyeennechchi uduma Roomika qachchanna mare uuda anee hasissaan» hiyye. 22 Tennexxee ifike erganjuwwinaa'n lame Ximotoosinna Erasixoosii'i Meqedooniya'a ergeexxi isi ifi'a Issiyake awuraajji giddo shiixxoxxa yanna ture.

23 Eettene yanna Goottiinke orixe buuto'a jabaxxi weekensha kexxe. 24 Dimexiroosi hiyyemaak birretika sibljo tumaammak manjichchi Arxemisike galmixxa misile giissa'n tumammake manni'a yo'osha lumooxxa la'o afisa'emman. 25 Tennexxee kunni majichchi kone tumammaka mannanna tenne labbaaxxe wele huje'n bobba'eeka manna bukki asseexxi hiyyee qici, «Koo manna no'o maallaqa alfinaannek tenne hujennite kaddeexxa egendine'een. 26 Phawuloosi hiyyema'neek kunni manji ‹Manjiinxi anga hujjeexxi misiluwwa magenuwwakebaan› hiyya'n Efesoonike qachchi giddo calla kaddebaangi heenooko bogi gadhi darre malee Issiyake awuraajja duuchcha'ni hittee qico arda barachchiise dedhiseexxa ha'no umo ha'nongenninni uudineexxenna laqqineexxen. 27 Tenne huje no'oxxik elok summi ba'a calla kaddebaak Issiyake auraajji duuchchinna butta duuchchi isee magenoonfanta'neexxi Lumoki Arxemisik galmi tola gataake kadaan; iittanni isek ulfinninna tola gataan.»

28 Mannikinna tennee laqee wodda mufateexxi, «Efeesoonixxi Arxemisi lumoxxen» hiyya'ni cance. 29 Iikki qachchi duuchchi weekeme; ardikinna Meqedooniyake bogika manna Phawuloosinni welti me'a'emmaka isika jaaluwwa Gayiyoosinna Arsixirokoosii'i, abinde'e harkinsaa'ni ardi bukki hiyyamma boonchi'a gongine. 30 Phawuloosinna umo ifingenninni ardiinbaa maro'a hassee wodda hordofeeyye marabaashsha isoo hoyyite. 31 Phawuloosike jaaluwwa kade'eeke Isiyyake bogike akeekisanjuwwanaa'ni mitti mitti manjo ergine, «Iittanna ookkone geebo da'wantammaxxe bakkaba'a marabaashsha» Phawuloosii kadhdhate. 32 Ardiinxe oddo'n raanki lumook hedhemmaxxee bira sa'aak manni mayye'e ookko bukki hiyyemannixxa egenemmaba'a. Mitti, mitte yaane hiyya'ni cancaa wodda, weli wele hiyya'nee canca'emman. 33 Ayihudiink manninna Isikindir ardiinxe oddonaa'n dhiibeexxi edi'a sa'issee wodda ardi giddii'n mitti, isi insa'nee'a haaso'aashsha cancine; isinna insa'ne'a moromo'a haseexxi insa'ne sammi hino'a angati qiphe. 34 Yaane kinni Isikindiroosi Ayihudichchoke kadeexxa ardi duuchchi ege'nee wodda «Efeesoonixxi Arxemisi lumooxxen» hiyya'ni lame saate qico'ni duuchchingi mittenba cance.

35 Udumi giddii'n ookkone qachchiinke umik borreesanji ke'eexxi arda sammi asseexxi hiyyee qici, «Ha'no Efeesoonik mannaa lumoxxe Arxemisik galminna iiminaa'n daggeexxe isixxe misilek heqanji Efeesoonke qachchike arda kadeexxa ege'nebaaki aayyete hedhe? 36 Tenne'e ayyinna moromaak hedha gopheexxenni, ta'a ha'noo sammi hitinaashshanna mitte yaanenna wiinamik assatenaa'n ifi heqqedha ha'noo haasissaan. 37 Galma saamebaakanna no'oke mageno Arxemisi'n yowwichiinka afo'o fulchedhebaaka manna abidine kaba idagineen. 38 Dimexiroosinna isinni welti hedheek tumatixxe ogek manni ayye'ninna ku'la afeexxe kaddoole murttek minni banake; baaloomiiki manninna hedheen; ookkonna ku'la dandenaan. 39 Tenneeri gadhi darre shiqishino'a hasina'neexxi wele yaane hexxeexxe kaddoole isee ardinxe songo'n uudendaan. 40 Iittate kada gophphoole telcho kadeexxe weekensha buutoxxe ku'lemanno hinee sodaantanon; tinni weekensha mayee kadde hiyyemme qoremmonnole buutote kadaaka godisaaka yaada afa gonphaannaxxee geyaaka hiissichcho hiissa dandeennabe'non» 41 Tenne hiyyeechchi uduma ookko bukki hiyyeemmaka manni xeeremmaashsha asse.