1 Phawuloosi songotika manna dhaphphi hiyye uudeexxi hiyyee qici, «Anke dayyuwwa! Telchi qico'ni ani Mageni edo eloxxe sammonni ergateme'eennen.» 2 Hanaaniya hiyyemaak qeesetik umi qeesichchi Phawuloosi bira uurreemmaki manni Phawuloosika afo'o gannashsha ajaje. 3 Eettene yanna Phawuloosi Hananiya'a, «Koo ati bada nooriki isendeexxe gimoshsha hexxeteek! Ateenna Mageni ganna ganaan! Seeriinke orinni ane'n murtottaa ofoldeenni hexxe'e, seeri belo ane ganisiiseettaxxee atinni seera diigeeten.»

4 Ookko Phawuloosi bira hedhemmaak manni Phawuloosii'i, «Ati Mageniinxe qeeseka umo qeesichcho yowwitebexxootaa?» hiyye.

5 Phawuloosinna «Anke dayyuwwa, qeesetike umo qeesichcho kadeexxa ege'neennabaan; ‹Atike ardike sooreessuwwa'n fuggoka haaso'a fulchexxoxxe› hiyyende borreesende'een.»

6 Ookko hedheemmak manni gamisi Seduuqito gamisi Feerisitote kadeexxa Phawuloosi ege'neexxi, «Anke dayyuwwa, ani Feriisichchi i'leeke Feriisichchon; ani ta'a murtetee shiqeennelchi reyyek mannixxa ke'a'ni adde afennexxeeten» hiyya'n songotike ya'i giddo hafuura gikki asse haaso'e.

7 Phawuloosi tenne hiyyee wodda Feerisitotixxenna Seduuqitotixxe oddo'n moronsha kexxeenaa'a songotik ya'i lameba qoodeme. 8 Seduuqito, «Reyotinaa'n ke'aa hexxebaan, ergannatinna hexxebaan, hafuuruwwikinna hedhebaan, hita'neexxeran; Feerisito kinni kunnichchi duuchchi hedheen» hita'nee amandaan. 9 Tennexxee canci jabak ke'e; Feerisitotenaa'n mitti mitti Muuseke seerk barachchiisalluwwi ke'e uurreexxi, «No'o konne manjo'ni mitte elobaaxxa yaane anfebe'noni; hafuuri yookaan iimik erganj iso'ni haaso'eexxe kaddu, no'o egennannota?» hiyya'n morome.

10 Loli eebbaa'ni me'emmaxxe'e ajajalli Phawuloosii ninniffaanxee sodaate; tennexxee loliinka manna aade maritineexxi manniinxe oddonaa'ni Phawuloosi'i buttine fulchitineexxi loliinke mannixxe kaanbe giddo iidagaashsha ajaje.

11 Langaxxe barraxxa hashsha Gootti Phawuloosi bira uurreexxi «Jabaati! Iyyerusaalemi'n dhugaa ani'a kuldetteshshaani, iittanni Roomike qachcha'ninna ani'a dhugaa kuldattoni» hiyye.

12 Langaxxe barraxxa gorsa Ayihudiink manni bukki hiyyeexxi shokkoti, «Phawuloosi'i shinnebe'nok midhatanna indabe'no wodde'ekanna ha'winabe'no» hiyyeexxi kakate. 13 Konne diinaa'ni weli ageeke mannk laakkoosi shoole tommenna'ni sa'eekema'a. 14 Insa'nenna qeesetike akeekisanjuwwibaanna geedhetiba marreexxi hinee qici, «Phawuloosi'i shinnebe'nok midha wode'e no'oke afo'inni manqabe'noshsha kakanteenen. 15 Yoona ha'noo songotike ya'inni welti hexxinee isoo hudhudhdhi assiitineexxi qortine qo'nissina'neeshsha assati Phawuloosii ha'noobaa iyyedagaasha ajajallo laqqe; No'oo isi kaba geyyebaa edi darre isoo shinnona'a qixxeeffanteennen.»

16 Yaane kinni Phawuloosixxe dayyoki belti shokko tenne'e laqe'e lolinke mannixxe kaanbe'n mareexxi Phawuloosi'ni kule. 17 Phawuloosinna dhibba lolinka manna ajajamakerranaa'ni mitte ye'eexxi «Kunni belti lolinka mannike ajajalo'n haaso'a'neexxe yaane hexxeni, isiba'a shiqishshi!» 18 Iikki dhibbink ajajalli ookkone belto ookkone bagedo ajajammakibaa iyyemareexxi iso'n, «Iikk useremammak Phawuloosi anee ye'eexxi kunni dargaggeessi ate'n kula'neexxe yaane hexxemmaxxee atiba'a isoo shiqishanoshsha anee kadhateen.» 19 Lolinka manna ajajammakinna ookkone dargageessixxa anga abide qofibaa gamake'n isoo hiisseexxi, «Ane'n kuldota'a hassaattexxi yaane maachcho?» hiyye isoo qore.

20 Iikki beltinna hiyyee qici, «Ayihudiink manni Phawuloosixxa yaane hudhuudhdhi asse'e qore qo'nissa'neeshsha fakkeeseexxi soodo ati isoo songote'n shiqishshatoshsha atee laqo'a weli aage'een. 21 Tennexxee insa'ne hinaaxxa ishshi hitoxxee; tinninna kaddeechchi insa'ne giddii'n Shoole tommenaa'n sa'aaki manni isoo shiyatee orake'n ripheexxi isoo heqate'n hedhemmaxxeten; iittanni isoo shinaa qico'n midhdha wode afo'oke'n maqa gophatee kakante'een; ta'anna qixxeefanteexxi atike hiissicho heqedhate'n he'neen.»

22 Loliinka manna ajajammakinna konne belto «Ane'ni kuldettexxa tennee yaane mitteke'ninna kuldoxxe'e!» hiyyexxi isoo me'ashsha asse.

23 Ookkonneechchi uduma ookkone dhibba loliinka manna ajajaammakerinaa'ni lame ye'eexxi hiyyee ajajee qici, «Dokko hashshixxa sase saate kadaa wodda Qiisaariya'a me'aaka lame dhibba loliinka manna, torbaane tomme fadhadik lolaaka mannanna lame dhibba bagedik lolaaka manna qixxeesse. 24 Phawuloosi'anna fadhachcho qixxeesitineexxi boga galchallo Filkisibaa nage'ik geyaashsha asse.»

25 Isinna hiyyeexxi borreessa borreesee qici, 26 «Qelaawudewwoosii'i Luusiyoosikenaa'n Ulfeesendeetteka bogiinka galchallo Filkisi'aa, nage'i ati'aa kadowwaal. 27 Konne manjichcho Ayihudiink manni abide shiyo'atemman; ani kinni isi Roomike manjo kadeexxa ege'neennaxxee anke sannachchinni welti dhaqabennexxi isoo gatiseenneni. 28 Mayee isoo ku'lineexxa ege'nonnaa haseneexxi insa'neexxe songobaa isoo shiqisheennan. 29 Isoo ku'lineechchi kinni seera insa'neeka uudaaxxe yaane'ate malee reyotee yookaan usurrakee isoo geessissaaxxi yaane hexxeebaaxxa wo'menne. 30 Konne manjo shiyatee shokko assineexxa laqenne wodda hirbangee'ni atibaa isoo erigeenneni. Isoo ku'leemmaki manninna ati edo dageexxi isoo ku'laaxxa ku'la shiqishaashsha insa'ne'ni kuleeneen.» 31 Tennexxee loliink manninna ajajememma qicinni Phawuloosi'i hashshaani aadhe iyyemareexxi Antiphaxiriisike qachcha'n geessise. 32 Langa baro loliinki manni Phawuloosi'i fadhadiinke loliinke manninni welti me'aashsha asseexxi kaanbeti'ba illee iima hige. 33 Kunni fadhadhiink loliinik manninna Qiisaariya geyee wodda eettene borronna bogiinke galchallo'n uwwa'n Phawuloosii isi edo shiqishe. 34 Iikki bogiink galchallinna borro haasoseech uduma Phawuloosi'i «Ati hoone awuraajinaa'nite?» hiyyeexxi qore; Kilqiyake awuraajike manjo kadeexxanna ege'nee wodda, 35 iso'n, «Atixxa yaane ate ku'leek manni daggaa wodda laqannon» hiyye. Ookkonneechchi uduma Phawuloosi Heerodisike mootummatike dalla'i giddo heqqemaashsha ajaje.