1 Ookkonneechchi uduma Phawuloosi Ateenake qachchanaa'ni fuleexxi Qorontoosi'a me'e. 2 Ookkonna Phanxoosike bogika Aqila hiyyemaaka mitte Ayihudichcho afe, isinna Roomik lumok moyanji Qelaawudewwoosi, Ayihudiink manni duuchchi Roomike qachchanaa'n fulaashsha ajajemmaxxee Aqila are ifixxe Phirsiqilanni welti reefi Ixaaleyiinke boganaa'n dangeemman. Phawuloosinna insa'ne'e uudo'a mare. 3 Phawuloosixxi huje insa'neshshanni duunkaana gobate kaddeemmaxxee insa'nebaa hedha'ni insa'nenni welti huja'nemman. 4 Edi Sanbati Sanbati baro Ayihudiinke magnoonfachchotike mine'n afema'n Ayihudiinkanna Girkeeka manna amannaashsha assate wo'lana'nemman.

5 Sillaasinna Ximotoosi Meqedooniyanaa'n dangee wodda Phawuloosi «Yessuusi isi Kiristoositen» hiyya'n Ayihudiinke manna'n cichche lallaba'n yanna ifixxa duuchcha barsiisate'n sa'isa'nemman. 6 Ayihudiink manni kinni Phawuloosi'i gareeree yowwe wodda seemma ifixxa hargulfa'n «Yoona gibineexxenni ha'no'n geltaxxe yaane duuchchi laaqendinaak hano'nden; ani laqemannoxxi yanne hexxeba'a; yoona ta'inni edi'a Ayihudake kadebaake manniba'a me'annon» hiyye. 7 Ookkone boonchonaa'n fuleexxi Ayihudiink magenoonfachchotike mini bira hedhemmake Titosi Iyyosixxoosi hiyyemaake manjichchike miniba'a e'ye. Kunni manjichchi Mageno magenonfatammakemman. 8 Qersiphoosi hiyyemaaki Ayihudiinke magenoonfachchotike minik sooresi ifike mini hadi duuchchinninni Goottake'ni amane. Heddi Qorontoosik manninna Phawuloosi haaso'aa wodda laqe amaneexxi xamaqeme.

9 Mitte hashsha Gootti Phawuloosi'n waleellati, «Mee sodaat haaso'i malee ca'li hitooxxe'e!» hiyye. 10 «Ani atinni welti hedhennaxxee ayyinna ate'n ke'eexxi miidhensha ate'n geessisaak hedhebaan; ani konne qachcha'n heddo arda afe'ennen» hiyye. 11 Tennexxee Phawuloosi Mageniinka hiyyichcho ardake'n barsiisa'ni mitte wogganna gamisa ookko ture.

12 Galiyoosi Akkaayiyaaka boga galcho'a hariiremee wodda Ayihudiink manni mitteba higeexxi Phawuloosi'ni ke'e; murtetixxe songobanna iyyemareexxi, 13 «Kunni manjichchi seeri uwwabaake orinni manni Mageno magenoonfantaashsha assa'neen» hine. 14 Phawuloosi haaso'o'a qixxeefateeke'n Gaaliyoosi Ayihudiinka manna hiyyee qici, «Ha'no Ayihudiinke manna ku'la ha'nooxxi hujendeexxe balleessatixxe yookaan wonjalinxeete kadde'ele ossunteti caqasannan. 15 Yaane kinni ha'noxxi moronsha hiyyichchuwwiinxe, summuwixxeenna ha'noke seerixxee kaddemmaxxee ise ha'no birre; ani iitta hexxeexxe yaane'ni murte muronna'a hasabe'non» hiyye. 16 Tenne hiyyechchinni uduma insa'nee murtetixxe songo edii'n fulche. 17 Eettene yanna insa'ne duuchchiingi Soositensi hiyyemaaka Ayihudiinke magenoonfachchotike minika sooresa abindeexxi songoti edo ganne. Iitta assinna wodda Gaaliyoosi mittechchishshanna uudebaan.

18 Phawuloosinna heddo barra Qoroontoosi ofo'le; ookkonneechchi udma amanye dayyuwa'n «Nage'ik hedhdhe» hiyyeexxi Phirsiqilanninna Aqilanni welti lumoxxe hobolonni Sooriya'a me'e; wereegeek wereeg hedheemmaxxee Kinkira'oosi hiyyemaake booncho'n umo haaxxe. 19 Efesoonika qachcha gennee wodda Phirisiqilanna Aqilaa'a ookkonni waale. Isi kinni Ayihudotinke magenoonfachchotike mine'ni e'yeexxi Ayihudiinke manninni welti haaso'a'nemman. 20 Insa'nenni welti qeerraaxxa yaana turo'a kadhantee wodda isi eeyyeba'a. 21 Yaane kinni «Mageniinxe fedhii kaddoole wele wodda ha'noba'a illee iima higeeneexxi dagannooni» hiyye. Ookkonechchi uduma lumoxxe hobolo'ni ofo'leexxi Efesoonii'n fuleexxi me'e.

22 Qiisaariya geyyechchi uduma ookko'ni Iyyerusaalemi mare; amaanye nage'a aadheechchi uduma illeema higeexxi adadde Antsookiya'a me'e. 23 Ookkonna shiixxoxxa yanna tureechchi uduma ookko'n ke'eexxi Gelaatiyakenna Firgiyake boguwwi giddo mitte boonchinaa'n mittinba'a mammarema'n hordofeeyye duuchcha jajjabeesse.

24 Isikindiriyake qachchik ilemeek Aphiloosi hiyyemaake Ayihudichchi manjichchi Efesooni'a dage. Isi barateekenna Woyyichcha Maxaafixxa qunxu asse ege'neemmakemman. 25 Kunni manjichchi Goottiniinka ora barateek, Yessuusixxee toggi asse haaso'ammakenna ifinge irrinni barsiisa'emmakemman; kaddo malee isi ege'nemalchi Yohaannisixxe xamaqa callamman. 26 Ayihudotinke magenoonfachchotike mine'ninna soda'a belo haaso'ate'n ke'e; Phirsiqilanna Aqila isixxa lanqee wodda kinni ifike mine'ni adhdhine me'ineexxi Mageniinka ora edi irra toggi assine iso'n ifinse. 27 Aphiloosi Akkaayiyaa'a me'o'a hedee wodda amaanye dayyuwwai isoo jajjabeese; ookko hexxeexxi hordofeeyye isoo eloo qico adhdhi taashshanna borro isi'a borreesinne.

Isi ookko mareexxi geyechchinni uduma Mageniinke badhaadhinni amaneeka manna lumo qico gargaaremman. 28 Tinninni kaddeechchi, woyyichchi maxxafinaa'n hiyyichcho ifisa'n Yessuusi, isi Kiristoosite kadeexxa Ayihudiinke manninni jaba qico moroma'n insa'nee injifata'emman.