1 Hordofeeyyetik laakkoossi bira sa'a'ni me'eexxe eettene yanna'n Girkeeka afo'o haaso'ammak Ayihudiik manni, Ayhudiike boga'n ilemeeke Ayihudiike manna'n maamuqate'n ke'e; tinninna kaddeechchi barra barrande'n qoondemmake gargaarsa'n hiyyeettuwwa insa'nexxa miincemmaxxeeten. 2 Tennexxee tommenna lamiinxi ergameeyye wele hordofeeyye bukki assiteexxi hitee qici, «No'o ita qoodatee hinennexxi Mageniinka hiyyichcho barsiisatixxa no'oxxa huje waala hasissabaan. 3 Tennexxee no'oke dayyuwwaa, eloke adaba insa'nekenni ege'nemeeka Woyyichchi Hafuurinninna beekumik wo'meeka torbaane manna ha'no giddii'ni fille; insanee tenne huje'a baallonsinannon. 4 No'o kinni soodachchote'ninna Mageniinka hiyyichcho barsiisate'n siinnannon» hine.

5 Kunni haaso'i duuchchiinga gammachchiise. Tennexxee insa'ne amanatinna Woyyichchi Hafuuri iso'n wo'meeka Isxifaanoosii'i, Filiphphoosii'i, Phirokoorosii'i, Niqaroonaa'a, Ximoonaa'a, Phermenaaninna, iittanni Yihudummatiba'a jijjiremeemmaka Antsookiyichcho Niqolawoosii'i fille. 6 Insa'neenna ergameeyyeti edo uurrisee'naa'a, ergameeyye konne manni hana anga uggurte soodatte.

7 Konne qicinni Mageniinki hiyyichchi ba'lataa'ni me'e; Iyyerusaalemi giddonna hordofeeyyetik laakkoossi yo'oshsha bira sa'a'ni me'e; heddo qeesenna amande.

8 Isxifaanoosi badhadhikinna hunnati wo'meexxi mambe'inxa yaanuwwanna lumollamma beessisa ardi giddo assamman. 9 Ookkone wodda leexa fulatike hiyyemaake Ayihudiinke magenoonfachchotike mini manninaa'n Qereenaa'ninna, Isikindiriyaa'n, Kilqiyaa'ninna Issiyaa'n dageek Ayihudiink mitti mitti manni Isxifaanoosii'i gibati moromate'ni ke'e 10 Yaane kinni Isixxifaanoosi haaso'o'a uwwemeemmaka beekumanna Hafuura injifata dandeennebaan. 11 Ookkonneechchi uduma insa'ne, «Kunni manjichchi Muuseenna Mageno yowwa'naa lanqeennen» hiyyaaka manna sho'ik ke'issine. 12 Tennexxe insa'ne arda geedhetanna Muuseke seerika barachchiisalluwwa ke'issine; Isixxifaanosibanna mare isoo abindeexxi songotibaa iyyedange. 13 Ookkonneechchinni udumi'a insa'nenna iso'ni dharik dhugaa kulaaka mitte mitte manna aaneexxi dange; dharik dhugaa kulaammak manni hinee qici, «Kunni manji konne Woyyichcha Galmanna Muusseka seera duuchchi wodda yowwaan. 14 ‹Kunni Naazireetik Yessuusi konnee Woyyichcha Galma diigan; Muuse no'o'a uwwemmaxxa aada jijjiraan› hiyyaa'na'aa lanqeennen» hine. 15 Ookkonne wodda songote'ni ofo'lemmaaki manni duuchchi Isixxifaanoosii'i dhaphphi hiyyeexxi uudaa wodda albi isiki iimike erganjinke albishsha hedhe'naa uude.