1 Barra mitte Pheexiroosinna Yohaannisi barrixxe salaane saate'n soodachchotixxa yanna Woyyichchi Galmiba'a me'ina'nemmani. 2 «Dancha Hula» hiyyendaaxxe Woyyichchi Galmiixxe baxxe'ni mitti ilemeexxenni naafake kadeemmaki manjichchi hedhemman. Manni barra barrande'ni isoo iyyedagaa'ni ugga'naa isi ookko ofo'leexxi Woyyichchi Galmibaa e'yaake manninaa'ni maallaqa kadhata'nemmani. 3 Kunni manjichchi, Pheexiroosinna Yohaannisi Woyyichchi Galmi giddi'aa e'yinaa'naa uudeexxi maallaqa insa'nee kadhate. 4 Pheexiroosinna Yohaannisishshanni isoo dhaphphi hiyye uudeexxi, «Koo no'obaa uudi!» hiyye. 5 Isinna uuna'neechcho hedheenni hiyya'ni insa'nee dhaphphi hiyyexxi uude. 6 Yaane kinni Pheexiroosi «Ani birreti sibiljonna worqe afebe'non; afeneechcho kinni ati'a uwwaannen; Naazireetike Yessuusi Kiristoosike summinni kexxettexxi maremi!» hiyye. 7 Ookkonneechchi uduma isinna isixxa middixxa anga abideexxi isoo ke'isse; hirbangge'n lekka isixxinna mikiti isiki jabaate.

8 Isinna qophphi hiyye ke'eexxi lekka iifixxenni uureexxi maremate'ni ke'e. Ookkonneechchi uduma isi insa'nenni welti Woyyichchi Galmi giddi'aa e'yeexxi marema'ninna utaala'ni Mageno galatefata'nemman. 9 Ardi duuchchi isi marema'naanna Mageno galatefata'naa afe. 10 Mannikinna Woyyichchi Galmixxe hula bira, «Dancha Hula» hiyyemmaammaba ofo'leexxi maalaqa kadhataammaki isote kadeexxa ege'neexxi iso'ni kaddeexxe yaane'ni massote, mambe'a hiyye.

11 Fayyemmaki manjichchi Pheexiroosinaa'ninna Yohaannisinaa'n gargar higabe'noni hiyye'naa manni mambe'a hiyyeexxi, «Mammarenshatixxe Solomoonixxe soro» hiyyemaaba'a insa'nebaa gonge mare. 12 Pheexiroosi konnee manna uude insa'nee hiyyee qici, «Ha'no Isira'eelike mannaa! Tenne yaane'n mayee mambe'a hitina? Mayee no'oo hubatine uudina? No'o, no'oxxe hunnaanni yookaan no'oxxe eloxxe hujeni kunni manjichchi mammaremaashsha assinennelcho ha'no'n fakkaata'nee? 13 Abirihaamik, Yisaaqik, Ya'iqoobik Mageni no'oke annuwwiki Mageni, belto ifika Yessuusi'i ulfeese'een. Ha'no kinni isoo Philaaxoosi edo sa'issitineexxi uutineen. Philaaxoosi isoo wocci asso'a hassee wodda midde Hansabe'no hitineen.✝ 14 Ha'noo ookkone Woyyichchanna qullichcha Hansabe'no hitineexxi manjo shiyeemmaka manjichcho ha'no'a tikaashsha Philaaxxoosii'i kadhatineen.✝ 15 Ha'noo ookkonee hedho uwwaka shiltineen. Mageni kinni isoo reyotenaa'ni ke'isseen; tennexxee dhugaa kula no'ote. 16 Kunni uudina'neekinna egendineek manjichchi fayyeexxi jabeenna alfeechchi Yessuusike summa'ni amanatiten. Ha'no duuchchingi uudina'neeshshanni fayye ca'aayaashsha asseek Yessuusike summanna isi darree'n afendaaxxe amanan.»

17 «Ta'anna anke dayyuwwaa! Ha'nonna ha'noke sooresuwwishanni haakiti Yessuusi hana tennee hujineexxa ege'neennen. 18 Mageni kinni isike kadeek Kiristoosi rakko adhdhaaxxa ediseexxi wabeek duuchchike afo'o'n haaso'eemmaxxa muuxedheen. 19 Cubbo ha'nooxxi ansheendeexxi baxxo'aa aadde aagineexxi Magenbaa illee iima higge. 20 Yoona Goottik hafuura adhdhitinaaxxi bara ha'no'aa daggaashsha Mageni edise ha'no'a fileemeeka Yessuusi Kiristoosii'i ergaan. 21 Isi iimate'ni turaak Mageni ediseexxi ifixxe Woyyitte wabeekoke afo'o'ni haaso'emashshanni butta duuchcha haaronsaa qici'aaten. 22 Muusenna hiyyeemma qici, ‹Gootti Mageni ha'noki anee ke'iseemmasha iittanni ha'nooke dayyuwwi giddii'ni wabeekichcha ha'no'aa ke'issaan. Isi hiyyaaxxa yaane duuchcha laqqe.✝ 23 Fedheek manji kunni wabeekichchi hiyyaaxxa laqabaaki Mageniinke ardi giddii'ni gargari higgeexxi kuttemowwaal.›✝

24 «Saamu'eelinaa'n saffee kexxeemmaxxi wabeeko duuchchi konne barixxee haasote'een. 25 Ha'noonna wabeekotixxe ooseen; iittanni Mageni Abirihaamii'i, ‹Horte atixxenni buttatik arduwwi duuchchi eebbisemaan› hiyyeexxi aageemmaxxa kako dhaaldinaakeeran.✝ 26 Tennexxe Mageni belto ifika ke'isseexxa yanna mitte mitte ha'nonga fuggo ha'noxxenaa'n illeema hiisseexxi ha'no eebbiso'a ediseexxi isoo ha'noba'a ergeen.»