1 Iqoniyoonike qachcha'n Phawuloosinna Barinnaabasi welti Ayihudiinke magenoonfachchotike mine'ni e'yine. Insa'nenna ookko hasissaa qico barachchiinseemmaxxee Ayihudiinkenaa'ninna Girkeeke manninaa'n heddi amane. 2 Yaane kinni amanebaaki Ayihudiink manni Ayihudake kadebaaka manna diiniki duuchchiisseexxi ammaanye dayyuwwa gibaashsha asse. 3 Tennexxe Phawuloosinna Barinnaabaasi Goottiinxee afo'o wo'mine haasonna'ni ookkoo lummooxxa yanna turre; Goottikinna mambe'uwwakanna beessisuwwa anga insa'nexxe'ni huja'n, ifike badhaadhiike hiyyichchiixxa dhugaalessumma kokeessa'nemman. 4 Qachchiinki manni kinn lameba qoodemeexxi gamisi Ayihudiinke manninni welti, gamisi ergameeyyet welti hige.

5 Ayihudake kadebaak manninna Ayihudiink manni ifi fike soorrsuwwinni welti mitteba higeexxi Phawuloosiinna Barinnaabaasii'i geebe geeraro'aanna kinjik cancaqo'a hase. 6 Yaane kinni insa'ne lamingi tenne egenee wodda Lisixxiranna Derbe hiyyemake Liqa'ooniyake qachchuwwiba'aanna qarqarake'n hedheeke bogiba'a baanje. 7 Insa'nenna ookko wengeele lallanbe.

8 Lisixxirake qachcha'ni lekka goge'eeki mitti manjichchi hedhemmaan. Isi ilemeexxeninni naafake kadeemmaxxee lekkati me'exxi ege'nemmabaani. 9 Phawuloosi haaso'amma wodda isi ofo'le caqasa'nemmani. Phawuloosinna konne manjichcho dhaphphi hiyye uudeexxi isoo fayyatee geessissaaxxa amana afeexxa uudee wodda, 10 hafuura gikki asseexxi «Toggi hitettexxi lekka atixxenni uurri!» hiyye. Manjichchikinna qophphi hiyyeexxi tarikafata'ni me'ate'ni ke'e. 11 Manni tennee Phawuloosi asseexxa yaane uudee wodda hafuura gikki asseexxi, «Magenuwwi manjo fakkaateexxi no'obaa dirre'een» hiyya'n ifike Liqa'ooniyake laagadinni haaso'e. 12 Insa'nenna Bernabaasii'i «Diiyya» hine summa fulchine. Umi haaso'alli Phawuloosite kadeemmaxxee isoo «Hermeen» hine. 13 Qachchii gadhdhi darre hedheeke Diiyyake Galmik qeesichchi jiboottattanna daraaro ookkone qachchixxe hulaba'a iyyedageexxi ardik welti Phawuloosi'anna Barinnaabaasi'a tolcho'a hase.

14 Ergameeyye Phawuloosinna Bernabaasi tennee yaane lanqee wodda seemma ifi ifixxa yaadoti darreexxi raara'ni ardiinbaa gongineexxi, 15 «Koo mannaa! Mayyee tennee assitina? No'oqqa ha'nooshshaanni manjoken. No'o kaba dangeenneelchi ha'noo tenne dhariinxe yaane duuchchanaa'ni bayyatineexxi iimatanna butta, abbaayyaatanna ise giddo hedheechcho duuchcha dadeeke hedhoke Mageniba'a higginaashsha eloxxa odo ha'no'n kullonna'aaten. 16 Isi sa'eeke baruwwa'n gosa gosak ardi duuchchi ifi ifinge ora'n me'aashsha waaleen. 17 Kaddo malee isi hitta hedheeke arjaa Mageno kadeexxa dhugaa kuldaaxxa eloxxa huje hujatenaa'ni udumi'aa higebaan. Isi iimii'ni xeena ha'no'aa gansiise; mayetixxa yannanna ha'no'aa uwwe; itatinna gammashshoti qalbe ha'nooxxa wonshe.» 18 Konne haaso'a duuchcha haasonneexxi ardi insa'ne'aa tolchabaashsha waalchinseek jaba qicinnittemman.

19 Mitti mitti Ayihudiink manni Antsookiyii'ninna Iqoniyoonii'n ookko'aa dageexxi manni Phawuloosi'ni ke'aashshanna isoo kinjki cancaqaashsha asse; reyeechcho labbee'naanna harkinseexxi qachchi giddi'ni fulchine. 20 Hordofeeyye kinni daggeexxi Phawuloosike qarqara'n qoqqobbe uurrite'naa Phawuloosi ke'eexxi qachchi giddi'a e'ye. Langa barranna Bernabaasinni welti Derbeke qachchibaa me'ine.

21 Phawuloosinna Barinnaabaasi Derbeeke qachcha'ni eloxxa odo lallabeexxi heddo manna hordofeeyyete assineechchi uduma Lisixxira'aa, Iqoniyooni'aanna Antsookiya'aa ille iima hinge. 22 Ookko hordofeeyyetixxa qalbe jajjabeessatinna amana ifixxe'n ti'ni hineexxi uurrinaashsha gorsati «Mageniinxe mootumma'ni e'yatee no'o rakko lummoxxi giddo sa'a hasissaan» hinaa'ni insa'nee barachchiinse. 23 Mageniixxe mitte mittende tuutta'n geedhdhe insa'ne'aa baallonsineechchi uduma, agabo goddonna soodanteechchi uduma ookkone amanneemmake insa'neke Mageno'n maganne insa'nee uune.

24 Phisidiya giddii'ninna sa'neexxi Phinfilya'a ame'ine. 25 Insa'nenna Phergeke qachcha'n Mageniinka hiyyichcho lallanbeechchi uduma Axaaliya'a adadde me'ine. 26 Ookkonneechchi uduma Axaaliyanaa'ninna hunjeemmaxxe hujexxee Magenike badhaadha'n maganne uwweemmeemmake Antsookiyake qachchiba'a markabiki hingeexxi me'ine.

27 Antsookiyya gennee wodda Mageniixxi tuutta mitteba bukki hiteexxi Magen insa'nenni welti hedhe'e hujeexxa duuchcha iittanni Ayihudake kadebaak manninna amanaashsha Mageni hitta ora baneexxa insa'ne'n kulle. 28 Insa'nenna ookkonna heddo barra hordofeeyyeti welti turre.