1 Agirphaa Phawuloosi'i, «Ifixxee haasottotaa eetti ati'aa uwwendeen» hiyye.

Eettene yanna Phawuloosinna anga diriirseexxi faachcheeffachchotika hiissichcho hiyya'n haaso'ee qici: 2 «Moyanjo Agirphaa Ayihudi anee ku'leexxe ku'laa duuchchiinxee telcho ati edo faachcheeffachchotika hiissichcho uwwa dande'eennexxee lumoshsha gammadaannen. 3 Tinninna, giddii'ninni ati Ayihudiinke mannika seeranna moronsha duuchcha aadda egendeettaxxeeten. Tennexxee ossati haaso'annexxa laqqattoshsha atee kadhataannen.

4 «Reefi oosummate'ni hedhennaxxe yannanaa'ni ilemeneke bogi giddo kadi Iyyerusaalemi giddo hitta hedhaannaxxa Ayihudi duuchchi ege'ne'een. 5 Dhuggaa haaso'na'neexxe kaddoole ani sirendenaa'ninni amanaa no'oxxika galduma jaba qico duuteexxi seera heqqexxaaxxe Feerisitotixxe gamo giddi'nite kadennexxa egenne'een. 6 Ta'a kinni kaba murte adhdhatee uurrenechchi Mageni annuwwa no'okee addachchiisemmaxxa addexxeeten. 7 No'ok tommenna lami gosatik minuwwi Mageno hashsha barra mitte godobinni magenoofata'n muuxendee'naa uudo'a jaba qicinni heqqe'naammaxxi addachchiisa tenneten. Koo moyanjoo, Ayihudiink manni anee ku'la'neechchi tenne addexxe buuto'aten. 8 Mageni reyeka manna ke'issaaxxa ha'noo kaba hexxineek mayeete dandeessissabaaxxe yaane assitine uudina'neek?

9 «Ani umo angenninni ookkone Naazireetika Yessuusika summa dande'enneke ori duuchchinni xaa'nona'a mudhdheennan. 10 Iyyerusaalemi giddonna assenneexxi tennendemman; qeesetike sooresuwwanaa'n ani'a uwwemeeke baallominni woyyoole giddii'n heddo manni usurrii mine e'yashsha assenne; insa'ne shiyemmaa woddanna shiyammakeerinni weli aagenne. 11 Insa'ne'ni mura wonxaashshanna heddo yanna mitte Ayihudiinke magenoonfachchotike mininaa'n mittiinbaa mara'n Magenoke'n yowwichchiinka afo'o fulche'naashsha insa'nee hunnati ke'eenne; lumoshshanna insa'ne'n mufate'e wele bogike qachchuwwi giddo mara'n insa'nee shorrishenne.

12 «Konne qicinni qeesetike sooresuwwinnaa'n baallomiikinna ajaji ani'aa uwwemee'naa mitte barra Demaasiqo'aa me'aa'naa, 13 koo moyanjo barra saafo'a orange'n me'ande'ni hedhe'naa wa'inni arishshotike ifinaa'n sa'aak ifi qarqara anike'ninna aninni welti me'aammaake manni qarqara'n iimatenaa'n ifaa'naa afenne. 14 No'oo duuchchiing butta inbenneba he'nee'naa Ibirayisixike afo'inni, ‹Sa'ooli koo Sa'ooli mayee anee shorrishshaate? Otaaka sibiljo dhiittotole ati miidhendatto› hiyyaka haaso'a laqenneen.

15 «Ookkonneechchi uduma aninna, ‹Gootta, ati ayyete?› hiyyennen.

« ‹Goottikinna, ati shorrishshaateke,› Ante Yessuusiten hiyye. 16 ‹Ta'anna iima'a kexxe lekkati uurri; ati anxee uuddettexxeenna edi'anna uuddattoxxee yaanexxee erganjokenna dhugaa kulate kaddotta'a atee baallonsatee ate'ni leelle'ennen. 17 Atee atike ardinaa'ninna insa'ne giddi'a ergannoke Ayihudake kadebaak ardinaa'n anjirannon. 18 Atinna ille insa'nexxa bandattoshsha, dukkanatenaa'ni ifiinba'a insa'nee fulchitattoshshanna durrisiinke baallominaa'n Magenba'a insa'nee hiissitattoshsha assannoni. Insa'nenna ifixxe cubboxxa gattowwaal alfinaan; ane'ni amanatinna woyyoomeeke manni giddo qadaada alfinaan.›

19 «Tennexxee moyaanjo, Agirphaa! Iiminaa'n ane'n leelliteexxe waleella'a ajajemabe'non hiyyebe'no. 20 Yaane kinni edisennexxi Demaasiqo hedheekeera'n ookko'n Iyyerusaalemi'ninna Yihudake'n hedheeke duuchcha'n ookkonneechchi udma Ayihudake kadebaake manna'n, aade aangeexxi Mageniiba hingaashsha, aadde aaga ifixxa leellishshaaxxa yaanenna assinaashsha adda insa'ne'ni kulenne. 21 Tennenaa'ni kexxeexxe'niteni Ayihudi Woyyichchi galmi giddo anee abideexxi shiyatee yoreemmak. 22 Telchi qico'ni kinni Mageni anee gargaare'naa kaba uurrennexxi shiixxo lumoke'n dhugaa kulaannen. Wabeekonna Muuse kaddaan hine'e edinseexxi haasonnemmake haaso'i gadhi darre wele mittetanna haaso'enexxi hexxebaan. 23 Insa'nenna haasoneemmaxxi yaane, Kiristoosi abara adhaaxxa, reyotenaa'ni edike kade ke'at arda ifikee Isira'eeli'anna Ayihudake kadebaake ardi'a ifa lallabaaxxen.»

24 Phawuloosi tennee haaso'a'neege'n Fisixoosi, «Koo Phawuloosi qalbe saxxeeten laqi!» Isinna hafuura gikki asseexxi, «Barachchotixxi birasa'ne atee maraachchite'een.»

25 Phawuloosi kinni hiisse heyyee haaso'e qici, «Ulfeessendeeteke Fisixoosii, ani haaso'annexxi dhugaatixxenna toggite yaane malee ani maraatakebaan. 26 Tenne ani haaso'annexxa ati moyanji egendeettenxe kaddeemmaxxee ati edo wo'ma qalbenni haaso'aanen; iittanni sho'ik assendeexxi yaane mittetinna hedha gophphaammaxxee tenne yaanennaa'n mittetinna ate'n sho'ondaaxxi hexxebaaxxa ani koke'ennen. 27 Moyaanjo Agirphaa wabeeko amandaateshshandebaata? Amanda'etexxa ege'nennen.»

28 Ookkonneechchi uduma Agirphanna Phawuloosi'i, «Ati iitta sholla qicinninni anee Kiristoositote assitottaatee?» hiyye.

29 Phawuloosinna «Heenooxxe yanna'nite kaddo'o qeerraxxe yanna'n aten calla kaddebexxongi telcho konne anka haaso'a laqaak duuchchi, konne ani usuremenneke haachchabi gadhi darre anishsha kando'a Mageno kadhataannen» hiyye.

30 Ookkonneechchi uduma moyaanji Agirpha, bogiinke galchallinna, Beerniqe, isinni welti ofo'leemmak manni duuchchinna iimi'a ke'e. 31 Ookko'ninna fulleexxi me'inaa wodda weli'anni weli, «Kunni manjichchi reyote waalini usurakee geessissaaxxa asseexxi mitte yaanenna hexxebaan» hina'n haasonne.

32 Agirphanna Fisixoosi'n, «Kunni manjichchi anna Qeesaarii'i afeenne hiyya gopheele silaa wocci asseemmaman» hiyye.