1 «Anke dayyuwwanna anke annuwwa ani ta'a ha'no'n haaso'aanneka faachefachotika haaso'a laqqe!»

2 Insa'nenna isi Ibirayisixike afo'inni haaso'a'naa lanqe wodda woldi irra sammi hine.

Ookkonechchi uduma Phawuloosi hiyya'n haaso'ee qici: 3 «Ani Kilqiyake auraaj giddo hedheeke Xersesike qachcha'n ilemenneke Ayihudichchon; nophphenebinna konne Iyyerusaalemike qachcha'niten; no'ooke annuwwika seeranna Gemaaliyaxxe lekka hunda offo'lee co'asse barateennen; ha'noo telcho Magenokee hinaafina'neeshshanni aninna Magenokee hinaafaannakemnan. 4 Konne ora hordofaakaara reyoti qico'n shorrisha'n labba mayyaka abida'n usuriinke mi'ne'n e'yishaannakemman. 5 Tinninna dhugaate kaddeexxa qeesetik uminna Geedhetik ya'i duuchchi dhugaa kula dande'aan. Insa'nenaa'ninna borreessa adhdhennexxi Demaasiqo hedheeke insa'neke Ayihudiinke dayyuwwiba marat ookkone manna abidennexxi Iyyerusaalemi iyyedagati mura insa'nee woxisatee ookko'aa me'aannan.

6 «Jaane saate kadamma wodda me'aande'n hedhenneke'n Demaasiqo'a shiqennexxa yanna dedhange'n jabak ifi iimatenaa'n qarqara anke'n wa'a hiyyeen. 7 Aninna butta ibeennen; ibeeneenba hedhee'na ‹Sa'ooli! Sa'ooli! Mayee anee shorrishaate?› hiyyaaka haaso'a laqeennen.

8 « ‹Aninna, Goottaa! Ati ayyete?› hiyye qorenne.

« ‹Isinna ani ati shorrishshateke Naazireetike Yessuusin,› hiyyeexxi hiisse haaso'e. 9 Aninni welti hedhemmaki manni ifa ookkonee uudo malee isi ane'n haaso'eeka haaso'a laqebaan.

10 « ‹Aninna anke Goottaa! Maa assanno?› hiyye qorenne.

« ‹Goottikinna misii hiiye› kexxettexxi, ‹Demaasiqo mari; assittottaa hassissaaxxi duuchcha ookko ate'ni kulendaani.› 11 Ookkone ifinike wa'innixxe birasa'nenaa'n kexxeexxa ille anxi afa gophpheemmaxxee aninni welti hedhemmak manni anga anee abide akeeka'n Demaasiqo geesise.

12 «Ookkonna Hanaaniya hiyyemmak mitti manjichchi anee uudo'a anibaa dage; isinna seera xexxe'achchoti heqqedhaake. Damaasiqo hedhaammake Ayihudiinke manni duuchchi edo ulfeessemmeeke manjomman. 13 Isi ani bira dage ani bira uurreexxi anee, ‹Dayyo Sa'oolii, ille atixxi affowwaal!› hiyye. Ookkonne hirba'ninni ille anee affee'na isoo uudennen.

14 «Ookkoneechchi uduma isinna anee hiyyee qici: ‹No'oke annuwwiki Mageni fedhii isixxa egendottaa, Ookkone qullichchanna uudotaanna afo'oo isikenaa'n hiyyichcho laqqotaa atee fi'le'een. 15 Mageni tenneenna asseechchi uuddettexxenna laqqeettexxa yaanexxee manji duuchchi edo isixxe dhugaa kula kaddota'aaten. 16 Ta'ata maa heqqitaate? Kexxettexxi summa isika yexxa'ni xammaqemi, cubbo atixxenaa'ninna anshedhi.›

17 «Aninna Iyyerusaalemi'a illee iima hige'e Woyyichcha galmi giddo soodachchote'n se'ennexxi waleella uudenne. 18 Goottikinna ane'n haaso'aa'naa afenne. Isinna, ‹Anxee kuldattoxxa dhugaa adhdha gophaammaxxee rakketeexxi Iyyerusaaleminaa'n fuli› hiyye.

19 «Aninna, ‹Gootta, ani Ayihudiinke maganoonfachchotike mine duuchcha'n mara'n atee amanammaka manna usura'ni ganaannaxxa kunni manni ege'ne'een. 20 Atixxee dhugaa kula kadeemmak Isxifaanoosi shiyemee wodda ani umo anigenninni shiyammake manninni weli'aagennexxi ookko bira uurrati shiyemmake mannixxa seemma heqqaannan.›

21 «Goottikinna, ‹Bayya, Ayihudake kadebaake mannibaa ate erga'ennaxxee kexxe me'i.› »

22 Konne hiyyichchi qico'n ardi duuchchi Phawuloosika haaso'a laqa'nemman; ookkonechchi uduma «Iitta hedheek manji buttatenaa'n fuggussemowwaal; lubboti hedha isoo hasissabaan!» hiyya'ni hafuura gikki asseexxi cance.

23 Insa'nenna cancina'n seemma ifi fixxanna iimi'a dharbina'n bukotanna iimi'a xeera'nemman. 24 Ajajallikinna tennee uudee wodda Phawuloosii'i loliinke mannixxe kaanbe'n iyyemarraashsha ajaje. Ardi iso'ni mayyee konne qico canca'neexxa ege'nateenna jadhafema'n qoremaashsha ajaje. 25 Phawuloosinna genni assine usurre jadhanfo'a qixxeefantaa wodda isi bira uurreeka dhibbiinka ajajallo, «Mitte Roomike bogika manjo murte belo jadhaffino'a seeri ha'no'aa uwwa?» hiyye.

26 Iikki dhibbiink ajajajlinna tenne laqqee wodda loliinke mannike ajajallibaa shikki hiyyeexxi: «Maa assita'ettexxa egende'ete?» hiyye isinni hiisseexxi, «Manjichchiqqa kuniqa Roomike bogike manjo» hiyye.

27 Ajajallikinna Phawuloosiba'a shikki hiyyeexxi, «Amoo ane'n kuli, ati Roomike bogike manjo?» hiyye.

Phawuloosi, «Eeti» hiyye.

28 Ookkonenechchi uduma ajajallikinna hiyyee qici, «Ani Roomeke manjo kadeenneek lumoka maallaqqa uwweten» hiyye.

Phawuloosi kinni, «Ani ilenshandinni Roomeke manjon» hiyye.

29 Tennexxee isoo qore qo'niso'a qixxeeffatemak manni iikki woddi isinaa'n baaje. Ajajallikinna Pha'uloosi Roomike manjo kadeeka ege'nee wodda Roomika manjo haachchabik usureemmaxxee sodaate.

30 Langaxxa barra ajajalli Ayihudiink manni Phawuloosi'i mayiinxe button ku'lemmeexxa toggitte yaane ege'no'aa haseemmaxxee iso usurakenaa'n tike. Ookkonneechchi uduma qeesetik sooresuwwinna Ayihudixxe songok manni duuchcha bukki hiyyaashsha ajaje. Phuwuloosinna iyyedageexxi insa'ne edo uurse.