1 Canci iikki ca'li hiyyeechchi uduma Phawuloosi hordofeeyye mitteba ye'eexxi insa'nee goorse; «Nage'ikinna hedhdhe» hiyya'n Meqedooniya'a me'e. 2 Ookkone giddii'n sa'emmake boonchuwwa'n ardakee heddo hiyyichchinni gorsa uwwa'n Girkeka boga geye. 3 Ookkonna sase ageenjo ture; lumoxxe hobolo'ni Sooriya'a me'o'a qixxeefataa wodda Ayihudiink manni iso'n fuggoxxa asso'a mari'atee hedhemmaxxa ege'nemmaxxee Meqedooniya darree'n sa'eexxi illeema higo'a mudhe. 4 Phiirhuusik belti Soophaxiroosi Beeriyake qachchanaa'n, Arsixirokoosinna Sikonduusi Tenselooqenaa'n, Gayiyoosi Derbenaa'n, Ximotoosi, Tikiqoosinna Xirofimoosi, Issiyake awurajjinaa'n isinni welti me'ine. 5 Insa'ne edinse sa'neexxi Xiro'aada no'oo heqqine. 6 No'o kinni kebbotike ayyaanii uduma Filphisiyuusinaa'n lumoxxe hobolo'n ofollennexxi onde barra uduma insa'ne he'neeba Xiro'aada genneneexxi ookko torbaane barra turrenne.

7 Torbatixxe taakkesoxxe barra'n galgala mittumat budeena indonna'a bukki hine'naa Phawuloosi langa baro me'ammaxxe'e bukki hiyyeeke manna'ni haaso'a'emma; haaso'akanna wodhdhaakiin qico'n qeerrise. 8 No'o bukki hineennexxe fooqe'n heddi xassuwwi hedhemman. 9 Ewwixekis hiyyemaak dargaggeesi mitti masikootete'ni ofo'leemman. Phawuloosi haaso'a qeerrise wodda, dargaggeessi kunni ha'ureeka mugo muge; diiphenna cokkoki hiyyeemmaxxee sakkaxxe fooqonaa'n butti'a ibe; mannikinna iso'o reyeenaa ke'isse.

10 Phawuloosi kinni butti'a dirreexxi dargaggeessa konne hana wabbiyye luu'medheexxi, «Mee alaayye! Lubbo hedhenni hedheen» hiyye. 11 Phawuloosi fooqete'n iimi'a illee iima higeexxi amaanyet welti ita ite; soodaa qico'ni manniki welti haaso'a'ni tureechchi udumanna ke'e me'e. 12 Mannikinna fayyeemmaka ookkone dargaggeesa mine iyyemareexxi ookkonna lumo qico dayya'e.

13 No'o Phawuloosi'i ookko'n qophe'nonna'a edinse markabiinbaa me'innene; ookko'ninna markabake'n Asoosi'a gulunfenne; tenne assinennechchi Phawuloos Asoos qico'n lekkati me'o'a hedeemmaxxeenna tennenna assinannoshsha isi no'oo ajajemmaxxeeten. 14 Isinni welti Asoosii afemeenne wodda isoo lumoxxe hobolote'ni ofo'linshenneexxi Miixiliini'a welti me'innenne. 15 Langaxxa barranna ookko'ni markabik me'inennexxi Kiyoosike oddoolike kallachcha'n hexxexxe bakka'n gennene. Iitti andaaxxa barranna Saamoosike oddoolbaa foonfenne; ookkoo'n itti andaaxxa gorsanna Miliixi gennenne. 16 Phawuloosi Issiyake awuraajji giddo tura hasa gopheemmaxxee Efesooni gorebaang sa'e me'a hase. Tenneenna asseechchi dandeessisoole onde tomme barrake ayyana'ni Iyyerusaalemi afemo'a wiinamammaxxeteen.

17 Miliixinaa'n Phawuloosi manjo Efeesooni'a ergeexxi Efesoonixxe Mageniinxe tuutaxxa geedhdhe ye'ise. 18 Geedhetinna dagee wodda insa'ne'n hiyyee qici, «Issiyake awuraajja'n e'yennexxe barranaa'ni duuchchi wodda ha'nonni welti hitta hedha'ennaxxa ha'nonni egeendine'een. 19 Ayihudiinxe shokkonaa'n kexxeexxa rakko ane'ni gelteexxe kaddoolenna midde ani lumoxxe shaquntenninna indidoti Gootta ergatemaannan. 20 Manni bukki hiyyaa boncho'ninna kaddo'o mine mine mammaremma'n ha'noo barachchciisatenaa'ninna la'o ha'no'aa affaan hiyye hedennexxa lalabatenaa'n udumaa higebe'non. 21 Ayihudiinke mannanna kado'o Girkeek aadde aageexxi Mageniinbaa higaashshanna Gootta Yessuusi'n amanaashsha jabeesse kuleenneni.

22 «Ta'anna ookko gewonnoole ane'ni maachchi geyyaaxxa ege'nebe'nongi Woyyichchi Hafuurinni ajajeme'e Iyyerusaalemi'a me'onaaten. 23 Kaddo malee qachcha qachcha'ninni usurikinna rakko ane'ni geltaaxxa Woyyichchi Hafuuri ane'ni kule'een. 24 Yaadi ank badhaadhiinxa wengeleexxa eloxxa odo dhugaa kulati Gootti Yessuusi Kiristoosi ane'n uwweexxa huje hujeneexxi biratee gongichcho anka muuxonna'a ani'a hedho anxi mitteelchishsha laako'endabaaxxenna wayi fuldabaaxxe yaaneshshaten.

25 «Ta'atenna kaddoole ha'nooxxe oddo'ni marema'ni Mageniinxe mootummaxxa yaane ha'no'n kuleennek, ha'noo duuchchiing konneechchi edi'a anee affinabaaxxa ege'neennen. 26 Tennexxee ha'noo giddii'ni mitti midde ba'eexxe kaddoole ani laqemabe'noxxa telchixxe barra'ni ha'no'ni ege'nishshaannen. 27 Mageniinka yaada duuchchanna ha'no'ni kuleennen; mittetinna gatisenneexxi yaane hexxebaan. 28 Woyyichchi Hafuuri ha'noo ifike gedhebixxe alaalsanno asseexxi baallonse'een; Yoona umo ha'nookanna gedhebo isika duuchcha heqqe; Mageni ifike beltixxe reyonni wodeexxa isixxa beete kiristaane heqqe. 29 Ani me'enelchini buttaaxxi yayye daggeexxi ha'nooxxe oddo'ni luuxxe e'yitaaxxanna Mageniinxe tuuta'a marartabaaxxa ege'neenneni. 30 Ha'noo giddii'ninna midde ifixxa hordofeeyye bira sa'isatee'e dhugaa dassaak manni ke'aan. 31 Tennexxee ifi heqqedhdhe; sase woga hashshanna barra uurrisa belo indiidoo dunat ha'no xexxe'achchiisennexxa kassi hiyye!

32 «Ta'anna ha'noo ijaaraake'ninna woyyoole ifixxi giddo ha'no'a qadaada uwwa dande'aake Mageno'ninna isike badhaadhiinke hiyyichcho'n ha'noo maganne uwwaane. 33 Ani ayyika biretika siblijo yookaan worqe yookaani seemma gaabebe'non. 34 Anga anxenni hucca'n ifinna aninni welti hedhemmakaara gargaarennexxa ha'noo umo ha'noongenninni egendine'eeni. 35 ‹Adhdhaak irra uwwaak eebbiseme'eeken› hiyyaaka Gootta Yessuusika hiyyichcho qaabatati anga no'oxxenni huccina'n rakkiyye gargaara no'oo hasissaaxxa ha'noo'n heddo orinni leelliinsheennen.»

36 Ookkoneechchi uduma Phawuloosi insa'ne duuchchingeenninni welti guluffateexxi soodate. 37 Insa'ne duuchchiingi hiiqqinse oo'na'n Phawuloosi'n marxemmee sunqe'ne. 38 Hara lumo qico yaandeechchi, «Yoona konnechchinni edi'a anee uudinabaan» hiyyemmaxxeten. Markabii qico'ninna isoo geegeesine.