1 Phawuloosi Derbeke qachcha'ninna Lisixxiraanike qachchibaa me'e; Lisixxiraanike qachchi giddonna Ximotoosi hiyyemaake amaanyichcho hedhemman; ama isixxinna amaanye Ayihudichchomman; anni isiki kinni Girkiichchokemman. 2 Ximootoosi Lisixxiraanike'ninna Iqoniyoonike amaanye dayyuwwa duuchcha'ni eloke summa afe'eemmani. 3 Phawuloosi Ximootoosii'i adhdhexxi me'aa haseemmaxxee iso'o jila ofo'lishshe. Tennee asseechchinna ookkone booncho'ni hedhemmake Ayihudiinke mannixxe buuto'aten. Tinninna Ayihudiinki manni Ximootoosiki anni Girkiichchoke kadeexxa egenneemmaxxeeten. 4 Phawuloosinna Sillaasi qachchakenaa'n qachchinba'a me'inaamma wodda Iyyerusaalemi hexxeexxi ergameeyyenna geedhe murtemmaka seera amaanyete'n ege'nisha'nemman; hujete'n hosinso'aanna xexxeachchinsa'nemman. 5 Tennexxee Mageniinxi Tuuta amaanyummate'n jajjabata'ni me'ite; laakkoossi insa'neekinna barra barrande'n lebema'n me'e.

6 Phawuloosinna Sillaasi Issiyake boga'ni hiyyichcho Mageniika kullabaashsha Woyyichchi Hafuuri insa'nee hoyyemmaxxee Firgiyakee'ninna Gelaatiyake bogi giddii'n sa'ne me'ine. 7 Misiyake bogixxe gabalaba gennee wodda Bitaaniya'a me'ino'a wo'lanneemma; yaane kinni Yessuusik Hafuuri me'inabaashsha asse. 8 Tennexxee Misiya darree'n sa'neexxi adadde Xiro'aada'a me'ine. 9 Eettene hashsha mitti Meqedooniyak manjichchi uurreexxi isoo, «Meqedooniya'a daggetexxi no'oo qarqaari!» hiyya'ni kadhataa'naa Phawuloosi waleellati uude. 10 Phawuloosinna tennee waleella uuddeechchi uduma Mageni wengeele insa'ne'n lallanbonna'a no'oo ye'eedhe'n hine mudhdhati hirbange'ni Meqedooniya'a me'a hansenne.

11 Xiro'aadaa'n markabake'n gulunfennexxi toggichcha ora Saamotiraaqe'a me'inenne; langaxxa barranna Naaphule'a me'innenne. 12 Ookko'ni ke'neennexxi Filphisiyuusi gennennen. Filphiyusi Meqedooniyaxxe galchake umo qachchanna Roomik manni ifike baallomi hunda assedheexxi itti hedhammake qachchamman. Ookkonna heddo barra honseennen. 13 Edi Sanbati barranna soodachchotixxa bakka hasito qachchiinxe hullanaa'n fullennexxi mitte galaanibaa me'innen; ookkonna ofolleneexxi bukki hiteemmaxxe melaalle'n Mageniinka hiyyichcho haaso'aten ke'nenne. 14 Haaso'a no'oka laqqaammaxxe melaallenaa'ni mitte Tiyyaxiroonike qachcha'n baddeesitte seemma daddaldaammaxxi Lidiya hiyyendaammaxxe manjichcho hexxemman. Isenna Mageno magenoonfattaammaxxe manjichchomman. Goottikinna wodana iseka baneemmaxxee Phawuloosi haaso'aammaxxa qalbeeffachchot laqqa'neemman. 15 Isenna iseke mine'ni hedhdheek manni duuchchi xammaqemme. Xammaqemmeechchinni uduma isee «Goottake'ni amanaa anxa wo'mitineechchinni anke mine'ni daggine offo'le» hiteexxi jaba qico no'oo kadhatte.

16 Mitte barra soodachchotike boonchibaa me'inaa'naa mitte mini giddo ergatendaammaxxi jale belto orake'ni no'oo affe. Tinni belto heger kaddaaxxa yaane morotike hafuurinni raaga haasota'eexemman; isexxe moronninna ifike goottuwwi'a lumook maalaqi dagaashsha assitaamman. 17 Ise Phawuloosinna no'oo hordofaa'n, «Kunni manni anigirematika ora ha'no'n kulaake duuchchiingenaa'n sa'aake Mageniinke erganjuwwan» hita'n cancita'nemman.

18 Tenneenna heddo barra higgeeggeenni haasota'nemman. Phawuloosi kinni hifateexxi udumi'a wirri hiyye'e konne fuggichcha hafuura, «Yessuusi Kiristoosike summinni isenaa'ni fuldattoshsha ajajaannen!» hiyye. Fuggichchi hafuurinna hirbaniga'n isanaa'n fule.

19 Tenne beltok goottuwwi maallaqa alfatixxi adde gateexxa uudee wodda insa'nenna Phawuloosiinna Sillaasii'i abinde harkinsa'ni dikkotiba galchatik manni hedheeba iyyemarre. 20 Insa'neenna Roomake galchatik mannibanna iyyedangeexxi hinee qici, «Kunni manni Ayihudiinke mannan; qachcha no'okanna daassa'neeken. 21 No'o Roomik manni adhdhinabe'nokanna assinabo'noka galduma insa'ne barchiinsa'neen.» 22 Ardi duuchchi mitteba higeexxi insa'ne'n ke'e. Arda ookkonee galchaammaki manninna Phawuloosinaa'ninna Sillaasinaa'n seemma fulchineexxi ganemmaashsha ajanje. 23 Insa'neenna fuggo ganemmeechchi uduma usurrini mine'ni e'yinsheexxi usurrinke miniki heqqanji insa'nee xexxe'ate heqqaashsha ajanje. 24 Heqqanji konne ajaja adhdheechchi uduma usurri minixxe giddixxe kuta'n insa'nee e'yishe. Lekka insa'neexxanna lame jirmixxe oddo'ni silli asse duudhe usure.

25 Hashsha wodhak geyyaa wodda Phawuloosinna Sillaasi soodanta'ninna faarsina'n Mageno galateefanta'nemman; weli usuremeemak manninna insa'nee caqasa'nemman. 26 Dedhange'ni usurrinke minixxi booso sheke sheke hitaa qioc'n jaba qico buttinni lele'me; eettenne yanna usurriinke minixxi hula duuchcha banende; duuchchiing usurememmak haachchabinna tikeme. 27 Usurriinke miniki heqqanjinna diiphokenaa'n dammaqeexxi usurriinke minixxi hula banende'naa uude wodda usurememmaki manni baajechcho fakkaatte'naa ifi shiyo'aa haseexxi wolaantichcha dobe. 28 Phawuloosi kinni canica'n, «No'o duuchchiingi kabanni he'nenenn; mitte miidhenshanna ifi'ni geessissoxxe'e» hiyye.

29 Heqqanjikinna xassa iyyedagiseexxi gonga'ni giddi'aa e'ye; roqonsaa'ninna Phawuloosixxenna Sillaasixxe lekka edo wabbi hiyye. 30 Insa'nenna gadhdhi'a fulcheexxi insa'nee «Goottuwwaa! Anjiremona'a ani maassa hasiissa?» hiyyexxi qore. 31 Insa'nenna «Gootta Yessuusi'ni aman anjirendatton; atik mini hadinna anjiremaan» hine. 32 Mageniinka hiyyichchonna isi'aannaa isike mine'ni hedheeke duuchchi'a kulle. 33 Eettenne yanna hashshati iikki uusurriinke miniki heqqanji insa'nee adhdheexxi me'eexxi mada insa'nexxa anshe; iikki woddi isinnaa isik mini hadi duuchchinni welti xammaqeme. 34 Ifike mi'ne'ninna iyyemareexxi ita insa'ne'a shiqishe; Mageno amanemmaxxeenna ifike mini hadi duuchchinni welti lumo qico gammade.

35 Boginna soodee wodda iikki boga galchammak manni «Konne manna tikke wocci assi» hiyya'n ifika ja'laabuwwa ookkone usurriinke minike heqqanjo'n erge. 36 Usurriinke miniki heqqanjinna «Ha'noo wocci assendinaashsha galchalluwwi ajaje'een; yoona fuldineexxi nage'iki me'e» hiyya'n Phawuloosi'ni kule. 37 Phawuloosi kinni insa'nen, «No'o Roomi bogike manna kandanno wodda seeri belo no'oo ardii edo jadhanfeexxi usurrii mine'ni e'yinsheen. Ta'a kinni sho'ik usurrii minenaa'ni no'o fullannoshsha assinaata? Tinni kaddabaan; insa'ne umo insa'nengenninni dangeexxi no'oo fulchinowwaal.»

38 Iikki ja'laabuwwinna tenne yaane ookkone boginke galchalluwwa'n kulle; insa'nenna Phawuloosinna Sillaasi Roomi bogike manna kandeexxa egennee wodda sodaante. 39 Tennexxee dangeexxi insa'nee gattowwaali'i lanqe; usurrii minenaa'ninna insa'ne fulchineenaa qachchakenaa'ni fullee me'inaashsha insa'nee kadhante. 40 Phawuloosinna Sillaasi usurrii minenaa'ni fuleexxi Lidiyake mine'n e'yine; ookkonna amaanye dayyuwwa anfeexxi insa'nee jajjabeessineechchi udumanna me'ine.