1 Ookkone wodda Sa'ooli Goottiinxa hordofeeyye shiyo'a daabbata'ni qeesetike sooresibaa mare. 2 Isinna Goottiinka ora hordofaaka manna labbaka meyyaka afoole usura'n Iyyerusaalemi'a iyyedaga dandeessisaaka borreessuwwa Demaasiqoke Ayihudiinke magenoonfachchotike minuwwi'a borreesemeexxi uwwemaashsha umo qeesichcho laqe. 3 Isinna Demaasiqo'a shiqee wodda dedhange'ni isike qarqaraa'ni ifi iimi'ni dagee iso'ni xabe. 4 Isinna ookkone wodda butta ibee'naa; «Sa'oolii! Sa'oolii! Mayee'e anee shorrishshaatee?» Hiyyaaka haasso'a laqee. 5 Sa'oolinna «Anke Goottaa! Ati ayyete?» hiyye. Isinna hiisseexxi «Ati shorrishshaatek ante Yessuusiten. 6 Kexxeettexxi qachchinba missi hiyyi! Maa assitattoxxanna ookko ate'n kulendaan.»

7 Sa'oolinni welti me'aammak manni haaso'a ookkonee laqo malee mitteelchonna uuda gophe wodda hiyyaaxxa gopheexxi sammi hiyye uure. 8 Sa'oolinna ibeeba'ni ke'eexxi ille baqqi assee wodda mitteelchonna uuda dande'aa gopheemmaxxee manni anga isixxa abidee akeeka'ni Demaasiqo iyyemare. 9 Sase barra qico'ni afa dande'ebaan; isinna eettenne barra giddo mitteelchonna itebaan yookaani ha'webaan.

10 Demaasiqo Hanaaniya hiyyemaak mitt hordofalli hedhemman. Gootti iso'ni waleellati, «Koo Hananiyya» hiyyeexxi e'ye. Isinna «Anke Goottaa! Ani kunna'a» hiyye.

11 Goottikinna iso'n hiyyee qici, «Kexxetexxi toggichcha ora hiyyemaakibaa mari! Ookko Yihudake mine'n Sa'ooli hiyyemaaka Xerseesika manjichcho mitte hasi! Ta'a isi Mageno soodachchote'ni hedheen. 12 Sa'oolinna ille isixxi higgeen afaa dandeetaashsha Hanaaniya hiyyeemmaki manjichchi isibaa mareexxi anga isoi hana uggaa wodda waleellati uude.»

13 Hanaaniyanna hiyyeexxi hiissee qici, «Anke Goottaa, kunni manjichchi Iyyerusaalemi hexxeemmaaxxe atixxe woyyoole'n heddo fuggoxxa yaane assa isixxa heddo manninaa'ni laqeennen. 14 Isinna summa atika ye'aaka duuchcha usuro'aa qeesetike sooressuwwinaa'ni baalloma adhdheexxi kaba'a dage'een.»

15 Yaane kinni Gootti Hanaaniyya'n hiyyee qici, «Kunni manjichchi Ayihudake kadebaake arda'niinna moyanjuwwi edo iittanni Isira'eelike ardi edo summa anka ba'edho'aa ani'aa filemeeke anke miyani, kexxe isiba mari. 16 Isi anke summixxee hitteeka abara adhdhaaxxa ani umo angenninni iso'ni leellishshannon.»

17 Ookkonneechchi uduma Hanaaniyanna Sa'ooli hedheemmake mine'ni mare e'yeexxi anga ifixxa Sa'ooli hana uggati, «Sa'ooli, anke dayyoo! Kabaa dagga'naa orake'ni ate'ni leellek, Gootti Yessuusii anee atibaa erge'een. Isi umo ifingenninni anee atiba ergeechchi afaa dandeetattoshshanna Woyyichchi Hafuuri ate'n wo'maashshateni» hiyye. 18 Hirbange'ni qonnonno labaachchi Sa'oolixxe illenaa'ni ibe'naa afa dande'een. Ookkonneechchi udumana ke'eexxi xammaqeme. 19 Isinna itattanna iteexxi jabaate; heddo barra qici'a Demaasiqo hexxeemmaaxxe Yessuusixxe hordofeeyyenni welti ture.

20 Sa'oolinna iikki woddi Ayihudiinke magenoonfachchotike mine'ni «Yessuusi Mageniinke Belton» hiyya'ni lallabate'n ke'e. 21 Laqeeki manni duuchchi tenne mambe'a hiyya'ni «Isi kunni manjichchi Iyyerusaalemi giddo Yessuusika summa ye'aaka duuchcha bira'emmakemmaba'a? Isinna kaba dage'echchi amaanye usura'ni qeesetike sooresuwwibaa iyyemaro'atebaa?» hiyye. 22 Sa'ooli kinni caala jabaata'ni me'e; Yessuusi isi Kiristoosite kadeexxa kokeessa'n Demaasiqo giddo hedheemmaka Ayihudiinka manna hiyyaaxxa haakisaamman.

23 Heddo barranni uduma Ayihudiink manni Sa'oolii'i shiyatee mari'ate. 24 Isi kinni yaada insa'neeka ege'neemman; insa'nenna isoo shiyyatee hashshanna barra ookkone qachchixxa huluwwa heqqina'nemman. 25 Mitte hashsha kinni Sa'oolxi hordofeeyye isoo agalade giddo uggiteexxi kinjiinke dalla'i haanii'ni sa'issiteexxi butti'a dirrisse.

26 Sa'ooli Iyyerusaalemi mareexxi hordofeeyyet welti karsemo'a hase; yaane kinni Sa'oolxi Kiristoosi'ni amana insa'ne'n dhugaate fakkaata gophemmaxxee insa'ne duuchchiingi sodaante. 27 Yaane kinni Bernabaasi Sa'oolii'i ergameeyyetibaa shiqisheexxi, Sa'ooli orake'ni Gootta hitta uudeexxa Goottikinna iso'ni hitta haaso'eexxanna, ittanni Sa'ooli Demaasiqo Yessuusike summinni soda'a belo barachchiiseexxa Barinabaasi insa'ne'ni ifise kule. 28 Tennexxee Sa'ooli insa'nenni welti hedhati Iyyerusaalemi giddo duuchcha'ni maremaa'ni soda'a belo Goottiinke summinni barachchiisa'nemman.

29 Isinna Girkeeke laagadinni haaso'amaake Ayihudinke manninni welti haaso'a'ni welt moroma'nemman; insa'ne kinni isoo shinno'a hansa'nemmaan. 30 Amaanye dayyuwwinna tennee laqee wodda Sa'ooli'i Qiisaariya'a aadheexxi ookko'n Xerseesi'a me'aashsha asse. 31 Ookkonneechchi uduma Yihudake boga'n, Geliillanna Semaariya hexxeexxi Mageniinxi tuuta nage'ik hedhate'n kexxe, jabaatte; iittanni Mageniinxe soda'anni mammarenda'ninna Woyyichchi Hafuurinni dayyeefatta'ni laakkossiki bira saxxa'ni me'ite.

32 Pheexiroosi boga duuchcha'ni marema'ni Liidake qachcha'n hexxemmaxxe ammanyeba mare. 33 Ookkonna saddeeta wogga duuchcha ela gonpheti ma'na hedheeka Eeniya hiyyyemaaka gogeeka manjichcho afe. 34 Pheexiroosinna isoo, «Koo Eeniyaa! Yessuusi Kiristoosi atee fayyisaan, kexxetexxi ma'na atixxa fa'i!» hiyye. Hirba ookkone'ninni Eeniyaanna ke'e. 35 Liidakinna Saaroonak manni duuchchi isoo uudeexxi Goottake'ni amane.

36 Iyyoophpheke qachcha'ni Xaabbita hiyyendaaxxi mitte manjichcho hexxemman. Summi isekinna Giriketike laagadinni «Dorqa» hiyyemaa wodda isixxi tikanna «Buddanne» hiyyaten. Isenna eloxxa yaane hujjaa'ni hiyyeeyye gargaarati yanna ifixxa duuchcha sa'issitaammaxxe manjichchomman. 37 Ookkone wodda dhibendeexxi rerte; rensha iseka anshineexxi fooqete'ni hexxeexxe mitte kuta'ni uggine. 38 Liida Iyyoophphe'a shiqqaammaxxee Iyyoophphe hexxeemmaxxi hordofeeyye Pheexiroosi Liida hedheexxa laqqeexxi, «Maganneten rakketexxi dagi» hiyyeexxi ye'aaka lame manjo Pheexxiroosibaa ergite. 39 Pheexiroosi erga isibaa maremaake manninni welti ke'eexxi dage. Isinna dageexxi geyyee wodda fooqete'ni hexxexxe kutaba'a isoo iyyemarre; aro'o shi'witeexxi melaalle duuchcha Pheexxiroosi'i elqe kayyii'ni buqqee ooxxa'n Dorqa lubboti insa'nenni welti hexxeemma wodda hujjeemmaxxa qamisuwwanna seemmuwwa iso'ni leelshaa'ni ooxxa'nemmaan. 40 Yaane kinni Pheexiroosi duuchchiinga gadhi'a fulche'e, gulufateexxi Mageno soodate: isinna ookkonneechchi uduma renshinbaa wirri hiyyeexxi «Xaabbitaa ke'i» hiyye. Isenna Ille baqqi assiteexxi Pheexxiroosi'i uuda'n kexxeexxi ofolde. 41 Isinna anga ifixxenni isee abide ke'isseexxi ammanyetanna aro'o shi'witeemmaxxa melaale ye'eexxi isee hedhondinni hexxeexxa insa'ne edo shiqishe. 42 Iyyoophpheke qachcha duuchcha'ni tinni odo laqeende; heddi manninna Goottake'ni amane. 43 Pheexxiroosinna goga duugammaake Simi'ooni hiyyemaamake manjichchinni heddo barra Iyyoophphe ofo'le.