1 Ixaaliyaa markabik me'innonnaa murendeechchi uduma Phawuloosiinna weli usuremeeemmak manni moyanjiinxe bagediinxe kutaxxe gamo kade'eeke Yuliyoosi hiyyemaake dhibbiinke ajajallo'n sa'issemme uwwemme. 2 Issiyake awurjixxe abbaayyake qarqara'n hedheemmake qachchuwwibaa me'a'neeke Adiramiixiisike markaba'n ofo'lennexxi ke'ne me'innenne. Teseloonqeke qachcha'ni hedhemmak Meqedooniyake bogik Arsixirokoosi hiyyemaak manjichchinna no'onni welti hedhemaan. 3 Langaxxa barra Sidoona gennenne; Yuliyoosi Phawuloosi'a eleexxi Phawuloosi ifike jaaluwwiba'a mareexxi qarqaarsa alfo'a eetti isi'aa uwwe. 4 Ookko'ni ke'nenneexxi diidallo no'o edi'ni no'obaa diidalleessitaammaxxee Qophphiroosixxa giddichcho gollake asse'nennexxi markabik ke'ne me'innenne. 5 Kilqiyakenna Phinfilyake qarqara'n hexxemmaxxa abbaayya foonfennechchi uduma Liqiyake bogi giddo Mura hiyyemaake qachcha'n gennenne. 6 Ookkonna dhibbiink ajajalli Ixaaliya'a me'a'neekaa Isikindiriyaka markaba afeexxi iso'ni no'oo ofo'lishshe.

7 Heddo barra laana me'inna'n Qeenidoosike qachchika loola abark gennenne. Diidallotinna edi'a me'inabe'noshsha kutteexxa yanna Selmuunake bogi darree'n Qerxeesika oddoola gollante me'innenne. 8 Jabaaxxe rakkonni abbaayyati hana kasakenaa'ni sa'nennechchi uduma Laasiyake qachchi bira «Markabiinke uurrichchi'a eloke booncho» hiyyendaaxxe bakka'n gennenne.

9 Me'inaa'naa'nni heddo barra saxxemaxxeenna agabo goddo hosatixxi yanna muddeemmaxxee eettene yanna markabik abbaayyati hana me'a rakkissaaxxe kaddeemmaxxee Phawuloosi welti me'aammake manni'a hiyyeexxi gorsa uwwee qici, 10 «Koo manna yoona konneechchinni edi'a hexxeexxi no'oxxi me'a rakko affexxe kaddeexxa ane'ni leellita'neen; rakko tinni fe'emeechcho'ninna markaba callaa'nite kaddebaangi no'oxxe hedho'ninna jabaaxxe ba'nenna miidheensha geltaan.» 11 Iikki dhibbiink ajajalli kinni Phawuloosike gorsi irra eettene markaba oofamakinna markabiink anni hinaaxxa laqa'nemman. 12 Haarso ookkone ookko sa'issatee iikki oddooli elabaake kadeemmaxxee heddi manni Finqe hiyyemaake oddoola'n geyeexxi ookko turatee addatiyyot me'a no'oxxa edi'a me'inanoshsha mudhdhinenne; Iikki oddolinna Qerxeesike bita'i darreke dhidhiminaa'ninna middi darreke dhidhimi darree'ni kallachchake'n hedheeke boonchomman.

13 Hara jabaatebaaxxi bita'ixxi diidallo diidalleesate'ni kexxee wodda insa'ne hendeexxi kaddachcho labbe'naa markaba uurrishiinka mahaaliq hiyyemaaka sibiljo gonsheexxi Qerxeesi gaminaa'n sa'ne me'ine. 14 Yaane kinni heenoxxe yanna uduma, Awuraaqisi hiyyendaaxxi hobonbalte abbayyati hana insa'ne darre'n dagge. 15 Diidallo markaba kayyi'aa dhiibba'naa edi'a me'aa dande'a gonpheennaxxee ora waale'e diidallo adhiteexxi me'iteenba'a me'innenne. 16 Qeeda hiyyemaaka oddoolla gollake asse'nenneexxi me'inanno wodda markaba lubbo gatisatixxa shiixxoxxa hobolo kandeennexxa kande anjira dandeennenne.

17 Shiixxooxxa hobolo harkinisse iimi'a fulchinneechchi uduma markaba diigendabaashsha qarqara wodaroti xaanxe usurree; Surtisi hiyyendaaxxe cirraachchiinxe tullo'n mare ganemabaashsha soddanteemmaxxee tenne markaba shara dirrinseexxi iittanni diidalloti oofema'ni me'ine. 18 Hobonbalte no'o'ni itti jabaatta'ni me'itemmaxxee langaxxa barra feenemmaka mi'a abbaayya giddi'a hunate'ni ke'ne. 19 Sakkaxxz barra markabakee la'oo uwwaammaka mi'a anga ifixxenninni darbina'n hunne. 20 Heddo barra'a arishsho urjuwwatanna uuda gonpheennaxxeenna diidallo no'o'n jabaatta'ni me'iteemmaxxee yoona gantabe'non hiyyati godoba kultinnenne.

21 Manni heddo barra iteengeechchi hedhebaangi ture; tennexxee Phawuloosi ke'e uurreexxi insa'nee, «Koo mannaa! Ani hiyyeneexxa laqine'ee Qerxeesii'n ke'aa gophphinneele tinni miidhenshanna ba'ne silaati ha'noo'ni geltaammabaan. 22 Ta'atenna kaddoole mee co'oo hiyyee ha'noo gorsaannen; tenne markaba calla enqemaa malee ha'noo giddii'n mitte manjixxi lobbo midde baxxabaan. 23 Ani isike kadeennekinna magenoofataanneke Magenik, iimik erganji beno hashsha ani bira uurreexxi anee, 24 ‹Koo Phawuloosi, mee sodaati; ati Qeesaari edo uurra hassissaan; atinni welti me'a'neeka manna duuchchanna Mageni atixxee hiyyexxi lubbo insa'neexxa gatise'een› hiyyee ane'n kule'een. 25 Tennexxee koo mannaa sodaatinoqqe; Mageni tennee ane'ni kuleexxa yaane assaaxxa amanannon. 26 Kaddo malee'e, diidallo no'oo aaxxe mitte oddolike qaraqara'n iyyemarte hundaan.»

27 Tommenna sholigaxxe hashsha Adiryaxxe abbaayya hanna diidallo elqekayya no'oo raassa'naa hashsha wodhakiinbaa markaba oofammake manna'n buttinbaa shinqeechcho insa'ne'n labbeen. 28 Abbaayyatixxa dhi'mo mikatixxa wodaronna abbaayya giddi'a darbinee wodda wodi'inxi dhi'mo shoole tomme meetire qico kadde afeende. Shiixxoo qico turreexxi higgeenna wodaro darbinee wodda dhi'mo sase tomme meetre qico kadde. 29 Carete'n gannemmabaashsha sodaanteexxi shoole lumoxxa hoboloka uurrishatika sibljo markabii udumii'ni butti'a wocci assine; bogikinna soodo'a soodanta'nemman.

30 Markaba oofaammak manni markabi edi darre'ni uurrisatika sibilo butti'a woddi'i giddi'a wocci assa'neeshsha kadeexxi hobolo abbaayate'n dirrisati lumoxxe hobolonaa'n fuleexxi baajo'a yore. 31 Phawuloosinna dhibbiinke ajajallo'ninna loliinke manna'n, «Konne markaba oofaak manni ca'li hiyye markabi giddo ofo'laa gophoole ha'noo ba'netenaa'n gata dandetinabaan.» 32 Eettene yanna iikki loliink manni hobolo usurendemmaxxa wodaro kuteexxi hobolo ibbe wodii hana shelleellisso'a waale.

33 Bogi soodo'a shiqeemma wodda duuchchiingi ita indaashsha Phawuloosi insa'nee hiyyeexxi kadhatee qici, «Mittelchonna itinebaangi heqqeexxina'n turtineexxenni telchi tommenna shoolgaxxe barran. 34 Tennexxee midha itino'a ha'noo kadhataannen; tinni ha'no'aa uduudake kaddaan. Mitti ha'nooke umik ordichchinna midde ba'abaan.» 35 Tenne hiyyeechchi uduma kebboo adhe'e duuchchiinge manni edo Mageno galateefatati shaashateexxi itate'n ke'e.

36 Eettene yanna duuchchiingi dayyeefateexxi sagale ita ite. 37 Markabi giddo hedheemmak duuchchiingi lame dhibbanna torbaane tommenna jaane manjomman. 38 Duuchchiingi iteexxi goddeechchi uduma fe'endeemmaxxa dinne abbaayya giddi'a hunati markaba shollinshe.

39 Bogi soodee wodda genneemmak buttini habate kadeexxa egeneemmabaan. Yaane kinni buttiinxe oddo'n shatte e'yiteexxe abbaayyake qarqara'n maanchi hedheexxa bakka tama assine anfeexxi, dandeennoole lumoxxa hobolo ookko geessinso'a mudhdhinne. 40 Tennexxee markaba uurrishatika sibiluwwa tinkee abbaayyati giddi'a wocci assine; eetteneenni yanna shafisuwwa usurremmaxxa woddaruwwa tinke; ookkonneechchi uduma lumoxxa abbaayya diidallo dhiibeexxi kasake'n geessissaashsha hobolotika edi darreka shara iimi'a qeernse ba'lataasha assine. 41 Yaane kinni iikki markabi tullubememmake mancha'n ganendeexxi butta gelte; hobolo albi darree'n maanchi giddo lixxeexxi lele'ma gophphe; Tennexxee hoboloti udumi darre kinni diidallo jaba qicinni gandeemmaxxee enqemate'n kexxe. 42 Loliink manninna usuremeemmake manninaa'n mittikinna daakeexxi baaje fulabaashsha manna shinna shinno'a mudhinne. 43 Iikki dhibbiink ajajalli kinni Phawuloosi'i anjira hasemmaxxee hendemmaxxa assinabaashsha insa'nee hoyye. Daaka dande'ak manni markabakenaa'ni utaala'n ediseexxi abbayyatenaa'n buttinbaa fulaashsha, 44 weli gateek manni kinni becuwwatenaa'n yookaan wele wele markabiink enqemalchuwwi ha'na hedheexxi fulaashsha ajaje. Konne qicinni no'o duuchchiingi nage'ik abbayyatenaa'n buttinake'ni gennenne.