1 Antsookiyixxe Mageniinxe tuuta giddo wabeekonna barachchiisalluwwi hedheemman. Insa'nenna Bernabaasi, iikki Xilloke hiyyemeek Simi'ooni, Qereenake qachchik Lukkiyoosi, bogiinka galchallo Heeroodisinni welti mitteba nophpheeke Minaaheenna Sa'oolitemmani. 2 Insa'nenna Gootta magenoonfanta'naanna agabo goddo honsaa'naa Woyyichchi Hafuur, «Ani insa'ne'e fi'lenneexxe huje'a ha'no Bernabaasinna Sa'ooli'i ani'a gargari fowwe!» hiyye. 3 Insa'nenna agabo goddo honsenna soodanteechchi uduma anga ifixxa insa'ne hana uggineexxi me'inaashsha assine.

4 Barinnaabaasinna Sa'ooli Woyyichchi Hafuurinni ergemeexxi Selewuqiya'a me'ine; insa'nenna ookko'ni hobolote'ni ofolleexxi Qophphiroosi'a me'ine. 5 Selamiisika qachcha gennee wodda Ayihudiinke magenoonfachchotike mine'n Mageniinka hiyyichcho barachchiinse. Maarqoosi hiyyemeek Yohaannisi insa'ne'n welti hedheexxi insa'nee gargaara'neemman.

6 Insa'nenna Qophphiroosika oddoola mitte kasanaa'n mitti kasi qico'n me'ineexxi Phaafu gennee wodda, ookko Beriyesuusi hiyyemaaka mitti moraaka Ayihudichcho anfe. Isi dharichcha wabeekichchommna. 7 Kunni manjichchi Sergiyoosi Phawuloosi hiyyemaake qalbaamessa boga galchallo manjichchinni welti hedhemman. Kunni boga galchalli Mageniinka hiyyichcho laqo'aa haseexxi Bernabaasinna Sa'oolii'i ye'ise. 8 Yaane kinni Girikeke laagadinni «Elimaasi» hiyyemee ye'emaaki moralli Baariyessuusi, iikki boga galchaamak amanabaashsha haseexxi Barinnaabaasinna Sa'oolii'i morome. 9 Ookkonneechchi uduma Phawuloosi hiyyeemmeek Sa'ooli kinni Woyyichchi Hafuurinni wo'me'e konne manjichcho dhaphphi hiyye uudeexxi hiyyee qici, 10 «Ati bada durriissiink belti qullumatike naaphi, shokkonna fuggoxxi yaane duuchcha ate'ni wo'mite'eek, toggichcha Mageniinka ora dassatenaa'n higgabeexxo? 11 Mageniinxi anga ate'e gandaan. Ati balla'ake kaddaton, konneechchinni edi'a arshotinga ifa midde uudaboxxon.» Hirbange'ni Eelimaasixxa ille dukkanatinna hurre buqqe. Isinna anga isixxa abideexxi akeekaa manjo ookkone qarqara'n halsate'ni ke'e. 12 Kunn boga galchammaak manjichchi tenne kaddeexxa yaane uudee wodda, Goottiinxa barachchiisa saadeeexxi Yessuusi Kirsitoosi'ni amane.

13 Phawuloosinna jaaluwwi isik Phaafunaa'n ke'neexxi Phinfilya hexxeexxe Pherge'a me'ine. Ookkoo Maariqoosi hiyyemeek Yohaannisinna insa'nenaa'n gargariti higeexxi Iyyerusaalemi'a illee iima hige me'e. 14 Insa'ne kinni Phergenaa'n ke'neexxi Phisidiya giddo hexxeexxe Antsookiya'a me'ine; insa'nenna Edike Sanbatiinxa barra Ayihudiinke magenoonfachchotike mine'ni marre ofolle. 15 Muusek seerkinna wabeekotik maxaafi haasessemeechchi uduma Ayihudiinke magenoonfachchotike miniki sooresuwwi, «No'oke dayyuwwaa! Arda dayyeesaaka gorsiinka haaso'a affino'oole haaso'we!» hiyya'n Phawuloosimmaba'a manjo erge.

16 Tennexxee Phawuloosi ke'e uurreexxi anga le'misa'n arda hiyyee qici: «Ha'no Isira'eelik manninna Mageno sodaatinak duuchchi laqqe! 17 Konne Isira'eelike ardik Mageni annuwa no'oka fi'leen; isi Gibtseeke boga'n he'nee'naa'a insa'nee kubbise; jabaxxe ifixxe hirrenninna ookko'ni insa'nee fulche. 18 Shoole tomme wogga qici'aanna qiilla gammoojjeke boga'ni insa'nee ba'edheen. 19 Mageni torbaane mootummaka arda Kenaanike boginaa'n balleeseexxi insa'neka boga Isira'eelike ardi'a dhaalchiseeni. 20 Tinni duuchcha muuxendeek shoole dhibbanna onde tomme wogga qico'nitemman.

«Ookkonneechchi uduma wabeekichcho Saamu'eelike bari qico'ni hayyoole insa'ne'a uwween. 21 Ookkonneechchi uduma ardi moyanjo insa'ne'a filaashsha Mageno kadhate; Magenikinna Biinyaamike gosati minika manjo Qiisika belto Sa'oolii'i shoole tomme wogga'aa insa'ne'n moyanjoke asse. 22 Isinna Sa'oolii'i hoyyeechchi uduma Daawwiti insa'nen moyashsha asse. Magenikinna Daawwitixxee baassa'n hiyyee qici, ‹Fedhi anxa duuchcha assaaka anxe qalbeka manjo Isseyika belto Daawwitii'i alfe'eennen.›

23 «Magenikinna addachchiiseemmashanni konne manjichchixxe hortena'ni anjiralloke kade'eeka Yessuusi'i Isira'eeli'aa iyyedage. 24 Yessuusi dagebaa edi gama Yohaannisi Isira'eelike ardi'a aadde aagatixxa xamaqa lalabe. 25 Yohaannisi huje biro'a shiqeemma wodda, ‹Ha'no anee ayyete hitinaa'ne? Aniqqa isoteba'a; yaane kinni Ani isixxe kopheka usurra tikatee midde geyyabe'nok, ani udumii'n dagaan› hiyya'nemman.

26 «Ha'noo Abirihaamixxe hortena'ni ilendineek dayyuwwinna ha'noo Mageno sodaatinaake ardaa! Kunni anjirenshatik hiyyichchi ergemeek no'aateni. 27 Iyyerusaalemi giddo hedhammak manninna sooresuwwi insa'neek Yessuusi'i ege'neemmabaan; ege'na gonpheemmaxxeenna edike Sanbata Sanbatuwwa'n haasesseemaak wabeekotik hiyyichchi muuxemo'aa iso'ni murre. 28 Insa'nenna reyotee isoo geessisaaxxa yaane iso'n afa gonphoolenna midde reyotixxa murte iso'ni muro'a Philaaxoosi'i kadhanteen. 29 Insa'nenna isixxee borreessendeexxa yaane duuchcha muunxechchi uduma isoo fannotenaa'ni dirrinseexxi moonge. 30 Yaane kinni Mageni isoo reyotenaa'n ke'isse. 31 Geliilaa'n Iyyerusaalemi qico isinni welti hedhemmake manna'n heddo barra leelle; insa'nenna ta'a ardakee isixxee dhugaa kulaan.

32 «No'onna Mageni no'oke edike annuwwi'a addachchiisemmaka eloxxe odoke hiyyichcho ha'no'aa lallabaannen. 33 Mageni Yessuusi'i reyotenaa'ni ke'issiyyoti isi insa'ne'aa addachchiisemmaka hiyyichcho ta'a no'oo'o oose insa'nexxee muuxe'een: tinninna langaxxe faaro'ni hiyyende borreseendee qici:

« ‹Ati anke Belton;

techcho ani atee i'leennen›

34 Iittanni isi alo'abaaxxanna Mageni isoo reyotenaa'ni ke'issaaxxa kokeessatee hiyyee qici:

« ‹Woyyitetanna addatendeexxa Daawwitixxa eebba ha'no'aa uwwannon.›

35 Higgeeni wele faarotike maxaafa'ni:

« ‹Ati woyyichcha belto atika alo'aashsha assitabexxon› hiyyende'eeni.

36 «Daawwiti ifike baro'n Mageniinxe fedhee'aa ergatemmeechchi uduma reyedheen; annuwwa ifikenni weltinna moogemee'naa maali isiki alo'eedheen. 37 Yaane kinni Mageni reyotenaa'ni ke'isseemmaka isoo ookkonee ijjenda alo'aa geltebaan.

38 «Yoona anke dayyuwwa cubbotee gattowwaali afendaaki Yessuusi darree'nite kaddeexxa ha'no'a lallabendeexxa ege'ne! 39 Iso'ni amanaak duuchchi Muusek seeri darre'ni alfa dande'endebaaxxa qullumma alfaan. 40 Tennexxee wabeeko konnechchi butta hiteexxi borreessiteemmaxxi yaane ha'no'ni geltabaasha heqqedhe!

41 « ‹Ha'noo tuffatina'neek uuddee!

Mambe'a hitinenna ba'wee!

Ayyinna ha'noo'ni haaso'eele

Ha'noo amandinabaaxxa huje

Ani baro ha'nooke'ni hujannon.› »

42 Phawuloosinna Barinnaabaasi Ayihudiinke magenoonfachchotike minenaa'n fullee wodda manni «Dagaaka edi Sanbatanna ha'no daggineexxi tenne yaane higgeeni no'o'ni kulle!» hiyyeexxi insa'nee kadhate. 43 Ayihudiinke magenoonfachchotike minki ya'i xeeremee wodda, heddi Ayihudiink manninna iittanni Ayihudummatixxe amanaba'a higeexi Mageno magenoonfachchote'n jabaateeki manni Phawuloosinna Bernabaasii'i hordofe. Phawuloosinna Barinnaabaasi konne manna barachchiisat Mageniinke badhaadha'ni jabaanteexxi he'naashsha insa'nee gorsine.

44 Langaake edi Sanbatixxe barra'ni qachchi giddo hedheemmaake manninaa'ni heenooki manni calli gate'naa'a duuchchiingi Mageniinka hiyyichcho laqo'a bukki hiyye. 45 Ayihudiink manni ardiinxa birasaa'ne uudee wodda foggoxxe gaabbenni wo'meexxi isika haaso'a moroma'ni Phawuloosii'i yowwa'nemman.

46 Ookkoneechchi uduma Phawuloosinna Bernabaasi afo'o wo'mine hinee haasonee qici: «Mageniink hiyyichcho no'o sirete'ni ha'no'aa kula hassisaan; ha'noo kinni adhdhinabe'no hitineemmaxxeenna duuchchi woddixxi hedho ha'no'aa hasissabaashsha ha'noo umo ha'nooke'n murtineemmaxxee no'o Ayihudake kadebaake mannibaa alba wirri hinannon. 47 Gootti no'o hiyyee ajajee qici:

« ‹Butta duuchchik manni atinni anjiremaashsha

Yihudake kadebaake manni'a atee ifake assenneen.› »

48 Ayihudake kadebaaki manni tennee laqee wodda tenne'ni gammade; Goottiinka hiyyichchonna ullfeesse. Duuchchi woddixxe hedho'aa filemeek duuchchinna amane.

49 Goottiink hiyyichchinna ookkone boga duuchcha'ni ba'laate. 50 Yaane kinni Ayihudink akeekisanjuwwi Ayihudiinxa amana hordofammaxxa ulfeessendeexxa melaallenna qachchi giddika lumollamma manna Phawuloosi'ninna Bernabaasi'n diiniki ke'issineexxi boga ifikenaa'n insa'nee shorrinshe. 51 Tennexxee Phawuloosinna Barinnaabaasi no'o darrexxa bidhineenen hina'n ifixxe lekkaxxa buko ganga'nineexxi Iqoniyooni'a me'ine. 52 Hordofeeyyetinna gammashshotinna Woyyichchi Hafuurinni wo'mite.