1 Phawuloosinna Sillaasi Anifiphoolisi'ninna Aphpholooniya giddii'n sa'neexxi Teseloonqe marre; ookkonna Ayihudiinke magnoonfachchotike mine hedhemman. 2 Phawuloosinna baratemmashanni ookkone Ayihudiinke magnoonfachchotike mine'n e'yeexxi weli duuka sase Edi Sanbaatuwwi'a Woyyichcha Maxaafanaa'n bariissa'n ardakee haaso'e. 3 Kiristoosinna rakko adhdhiyyo hasissaaxxanna reyotenaa'ni ke'a hasissaaxxa ifisa'n «Kunni ani ha'no'n lallabaannek Yessuusi isi Kiristoositen,» hiyya'nemman. 4 Mitti mitti Ayhudik manni laqemmaka konnee haaso'a adhdhiyyoti Phawuloosinninna Sillaasinni welti mitteba hinge; iittanni Mageno magenoonfataammaki heddi Girkeek manninna ege'nendeexxi heenobaaxxi melaalle haaso'a konne adhdhiteexxi insa'nenni mitteba hinge.

5 Ayihudiink manni kinni gaabbeexxi, baashe manna dikkotenaa'n bukki assine qachchi giddo weekensha ke'issine; Phawuloosinna Sillaasi'i iyyedangeexxi ookkone arda'n shiqishatee Iyyasoonike minibaa mudamma'n me'ine. 6 Yaane kinni insa'nee afa dandeeneba'a; tennexxee Iyyasooninna wele amaanye dayyuwwa ookkone qichchike baallomike mannibaa harkisa'n «Kunni butta duuchcha daasseki manni ta'a no'oba dage'een. 7 Iyyasooninna insa'nee ifike mine'n adhdhe'een; insa'nenna, ‹Yessuusi hiyyemaak weli moyanji hedheen› hina'n Qeesaarika ajaja xaa'nina'neen.»

8 Ardikinna qachchiinke baallomik manni tenne laqee wodda raanke. 9 Iyyasooniinna ookkone wele manna waase ye'inseexxi wocci assine.

10 Iikki woddi amaanye dayyuwwi Phawuloosinna Sillaasi'i hashsha Beeriya'a me'inaashsha asse. Ookkonna gennaa wodd, Ayihudiinke magnoonfachchotike mine'n e'yine. 11 Beeriyya hedhemmak manni Teseloonqe hedhemmake manni irra wodani insa'neek banemeeke kadeemmaxxee hiyyichcho Mageniinka araada'emman; konnee Phawuloosi kuleeka Magniinka hiyyichcho kokeesatee barra barrande'ni Woyyichcha Maxaafa qo'nisa'emman. 12 Tennexxee insa'nenaa'n heddi manni amane; iittanni insa'nen welti egenendeexxi Girkeexxi melaallenna heenoobaak Giriikik labballi amane. 13 Teseloonqe hedhemmak Ayihudiink manni kinni Phawuloosi Beeriyake boga'ni Mageniika hiyyichcho lallabeexxa egeenee wodda manna tirtirsina'ninna loli ke'aashsha assina'n ookko'a me'ine. 14 Ookkone wodda amanye dayyuwwi rakeexxi Phawuloosi abbaayyati qarqari'a me'aashsha assine. Sillaasinna Ximotoosi kinni ookko Beeriyaanni gante. 15 Phawuloosi geegesseeki manni Ateena qico'ni isoo geessise. «Sillaasinna Ximotoosi rankeexxi anba'a dangowwaal» hiyyaaka Phawuloosika ajajika dhaansa aa'neexxi Beeriya'a illee iima hinge.

16 Phawuloosi Ateena hedheexxi Sillaasinnaa Ximootoosi'i heqaa'ni qachchi giddo magoonfachchotixxi fakkuwwa wo'miteexxa uudee wodda irri isoo jinne. 17 Tennexxee is Ayihudinke magenoonfachchotike mine'n Ayihudiinke mannininna Mageno magenoonfatammake wele manninni welti, ittanni dikkotixxe bakka'n barra barra'n afemammake manninni welti haaso'a'emman. 18 Epikurositonna Istoyikooto hiyyemaake beekkumike manni giddii'n mitti mitti isiba'a dangeexxi insa'ne moroma'emman; mitti mittikinna «Isi kunni maa hiyya'n lallaba'neechcho?» hiyyaa wodda, weli kinni, «Haaroke magenuwwixxe yaane haaso'a'neeke labaa'neen» hiyya'emman. Tenneenna hineechchi, Phawuloosi Yessuusixxeenna reyotenaa'n ke'atixxee eloxxa odo lallabemmaxxeeten. 19 Ariyoosifagoosi hiyyemaake booncho'ni Phawuloosi'i aa'nee mareexxi «Tinni ati barachchiisaetexxi tinni haarooxxi barachchiisa maachcho kadeexxa egennonnaa hansaannen. 20 Mitte mitte haarooxxe yaane no'o'n laqisaa'eten; tinni yaanuwwa maachcho kaddeexxa kinni egennonnaa hansaannen» hine. 21 Tenne hineechchi Ateenak manninna Atena giddo hedhaak alagi manni duuchchi yanna ifixxa sa'isinaammak harooxxa yaanexxee haaso'iyyotitenna laqiyyotite malee wele yaane'nite'n kada gopheemmaxxeten.

22 Ookkone wodda Phawuloosi Ariyoosifagoosi bukki hiyyeeke manni edo uurreexxi hiyyee qici: «Ha'noo Ateenake manna! Duuchchinni ga'mi'ni magenuwwa magenoonfachcho eettina'neeke manna kaddineexxa uuda'ennen. 23 Tinninna, ani ha'nooke qachcha'ni mammareemma'n ha'noo magenoonfatina'neechchuwwa uudennee wodda, ‹Ege'nemebaake Mageni'a› hiyyeme borreessemeeka tolchimalcho afeennen; Yoona, ta'a ani ha'no'aa kulaannexxi hano konne egendinebaangi magenoonfatina'neeke Magenixeeten. 24 Isi butta duuchchanna buttate'ni hedheechcho duuchcha dadeeken; isi iimikinna buttiki Gootti manji ijaareeke galmuwwa'n hedhabaan. 25 Hedhotanna hafuura, wele yaane duuchchanna manji duuchchi'a uwaake kadeemmaxxee mitte yaannenna isi'a xe'yitaaxxi hedha gopheemmaxxe manjiinxe angak gargaarsi isi'a hasisabaan. 26 Isi manjiinxa sanne duuchcha mitte manjonaa'ni dadeexxi boga duuchcha'ni he'naashsha asse; he'naake barrixxa qixxenna he'naaka boonchuwwa insa'ne'aa mure. 27 Tenneenna asseechchi, manni Mageno halseexxi, akimagaada isoo alfa dande'ashshaten. Kaddo malee Mageni mitte mitte no'ongenaa'ni bayyate'ekebaan. 28 Tinninna kaddeechchi ha'noki meelliinke manni giddii'n mitti mitti ‹No'onna oose isixxen› hiyyemmashsha, ‹no'o hedho alfineennek, lele'minannekinna he'nennek isinnite kaddeemmaxxeeten› hine.

29 «Yoona no'oo isixxe oose kandeennechchinni Mageni manjiinxe angaxxe oggenninna heduminni hujendeexxe worqexxa, yookaan birretik sibljixxa, yookaan kinjijiinxa misile fakkaataan hine no'o hediyyo hasissabaan. 30 Yoona Mageni iitta hedheeka haakitinka baro ossunteti sa'edheen; ta'a kinni boga boga duuchcha'ni hedheeki manni duuchchi aadde aagaashsha ajajje'een. 31 Isi fileeke manji darree'n buttike manjo duuchcha'ni dhugaatixxa murte muraaxxa barra mudhe'een; isoonna reyotenaa'n ke'issat manjo duuchcha'n tenne kokeesse'een» hine.

32 Reyotenaa'ni ke'ate hiyyemeeka haaso'a lanqee wodda mitti mitti gacifate; weli kinni «Konne yaada wele barra langaxxa haasote'na'a lanqoona'a hansa'ennen» hiyye. 33 Eettene yanna Phawuloosi eettene bukki giddii'ni fuleexxi me'e. 34 Mitti mitti manni kinni Phawuloosi hiyyeexxa adhdhate amane; amaneeke manni giddii'n Ariyyosifaagoosixxe tuutaxxe gamo kade'emmak Diyonasiyoosi hiyyemaak manjichchinna Deemaarisi hiyyendaaxxi manjichchonna wele manninna hedhemman.