1 Ookkonneechchi uduma qeesetik sooresi Isixxifaanoosi'i hiyyee qici, «Isi tinni hiyyenda'neexxi yaane dhugaandee?» hiyyyexxi qore.

2 Isixxifaanoosinna hiyye hiisse haaso'ee qici, «Anke annuwwanna anke dayyuwwa ani hiyyaannexxa laqqe; anni no'oki Abirihaami Karaani me'eeba edi darre, Mesiphexoomiyanni hedhee'naa Ulfiniiki Mageni iso'ni leelleexxi, 3 ‹Boga atikanna arda atika waaldettexxi ani ate'n leellishshannoke bogibaa me'i!› hiyye.

4 «Tennexxe isi Kelaaditotike boganaa'n fuleexxi Karanike boga'ni ofo'le. Anni isik reyechchinni udumi'a Magen isoo Karaanike boganaa'ni fulcheexxi telcho hexxina'neeke bogiba'a iyyedage. 5 Kaddomalee lekka uggaanga qadaada midde isi'a uwwemabaan. Konne boga isi'aanna isixxe sanne'aa uduma qadaadake asseexxi uwwaxxa kinni isi'a kako ageemman. Mageni tenne kako aagaa wodda Abirhaami oose i'leemmaba'a. 6 Mageni Abirhaami'i: ‹Horte atixxi wele mannike boga'ni marteexxi hexxaan; ookkone boga'ni shoole dhibba wogga garbaake asse'nee insa'nee miinicaan. 7 Yaane kinni garbumaati insa'nee galchemmak ardi mura woxashsha assannon; insa'nenna ookkone boginaa'n fulleexxi konne booncho'ni anee magenoonfantaan.› 8 Ookkonneechchi uduma Mageni Abirihaami'a beessisake kaddo'a jila ofo'latixxa kako uwween; Abirihaami Yisaaqii'i i'lemmaxxee saddeetixxe barra'ni jila ofo'lsheen. Iittanni Yisaaqi Ya'iqoobi i'le; Ya'iqoobinna tommenna lame gosati minika annuwwa i'le.

9 «Isira'eelixxe gosake minik annuwwi Yooseefii'i fuggoxxe gaabbenni gaabbemmaxxee Gibtseeke boga'ni garbummatee gurgure. Yaane kinni Mageni isinni welti hedheemmaxxee, 10 isoo rakko duuchchanaa'ni fulche. Isi Gibtseeke moyanjii edo elletanna beekkuma uwwemmaxxee moyanji Feri'ooni Gibtseke boga'ninna ifike motommatike mine duuchcha'ni ajajalloke asse.

11 «Gibtseeke'ninna Kenaanike boga duuchcha'ni lumooxxa rakko idageeki solo'i kadee wodda, annuwwi no'ok indaachcho alfa dande'eba'a. 12 Ya'iqoobi Gibtseeke boga'n midha hexxeexxa laqee wodda sirete'n annuwwa no'ka ookko'aa erge. 13 Insa'nenna langaxxa Gibtse'aa me'inee wodda, Yooseefi ifike dayyuwwa'n ayyumma ifixxa kule, Feri'ooninna Yoosefike firixxa yaane ege'ne. 14 Ookkonneechchi uduma Yooseefi anna ifika Ya'iqoobinna ifika mini hado duuchcha ifibaa iyyedagise; insa'ne duuchchiing torbaane tommenna onde mannamman. 15 Ookkonneechchi uduma Ya'iqoobi Gibtse'aa me'e. Isinna annuwwi no'ok ookko'o renne. 16 Rensha insa'neeka Sekemi iyyemareexxi Abirihaami Emoorixxe oosenaa'n ifike maallaqinni hiremmake hirreesa'n moonge.

17 «Mageni Abirihaami'aa kakoti addachchisemmake bari muuxema shiqee wodda Gibtse hedhemmake no'oke mannixxi horte bira saxxa'ni me'ite. 18 Ookkonneechchi uduma Yooseefii'i ege'nebaak weli moyanji Gibtseeke boga'n moye. 19 Isinna arda no'oke'ni shokkoti ke'eexxi annuwwi no'oki illeexxa oose gadhi'a fulche hunna'na'a rertaashsha annuwwa no'oka wixixi asse.

20 «Eettene yanna'n Muuse ileme, isinna Mageni edo elle affeexxe dancha annomman; sase ageenjo anniinke mine'ni heqqema'ni tureexxi 21 isi gadho hunemee wodda Feri'oonixxi belto isoo affe. Isenna anno tennee adhdhiteexxi belto ifike assexxe nossexxe. 22 Muusenna Gibtseke bogika beekkuma duuchcha barateexxi haaso'ikinna hujeti jabaateeke kade.

23 «Muuse shoole tomme wogga wo'mee wodda dayyuwwa ifika, Isira'eelixxa oose mareexxi uudo'aa mudhdhe. 24 Isinna mitti Gibtsek manji dayyuwwi giddii'ni mitteke'ne fuggoxxa assa'naa uudeexxi Gibtsichcho shiyeexxi ookkone miidhememmakixxa halo fule. 25 Mageni isi gami'ni insa'nee garbummatenaa'ni fulchaaxxa dayyuwwi isik ege'neechcho iso'ni labbeemman. Yaane kinni insa'ne tenne ege'na gonphe. 26 Langa baro gorsa lami Isira'eeliki manni weli'aanni weli lolemaa'naa afe'e araarso'a hasseexxi, ‹Koo mannaa! Isi ha'no dayyuwwange kaddineexxi mayee loleendinaa'ne?›

27 «Yaane kinni iikki dayyo gannammaak manjichchi Muuse'e gamake'ni dhiibeexxi, ‹Atee no'oo galchitatoshanna no'o'n murtatoshsha asseeki ayyete? 28 Bereqe Gibtsichcho shilteteshshanni annenna shiltotta'a hassaate?› 29 Muuse tennee laqe wodda Gibtsee'ni baaje'e Miidiyaamike boga'ni mareexxi alagake kade ofo'le. Isinna ookko'o lame labbaxxa oose i'le.

30 «Ookkone boga'ni shoole tomme wogga ofo'lechchi uduma Siinaxxe kooba bira qiilla gammoojje'n qosorro mitte'ni ha'yaneeke bubenji giddo iimik erganji iso'ni leelle. 31 Muuse tenne uudeexxi mambe'a hiyye. Isinna tenne yaane hubateexxi uudo'a maraa wodda Goottiinka haaso'a laqe. Goottikinna: 32 ‹Ani atike annuwwike Abirihaamike, Yisaaqikenna Ya'iqoobike Magenon› hiyye. Muuse tenne laqee wodda alayye roqoonseexxi uudatee sodaate.

33 «Ookkonneechchi uduma Goottikinna isoo hiyyee qici, ‹Ati kunni uurritetteki boonchi woyyomeeke kadeemmaxxee kophphe lekkatenaa'ni fulchedhi! 34 Ani Gibtseke boga'ni hedheeke anke ardika abara dhugaateni uudeennen. Insa'nee jaba qico rakkantee raarraa'naa laqeenen. Tennexxe Ani insa'nee anjironnaa dirre dageennen. Amo ta'aa! Ani atee Gibtse'a ergaannen.›

35 «Isira'eelik ardi Muusee ‹Ati no'oo galchitatoshshanna murte murtatooshsha asseeki ayyete?› hiyya'ni isoo gibeemman: kaddo malee'e Mageni konne Muuse qosorro giddo iso'n leelleke iimike erganji gammii'ni galchallokenna wodalloke asseexxi insa'neba'a isoo ergeen. 36 Isinna akeekeexxi insa'ne Gibtsee'n fulche; Gibtse, diimooxxe abbaayya'ninna qiilla gammoojje'n shoole tomme wogga maso yaanuwwanna mambe'a beessisuwwa asse.

37 « ‹Mageni anee ke'issemmashsha ha'noo giddii'n ha'no'a wabeekichcha ke'issaani› hiyyeexxi Isira'eelike manna'ni haaso'emmaaki, konne Muusen. 38 Isi Qiilla gammoojjeke boga'n hedheemmake ardinni welti, Siinaxxe kooba'ni haaso'emmaki iimik erganjinni weltinna iittanni annuwwa no'okenni welti hedheemman. Mageniinka hedhotika hiyyichchonna no'aa sa'isseek konne Muusen.

39 «Yaane kinni annuwwi no'oki isoo gareereexxi isi'a ajajema gibe; qalbe ifixxenninna Gibtse'a illee iima hinge. 40 Insa'nenna Aaroonii'i, ‹Kunni no'oo Gibtsee'n fulcheek Muuse maa kadeexxa egennebe'non. No'o edi edii'n me'aaka magenuwwa kexxe no'aa giissi!› hine. 41 Eettene yanna insa'ne jabbetixxe fakkexxa misile giissineexxi tolcha shiqinshe; ifixxe angaxxe huje'ninna gammande. 42 Yaane kinni Mageni insa'nenaa'ni gargarti hige; iimixxa urjuwwa magenoonfanto'aa insa'nee sa'isse uwwe; tinninna wabeekotike maxaafa'n hiyyende borreesendemma qici:

« ‹Koo ha'noo Isira'eelike manna shoole tomme wogga qiilla gammoojje'ni hexxinemma wodda

tolchakanna uwwa shiqishinemmak ani'atemmata?

43 Tenne irra ha'noo magenooffatino'aa giissexxineemmaka Molokika duunkaananna

ha'nooke dharichcha mageno,

Reefaamixxe urjexxa misile dulkitine me'itineen;

Tennexxe aninna ha'no booji'endineexxi Baabiloon widdo me'itinashsha assannon.›

44 «Mageni Muuse'n leellishemma qicishshanna ajajemma qicishsha giissemeemmak dhugaa kulatik duunkaani no'oke annuwwinni welt qiilla gammoojje'n hedhemman. 45 Anuwwi no'okinna ookkone duunkaana aa'neechchi uduma Mageni Iyyaasuxxe akeetenni shorrishshemmaka Ayihudake kadebaake mannika boga dhaalle wodda ookkone dunkaana abixxene e'yine; iikki dunkaaninna Daawwitike bari qico'ni ookkone bogi giddo hedhemman. 46 Daawwiti Magenii edo elle alfeexxi Ya'iqoobike Mageni'a mine ijaaro'a soodate. 47 Yaane kinni Magenokee mine ijaareek Solomoonitemman.

48 «Kaddo malee Lumok Mageni manjiinxi anga ijaarteeke mine'n hedhabaan. Tinninna wabeekichchi konneechchi butta hiyyee borreesse qicinniten:

49 « ‹Iima moote anxenni;

buttatinna lekka anxa uggudhannoban;

Iitta kaddeexxenni ha'noo ani'aa ijaartinaak mini hitta hedheeke?

Hiyya'neen Dada Duuchchiki Gootti

yookaan ani hafuura adhdhannobi habatetaa? Hiyyeexxi borreessemma qicishshaten.

50 Tenne yaane duuchcha hujenneeki anga anxennitebaata?› hiyya'neeni Duuchchi Woddik Gootti.

51 «Ha'noo halo callik qalbe duude'eekiir! Mansha ha'nooxxinna laqqabaak! Ha'noonna annuwwa ha'nookishshanni duuchchi wodda Woyyichcha Hafuura gareertinaan. 52 Annuwwa ha'noki giddii'n wabeeko shorrisheebaaki ayyete hedhee? Insa'ne ookkone qullichchixxa daga edisseexxi kuldeemmaxxa wabeeko shinneen; ha'noonna ta'a konne qullichcha sa'issitineexxi uwwati isoo shilltineen. 53 Ha'noo Iimike erganji gamii'n uwwemeeka seera adhdhitineemman; yaane kinni seera ookkonee heqqexinebaan.»

54 Songotixxe bukki'n hedheemmakiir tenne laqee wodda lumooshsha aarre; suummettanna iso'ni ga'me'ne. 55 Yaane kinni Isixxifaanoosi'ni Woyyichchi Hafuuri wo'mee'naa iimi'a dhaphphi hiyye uudaa wodda Mageniinka ulfinna, iittanni Yessuusii'i Mageniinke midda'n uurree'naa afe. 56 Isinna, «Kunnise, iima banedeenaa Manjink Beltinna Mageniinke midda'n uurre'naa afaannen» hiyye.

57 Eettene yanna insa'ne lumoshsha cancina'ni mansha ifixxa buqe'neexxi insa'ne duuchchiing mitteba ke'neexxi isibaa gongine. 58 Qachchakenaa'ninna harkinse gadhi'a fulchineexxi kinjki isoo cancaqqe. Iikki dhugaa kulemmakiirinna seemma ifi ifixxa Sa'ooli hiyyemaake dargaggeessi bira heqqashsha uggine. 59 Isxifaanoosinna kinjik cancaqema'inni hedheexxi, «Gootta Yessuusii! Lubbo anxa adhdhi» hiyya'n soodate. 60 Ookkonneechchi uduma isi gulufateexxi, «Anke Goottaa! Balleessa insa'neexxa laakkotoxxee hiyya'n hafuura gikki asseexxi raare» Isinna tennee hiyyeeshanni reye.