1 Hanaaniya hiyyemaaki mitti manjichchi Sephphira hiyyendaaxxe ifixxe arenni welti boga gurgure. 2 Are isixxi egendee'naanni bogi gurguremeeke maallaqinaa'ni gamisa gatise'e wele iyyedageexxi ergameeyyetixxe lekka hunda ugge. 3 Ookkonneechchi uduma Pheexiroosinna, «Koo Hanaaniya, Woyyichcha Hafuura'ni dhara haasotattoshshanna bogi gurguremeeke maallaqinaa'n gamisa gatissattoshsha duurrisi atixxxe qalbe'n mayee wo'mee? 4 Boga gurgurtebexxo edo iikki bogi atingemmabaa? Gurgurtettelchinni uduma maallaqikinna atingemmabaa? Iittate kaddeexxenni tenne yaane hujiyyotee mayeeta qalbe atixxe'ni heddetee? Dhara haasotettek Magenoke'nite malee manjoke'nitebaan» hiyye. 5 Hanaaniya konne haaso'aa laqee wodda butta ibeexxi reye. Tenne yaane laqeeki manni duuchchi lumo qico sodaate. 6 Dargaggeeyye dagge rensha isika mirqite iyyemarte moogge.

7 Sase saatenni udumia Hanaaniyyaxxi are ookko'aa dagge. Isenna aro'oo iseke'ni gelteexxa yaane egendemmabaan. 8 Pheexiroosinna isee'e, «Amo ane'ni kuli, boga ha'nooka gurgurtineeki konne maallaqa'ni calla?» hiyye. Isenna, «Eetti konne qiconi» hite.

9 Tennexxee Pheexiroosi ise'n hiissexxi, «Goottiinka Hafuura hega uudino'aa atinna atiki aro'i mayee mitte afo'oo kaddinee? Aro'oo atika mooge higa'neeki manni kunni hulande'n hedheeni; ateenna iyyemare moogaan» hiyye. 10 Isenna hirbange'n Pheexxiroosixxe lekka hunda ibbe rerte. Dargaggeeyye mini'aa e'yitaa wodda isee rerte'naa afeexxi iyyemarte iseke aro'i moogi bira iseenna moogge. 11 Mageniinxe tuuta duuchcha'ninna tennee yaane laqeeke manna duuchcha'ni lumooxxi soda'aa kadde.

12 Heddo mambe'uwwinna beessissuwwi ardiinxe oddo'ni ergameeyyetixxe anga'ni hujema'nemman. Amaneeki duuchchi mitte qalbenni mammarenshatixxe Solomoonixxe soro hiyyemaake booncho'ni bukki hiyyemmani. 13 Insa'ne gadhi darre hedheeke mannanaa'ni mittikinna insa'nenni welti karseme mitteke kado'a shenne hiyyaammak ayyinna midde hedhemmabaan. Kaddo malee manni insa'nee ulfeesa'nemman. 14 Goottake'n amaneeke labbakikinna meyyakiki laakkoosi lumo qico lebema'ni me'aamman. 15 Tennexxee dhibemeeka heddo manna orinbaa fulchina'ni algake'ninna rarete'n diiphisa'nemman. Tennenna iitta assineechchi Pheexiroosi ookkone ora sa'aa wodda gaadido isixxi midde insa'ne'ni hana gaadise'naa fayyino'atemman. 16 Iyyerusaalemi qarqara hedheeke qachchuwwanaa'ni dhibemeekaranna fuggichchi hafuurinni abara uudammakaara iyyedanga'n manni bukki hiyya'emman; iyyedangemak manni duuchchinna fayya'emman.

17 Qeesetik sooresinna isinni welti hedhemmake Seduuqitotixxi gamo duuchchi fuggoxxe gaabbe insa'ne'n wo'mitee'naa 18 ergameeyye abindeexxi usurinke mine'ni e'yinshe. 19 Yaane kinni eettene hashsha iimik erganji dage usurriinke minixxa hula bane insa'nee fulcheexxi 20 «Marre, Woyyichchi Galmi giddo uurritineexxi konnee hedhotika hiyyichcho duuchcha ardake'n kulle!» hiyye.

21 Ergameeyyetinna ajajemmeexxi gorrsaan Woyyichchi Galmi giddi'aa e'yetteexxi barsiisate'ni sanfe. Ookkone wodda qeesetiki sooresinna isinni welti hedhemakiir dangeexxi songotixxa gamonna Isira'eelixxa geedhe duuchcha bukki assine; ergameeyyetanna insa'ne'a iyyedangaashsha manna usurriinke minibaa ergine. 22 Yaane kinni ergeme mareeki manni usurriinke mine'ni ergameeyye gonphe illee iima hinge dangeexxi 23 «Usurriinke minixxi hula jaba qicinni danqarendemman; heqqaammakiiruwwinna hulati edo uurre'naa anfeennen. Usurriinke minixxi hula bannanno wodda kinni mini giddo mittekanna anfebe'non» hine kulle. 24 Woyyichcha Galma heqqaammakaara ajajammakinna qeesetiki sooresuwwi tenne lanqee wodda; «Tinni yaane maachcho hiyyote!» hiyyati mambe'aa hineexxi insa'nexxee hinaanxa gonphe. 25 Ookkoneechchi uduma mitti manjichchi dageexxi: «Laqqee! Usurriinke mine'ni e'yishinemmaki manni Woyyichchi Galmi giddo uurreexxi arda barsiisa'neen» hiyyeexxi insa'ne'ni kule.

26 Iikki woddi Woyyichcha Galma heqqaammakaara ajajammakinna ergameeyye mare insa'nee aadhe dage; insa'neenna aa'ne dangeek kinni ardi insa'nee kinjiki cancaqabaashsha sodaantemmaxxee insa'nenni hunnantetemmabaan.

27 Ergameeyye iyyedangeexxi songoti edo uurrinsee'na'a qeesetik umi insa'nee hiyye qoree qici, 28 «Ha'no Yessuusike summinni barsiisinabaashsha jabeessinennexxi ha'noo ajanjeennabaa? Ha'n'noqqa ta'a Iyyerusaalemi barsiisa ha'nooxxeni wonshitineen; ha'no ookkone manjichchixxe mundeexxee no'o qoremona'a hasinan'een.»

29 Pheexiroosinna wele ergameeyye hite hiissite haasotee qici, «No'o manjokee ajajemiyyoti irra Magenokee ajajemiyyote hasissaan. 30 No'oke annuwwik Mageni ha'noo haqichchi hana fannissineexxi shiltineeka Yessuusi'i reyotenaa'ni ke'isseen. 31 Isinna Isira'eelik ardi aadde agee'naa cubbo insa'neexxa gattowwaal hiyyo'aa Mageni Yessuusii'i duuchchiingike umonna anjirallo asseexxi midda ifike'ni ulfinnik ofo'lishe. 32 No'o tenne yaanexxee dhugaa kulan. Mageno ajajemaake duuchchi'aa uwweeki Woyyichchi Hafuurinna dhugaa kulaten» hine. 33 Songotixxi gedhee tennee laqqee wodda aarte bubbi hiteexxi ergameeyye shilto'a hasse. 34 Yaane kinni manna duuchcha'n ulfeessemee'eki Muuseke seeriike barachchiisallo kadeek Gemaaliyaal hiyyemaak mitti Feerisichchi songote'n urreexxi ergameeyye shiixxoxxe yanna'aa songo giddii'n fuldaashsha assino'aa ajaje. 35 Ookkoneechchi uduma songotixxa gamo isi hiyyee qici, «Isira'eelik mannaa, konne manna'ni ha'noo maa assa hassisaaxxa heqqedhdhee! 36 Konneechchi edi darre Tewodaasi hiyyemaak manjichchi, ani lumoke manjon hiyyeexxi ke'eemman; shoole dhibba geyaak manni isinni welti mittomeemman. Kaddo malee isoo shineen; hordofeeyye isixxinna midde xexxeerendeeshshanni gatte. Yaadi isikinna woyi fulebaake kade. 37 Ookkonneechchi uduma ardi laakkoo'eme sane Geliilak Yihuda ke'eexxi heddi manni isoo hordofaashsha asseemman; isoonna shinneeni. Isoo hordofammaki duuchchi xexxeremeen. 38 Yoona ta'a ani ha'no'ni hiyyaannexxi konne mannanaa'ni bayyatinaashanna insa'nee waaldinaashshaten. Mayee hitinoole; tinni yaane yookaan tinni huje manjinbaa'nite kaddoole kinni ba'a baxxaan. 39 Yaane kinni Mageniibaa'nite kaddoole insa'nee balleesiyyo dandeetinaba'a; akimagaada Mageniink welti ha'noo lolendinaan» 40 Insa'nenna Gemaliyaalika gorsa adhdhine ergameeyye ifibaa ye'neexxi jadhanfe. Yessuusike summinninna haranga haasonabaashsha ajanjeexxi wocci assine. 41 Ergameeyye kinni Yessuusike summi'a salphinne adhdhatee gelteemmaxxee gammanda'ni songotenaa'ni fulde me'ite. 42 Barra barrande'n Woyyichcha Galmi giddonna mine mine'n Yessuusi isi Kiristoosite kadeexxa barachchiisanna lallaba haranga uurriseemmabaan.