1 Insa'nenaa'ni gargarti hingeennechi uduma markabi giddo ofollenneexxi toggi hine Qoosi hiyyendaaxxe giddichchobaa me'ineennen. Langa xxa barranna Ruudixxe giddichchoba gennenne. Ookko'ninna Phaaxirake qachchibaa me'innenne. 2 Ookkoneechchi uduma Finqe'aa fooffa'neeka markaba anfe'e iso'ni ofollennexxi calli hine me'innenne. 3 Qophphiroosixxa giddichcho bita'i darre'ni gatinse'e Sooriya'a me'innennexxi Xiroosike qachcha'n dirrinnenne. Tinninna markabake'ni feeneemmaka fe'issa ookkoo dirrinsaammaxxeeten. 4 Ookkonna hordofeeyye anfennexxi insa'nenni welti torbaane barra turreennen. Insa'nenna Woyyichchi Hafuurinni akeekemeexxi Phawuloosi'n «Iyyerusaalemi'a martoxxe'e» hineexxi kulle. 5 Yaane kinni ookko turrannoxxi yanna muddee wodda insa'nenaa'n gargari hingenneexxi ke'ne calli hine me'innenne. Duuchchiinxi hordofeeyye ifi ifixxe aruwwanninna ifi ifixxe oosenni welti hexxeexxi ookkone qachchi gadhi darree qico'n no'oo geegeessite. Abaayyati qarqaranna guluffantenneexxi soodantenne. 6 Weli welinna nage'ik hedhdhe hinneennexxi markabi giddo e'yinnenne; insa'nenna ifi fike minbaa illee iima hinge.

7 Xiroosinaa'n ke'nennexxi me'ina'ninni Phexelemayisi gennenne. Ookko amaanye duuchchinni welti afeemmennexxi nage'a weli aa'nennechchi uduma insa'neenni welti mitte barra sa'issinnenne. 8 Langa barra gorsa ookkoo'ni fullenneexxi Qiisaariya'a me'innenne. Ookko'ni wengeellawichcho Filiphphoosibaa marreennexxi isinni welti isike mine'ni ofollenne. Isinna Iyyerusaalemi fileendeemmaxxe torbaanne daaqone giddii'ni mitti isotemman. 9 Filiphoosinna raaga haaso'aaka shoole dubbara afeemmaan. 10 Heddo barra'a ookko offollennechchi uduma Agaboosi hiyyemaak wabeek Yihudake boganaa'n dage. 11 Kunni wabeekichchi no'obaa shiqe'e Phawuloosika hanfaala aadhe anga lekka ifixxa usudhdheexxi «Woyyichchi hafuuri hiyya'nee qici, ‹Konne hanfalika anna Iyyerusaalemi hedheek Ayihudiink manni iitta usureexxi Ayihudake kadebaake manna'n sa'isseexxi uwwaan hiyya'neen› » hiyye.

12 Tenne lanqenne wodda no'onna ookko hedhaammaki manni Iyyerusaalemi marabaashsha Phawuloosii kadhantenne. 13 Phawuloosi kinni, «Iitta ooxxina'ni mayyee qalbe anxa hojoggi assitinaa? Ani Gootta Yessuusike summi'a Iyyerusaalemi usurema calla kaddebaak reyoteenna midde qixxeefatenneen» hiyye. 14 Isinna gorsa no'oka adhdha gibee wodda «Yoona Mageniinxe fedhiishsha kaddowwaalta'a» hine waallenne. 15 Ookkonechchi uduma qixxeeffantennexxi Iyyerusaalemi'a me'inenne. 16 Qiisaariya hexxeexxe hordofeeyyenaa'n mitte mitte no'onni welti dagge. Insa'nenna Minasoonike mine'n ofollannoshsha no'oo isike miniba'a akeenke, no'onna ookko ofolenne. Kunni manjichchi edise amaanemmaake Qophphiroosike bogike manjo kadaa wodda siretixxe hordofeeyyenaa'n mittekemman.

17 Iyyerusaalemi gennenne wodda amaanye dayyuwwi no'oo gammashshoti adhdhe. 18 Langaxxa barra Phawuloosi no'onni welti Ya'iqoobiba mare; Mageniinxe tuutaxxi geedhe duuchchanna ookko hexxemman. 19 Phawuloosi duuchchinga nage'a aadheechchinni udumi'a isixxe ergatensha darre'n Mageni Ayihudake kadebaake mannixxe oddo'ni asseexxa yaane duuchcha mitte mittendinni insa'ne'ni kule. 20 Insa'nenna tenne lanqee wodda duuchchingi Mageno galateffante. Insa'nenna ookkonechchi uduma Phawuloosi'n hinee qici, «No'oke dayyoo, heddi kuma'n laakko'endaaxxi amaanye Ayihudiinxe gosa'n hexxeexxanna insa'ne duuchchiing Muuseke seeri'a hinanfa'neexxa uuda dandetatton. 21 Ati'a Ayihudake kadebaake mannixxe oddo'ni hedhdhemmaka Ayihudiinka manna duuchcha ‹Oose ha'noxxa jila ofo'lishshinoqqe'e› yookaan ‹Ayihudiinke galdumi'a ajajjendinoqqe'e› hita'ni barachchiisati Muuseka seera jijjiiraashsha assitaaten hiyyenda'naa lanqe'een. 22 Insa'ne daga atixxa lanqaaxxi kokaken, ta'a no'o maa assa woyya? 23 Tennexxee no'o hinnanoxxa assi; no'oxxe oddo'ni werreega werreege'eek shoole manna hedheen. 24 Konne manna aaxxe insa'nenni welti luqqi hiyyatika seera muuxxi; insa'ne umo haaxxatee laqqemaaka maallaqanna uwwi; tenne assitottole atixxee odeesendeexxi yaane duuchcha dharake kaddeexxanna ati umo attingenninni Muuseke seeri'a ajajendeteke kaddeteexxa duuchchingi ege'naan. 25 Ayihudiinke manna kaddebaaxxe aamanye'a kinni, ‹Dharichchi magenuwwi'a tolchemeechcho ittinoqqe'e; mundetanna ittinoqqe'e; gorra'emebaak reyeeka hore biniinchika maala ittinoqqe'e; yabaabulletenaa'ni bayyaate› hine murreneke borreesa insa'ne'a ergineennen» hine.

26 Phawuloosinna langaxxe barraxxa gorsa ookkone manna aadhe mare; insa'nenni welti isinna luqqi hiyyatixxa aada muuxe; ookkonechchi uduma luqqi hiyyatixxi aada haano muuxendaaxxanna insa'nee duuchchingixxi uwwanna haano shiqqaxxa ege'nishatee Woyyichchi Galmi giddi'a e'ye.

27 Torbaaxxi barra mudo'a shiqqee wodda Issiyake aurjinaa'n dagemmaki Ayihudiink manni Phawuloosii'i Galmi giddo hedhe'na'a afeexxi arda diinik ke'issati Phawuloosii'i abideexxi, 28 hiyya'ni cancee qici, «Koo Isira'eelike manna, amme no'o gargaarre; arda no'oka, seera no'okanna booncho konnee gareera'n boga duuchcha'ni hedheeka arda duuchcha barachchiisa'nemmak konne manjon. Tinninna hanqatee'naa Girkeeka manna midde Woyyichcha Galmi giddii'a iyyeedagati konne Woyyichcha booncho battoseen» hiyye. 29 Insa'ne tenneenna hineechchi konnechchi edi darree Efeesoonike qachchik manji Xirofimoosi Phawuloosinni welti hedhee'naa qachchi giddo isoo uundemmaxxeenna Phawuloosi isoo adheexxi Woyyichchi Galmi giddo e'yeechcho insa'ne'n labbemmaxxeeten. 30 Tennexxee qachchi duuchchi weekkeme; Ardi duuchchi gonga'n mitteba dageexxi Phawuloosi'i abide harkisaa'ni Woyyichchi Galmi giddii'ni fulche; ookkonne hirbaa'ninni Woyyichchi Galmixxi huluwwanna cufende.

31 Iikki manni Phawuloosi'i shiyo'a hiyya'neenge'n Iyyerusaalemik qachchi duuchchi weekkemeen hitaaxxi erga Roomek loliinke mannike ajajallo'n gelte. 32 Isinna hirbaange'ni mitte mitte loliinka ja'laabuwwanna loliinka manna adhdheexxi adadde insa'neebaa gonga'n mare. Iikki manninna loliinke mannika ajajallonna loliinka manna afee wodda Phawuloosii'i gana waale. 33 Iikki Loliinke mannik ajajallinna Phawuloosiba'a shikki hiyyeexxi isoo abideechchi uduma isi lame haachchabinni usuremaashsha ajaje. Ookkonechchi uduma isi ayyete kadeexxanna maa asseexxa qore. 34 Ardi giddii'ni mitte mitte yaane hiyyaa wodda weli kinni wele yaane hiyya'nemmaa; ardiinke cancinaa'ni kexxeexxa iikki loliinke mannik ajajalli konne cancixxa dhugaatixxa yaane ege'na dande'a gopheemmaxxee Phawuloosii'i loliinxe kaanbeba'a aa'ne me'inaashsha ajaje. 35 Ardiinxe raankanaa'ni kexxeexxa Phawuloosi miniinxe hulake hadhisanjiba geyee wodda loliink manni Phawoloosii duke. 36 Udumii'n hordofaammaki ardinna, «Isi shiyemowwaal» hiyya'n canca'neman.

37 Loliink manninna eettene kaanbeba'a Phawuloosii e'yisho'a shiqee wodda Phawuloosi loliinke mannika ajajallo, «Mitte yaane ate'ni haaso'onnaa ani'a eetii uutato?» hiyye.

Loliinke mannik ajajallinna hiseexxi «Ati Girkeeka afo'o adda egende'ete? 38 Ati konne edo ardake'n lele'ma ke'issati shoole kuma manna adhitettexxi qiilla gammoojje giddi'a baajeetek Gibtsichchi atetebaata?» hiyye.

39 Phawuloosinna, «Aniqqa, Kilqiyake awuraaji giddo hedheeke ege'nemeeke Xerseesike qachcha'n ilemenneke Ayihudichchon. Konne arda'n haaso'ona'a ani'a eetii uwwi» hiyye.

40 Haaso'atee loliinke mannike ajajallinaa'n eeti alfeechchi uduma Phawuloosi hulatike ookkone qephphinna'ni uurreexxi angati ardi sammi hiyyaashsha qiphe; ardikinna sammi hiyyee wodda Ibirayisixike laagadinni insa'ne'n haaso'e.