1 Onde barranni udumi'a qeesetike umi qeesichchi Hanaaniya mitte mitte gedhenninna murtetika seera ege'neeke Xerxeluusi hiyyemaake xabaqichchinni welti Qisaariyaa me'e. Insa'nenna Phawuloosi'i ku'lnenneexxa ku'la bogiinka galchallo Filkisi'n shiqinshe. 2 Phawuloosinna ye'emeexxi dagee wodda, Xerxeluusi hiyya'n ku'le eettene shiqishee qici, «Ulifeessendeeteke Filkisii, atike galchatike baro'n nage'i lumoshsha no'aa afeme'een; atixxe lumoxxe qalbeefachchonna konne ardi'a jijjirensha iyyedage'een. 3 Ati lummoshsha ulfeesendeetek Filkisi, atixxa tenne eloxxa huje booncho duuchcha'ninna yanna yanna'n lumoke galatinni adhdhinannon. 4 Ta'a kinni ani atee lumoshsha turseebe'nongi harumaa qico'n ku'laannexxa yaane laqqotaa shaqqunteti atee kadhataanen. 5 Kunni manjichchi butta duuchcha'n hedheeke Ayihudi duuchchi giddo rakko ila'ni weekkensha iyyedaga'neeke, Naaziriito hiyyendaaxxe gamoke akeekisanjon. 6 Iittanni Woyyichcha galmanna battooso'a hiyya'neeke'n isoo abindeenen; no'oke seerishanna iso'n murrona'a hende'enan. 7 Yaane kinni loliinka manna ajajammaki Luusiyoosi dageexxi hunnati bute isoo adheeni; isoo ku'laaki manninna atiba'a dagaashsha ajaje.* 8 Yoona ati umo atinge'ninni isoo qorte qo'nissetexxi no'o isoo ku'lneennexxi yaane duuchcha dhugaate kaddeexxa kokeesa dandeetatton.» 9 Ayihudikinna, «Tinni yaane duuchcha dhugaaten» hiyya'n tenne ku'l'a weli aage.

10 Ookkone boga galchaammak Phawuloosi'i angati qiphe ye'eexxi haaso'aashsha asse. Phawuloosinna hiyya'n hiise haasoee qici, «Heddo wogga'aa konne boga galchiteteke kaddettexxa ege'neennaxxee ani ku'lemeennexxe yaaneka faachchefachotika hiissichcho ati edo shiqishanno wodda lumoke gammadinniten. 11 Ani sagadonnaa Iyyerusaalemi'a dagenek tommenna lame barra edi darre kadeexxa atinni umo atingeenninni shollaa qico'n koka dandeetattoni. 12 Kunni anee ku'la'neek manni Woyyichchi galmi giddo ayyinninna moroma'naa, yookaan Ayihudiinke magnoonfachchotike mine'n yookaan qachchi giddo hoone booncho'inna ardi weekkemaashsha assa'naa anee afebaan. 13 Ta'anna anee ku'linna'neexxi ku'la duuchcha dhugaate kaddeexxa kokessitaaxxa mitte yaanenna midde ate'n shiqisha dandeennebaan. 14 Kaddo mallee, mitte dhugaate kaddeexxa insa'ne ku'linna'neexxa yaane ate'ni farri asse kulonnole, insa'ne ifi darre'n dhariinke ora hineexxi henda'neeke ora'n no'oke annuwwika Mageno magenoofataanne. Muuseke seera'ninna wabeekotike maxaaffa'ni borreessendeexxa duuchcha amanaanne. 15 Aninna konne mannishshanni quliiyyetinna cubbaleeyye reyotenaa'ni kexxaaxxa Magenoke'n adde afeenneni. 16 Tennexxee Mageni edonna manji edo quliite sammo afonaa duuchchi wodda cichchanno.

17 «Iyyerusaaleminaa'n fulennexxe heddo wogga uduma hiyyeeyye anke ardixxee kadaaka gargarsanna Magenokee uwwendaaxxa uwwa aadhennexxi Iyyerusaalemi'a dagene. 18 Insa'ne anee Woyyichchi Galmi giddo anfeek konne luqqi hiyyatika seera assa'naate malee aninni welt bukki hiyyeek ardinna hedhemabaan; weekensha mittenna ke'issebe'no. 19 Yaane kinni Issiyake awuraajinaa'n dageemmaki Ayihudiink manni ookko hedhemman. Insa'ne anee ku'lina'neexxa yaane anfe'exxe kaddoole ati edo shinqeexxi haasonnowwaal. 20 Yookaan ani songotike ya'i edo shiqeenna wodda ane'n anfendeexxi balleesa hexxeexxe kaddoole kunni manni haaso'owwaali. 21 Ani insa'nexxe oddo'n uurreenna wodda ‹Ani telcho ku'leme ha'no edo uurreenneka reyeeki manni reyotenaa'n ke'aan hiyyennexxi hafuura gikki asse haaso'eeneke haaso'a kaddoole malee wele balleessa afebe'no.› »

22 Filkisi kinni Goottiinka ora adda ege'nemmake kadeemmaxxe'e «Loliinka manna ajajammaki Luusiyoosi daggaa wodda ha'nooxxe yaanexxa murte uwwannon» hiyyeexxi yaane wele barra'aa sa'isse. 23 Ookkoneechchi uduma Phawuloosi'a shiixxoka furga'aa uwwa'n isoo heqqashanna jaaluwwi isikinna isi'a hasisaachcho duuchcha aadhe dagaa wodda insa'nee hoyyabaashsha dhibba loliinke mannika ajajallo ajaje.

24 Heenoxxe barrani udumi'a Filkisi Diruusilla hiyyendaaxxe Ayihudichcho are ifixxenni welti dage. Isinna Phawuloosi ye'iseexxi Yessuusi Kiristoosi'ni amanatixxee'e isinaa'n laqe. 25 Phawuloosi qulummatixxe'e ifi hiratixxee, heger daggaaxxe murtexxee haaso'ee wodda Filkisi sodaateexxi, «Ta'a'a tinni gelte'een, me'i, ane'n eldaaxxe yanna'n atee ye'issannon.» 26 Filkis Phawuloosinaa'n matta adhdha haseemmaxxee heddo yanna ye'issa'ni Phauloosii'i yaansisa'nemman.

27 Lame wogga uduma Filkisixxe bakka'n Phorqiyoosi Fisixoosi tukkeesseme. Filkisinna Ayihudiinka manna gammachchiso'a Phawuloosii'i usurrange'n waale.