10 Yessuussi Edi Sanbatixxa barra mitte Ayihudiinke maganoonfachchotike mini giddo barachchiisa’nemman. 11 Ookkoonna tommenna saddeeta wogga’a fuggichchi hafuurn hidha xukkiteemmaxxi mitte manjichcho hexxemman. Isenna xukkatenaa’n kexxeexxa toggi hiyya haranga dandeetta’nemaba’a. 12 Yessuusinna isee afee wodda isee ye’eexxi, «Tee manjichcho elagonphe atixxenaa’n leexxa fulde’etten» hiyye. 13 Anga ifixxanna ise hana ugge; isenna hirba okkone’ni toggi hite uurrite; Magenokanna galateeffatte.

14 Ookkone Muuseka seera barantammake minik akeekisanji kinni Yessuusi Edi Sanbatixxa barra fayyiseexxee mufateexxi ardake’n, «Huje hujema hasissaaxxi jaane barra hexxeeni; tennexxee eettene barruwwa’n daggina’n fayye malee’e edike Sanbatixxe barra’nitebaan!» hiyye.

15 Gootti Yessuusinna hiisseexxi isoo hiyyee qici, «Ha’no hollaammeeyye ha’noo giddii’ni ifixxa qotiyyo yookaani harre ifixxa Edi Sanbatixxa barra galdamabaa’n tikeexxi wede’e ha’wisa gophphaata? 16 Tinni manjichcho Abirihaamixxe sanne kadeenni hexxe’e tommenna saddeeta wogga duuchcha durriisi usuree’naa hexxa’n konne usurrinaa’n edi Sanbatixxa barra’n tikema isee hasissabaan hiyyateeta?» 17 Tennee haaso’e wodda isoo gareerammakiir duuchchi shooke; ardi duuchchi kinni isi asseexxe maso yaane’n gammade.