Luqqaasixxaa Wengeele 8

Rerteexxe Beltonna Ela Gophpheexxe Manjichcho

40 Ardi duuchchi isixxa daga heqedhaammaxxee, Yessuusi ille iima hige dagee wodda gammashshoti isoo adhdhe. 41 Ookkone wodda Iyya’iroosi hiyyemaak Ayihudootiinke magenofachchotike minik sooreessi dage’e Yessuusixxe lekka hunda ibeexxi «Maganneten mine aniba amo» hiyye isoo kadhate. 42 Iittanna hiyyeechchi ilendeexxenni tommenna lame wogga kaddaaxxi ifixxi belto dhibendeexxi reyo shiqqeemmaxxeeten. Ookko’anna me’ate’n hedheenge’n isoo hordofa’emmak ardi isoo rabat lumooshsha rakkisa’nemman.

43 Tommenna lame wogga duuchcha munde dunendaammaxxi mitte manjichcho hexxemman; isenna affeechcho duuchcha ci’leeyyetee birtee’naa ise fayyisa dande’eek ayyinna hedhemmaba’a. 44 Isenna Yessuusibaa daggeexxi isi udumii’n isixxe seemmaka kasa tuqqe; dundaammaxxi isexxi mundenna ikki woddi uurrite. 45 Yessuusinna «Anee tuqeeki ayyete?» hiyye.

Duuchchiing isoo kiseexxa waakkatee wodda Pheexiroosi, «Goottaa ardi duuchchi atee buqe rabe rakkisa’neexxa uudda’n anee tuqeeki ayyete hitattota?» 46 Yessuusi kinni, «Hunna ane’naa’n fuldeemmaxxee anee tuqeeke mitti manji hedheen» hiyye. 47 Iitti manjichchonna ege’nendebaak gattebaaxxa affeexxi culphissa’n daggeexxi lekka isixxi hunda ibbe; mayee iso tuqqeexxanna hitta iikki woddi fayyiteexxa ardi duuchchi edo haasootte. 48 Yessuusinna isee, «Anxe beltoo amana atixxi atee fayyisse’een, nage’iki me’i!» hiyye.

49 Yessuusi haaso’a afo’okenaa’n birebaang mitti manjichchi Ayihudiinke magenaafachchotike minike sooreessa kade’eeke Iyya’iroosike minenaa’n dageexxi, «Belto atixxi rerte’eeni; ta’a yoona barachchiissallo mee rakkisi!» hiyye. 50 Yessuusi tennee laqeexxi Iyya’iroosii’i, «Amani malee Mee sodaat; belto atixxi fayyitaan» hiyye. 51 Yessuusinna Iya’iroosike mine e’yaa wodda Pheexiroosi, Yohaannisinna Ya’iqoobi, iittanni eettene beltoke annanna ama gadhi darre ayyinna isinni welt e’yo’a haseba’a. 52 Eettene yanna manni duuchchi ise’a woo, woo hiyya’n oodha’nemman; Yessuusi kinni insa’ne, «Mee oodhdhe; ise diiphphe’ee malee rerte’eebaan» hiyye. 53 Insa’nenna reyo isexxa egenneemmaxxee duuchching isoo oso’le. 54 Yessuusi kinni anga isexxa abideexxi isee, «Anxe beltoo ke’i» hiyye 55 Beltichchoitik hafuurinna hige; isenna iikki woddi kexxeexxi ofolde; Yessuusinna ittaaxxi yaane ise’a uwwendaashsha insa’ne ajaje. 56 Beltichchotik hadinna lumoshsha mambe hiyye; isi kinni ayye’ninna tennee yaane haasoonnabaashsha insa’nee ajaje.