Lucas 16

Lûkêndê lwa mpeta no Lasalo

19 "Kûbele muntû gûmo mpeta, ûbele mwidjêbêle kûshala bishandê bibele bisoga no bya kitûngo kikata biiko, no wêkene mumulogo masigi gonse. 20 Amushango gwa gûdjo mpeta, abele no nanda gûmo sina lwege Lasalo, kwana ûbele no biene biingê, 21 Lasalo ûkampilwe kûebwa bisigela bigwilile kuima amutalako gwa gûdjo mpeta. No nghimba gya ao mbwa gibele gyasha gyalamba biene byage.

22 "Kyaba akiikile gûlya nanda ukile no Masalagûlû gamubûgwêle gamubikile mukyalê kya Bûlaimu. Gûlya mpeta noge ukile ushikilwe, 23 Gûlya mpeta, ûbele no mudjembo gûkata kûko kûkalûnga nyembo ûtûlwêle meso gage. Ûmumwene Bûlaimu kûla no Lasalo ûbele kûbwêhê nage. 24 Nansho gûlya mpeta umwitile Bûlaimu kwa djwê: ‘Tata Bûlaimu, nkyêle lûsa, no mutume Lasalo akunye lwala lwa munie gwage mu madjê, aoshe lulimi lwane kibalo nansûsûka biiko mukaya kano!’

25 "Mone Bûlaimu umwindwêle: ‘Mwanane gidjûkana kwana ûtambwêle bisoga byobe mungikeno, noge Lasalo ûtambwêle bibê, mone ano gee waempûlwa, nogwe wêmumudjembo gûkata. 26 Nghimba gya ao, abûkata bwetû no benywe kûbêkwe bwêna bûkata, kibalo bakûkeba kûsha kwamulê kuima kûno habakûnyonghona no bakûkeba kuima kwamulê kûsha kwatûlê habakûnyonghona.’ 27 Gûdjo ûbele mpeta wêndwêle: ‘Nfulo, Tata Bûlaimu nankûlomba mutume Lasalo abagale kû nsese gya tata wane, 28 kwakûba nino baana nane ba baana balûme batano. Agye ebalêngele kibalo nabakasi nobo kuika hantu ano amudjembo.’

29 "Mone Bûlaimu umulombwele: ‘Baana nobe beno lusinto lwa Musa no bamoni, wêbaleke bebategelele boo.’ 30 Gûlya mpeta wêsambile: ‘Hakiyenene tata Bûlaimu, mone muntû kûshûka kuima kûbaki, no kwêbaikêla bekesasa.’ 31 Mone Bûlaimu wêbalombwele: ‘Ntêê abebategelele ba Musa no bamoni, habanyonghoni kûbembwa nomwine muntû wa shûka kuima kûbaki.’"