1 ଅଙ୍ଗୁର୍‌କାଲ୍‌ ନିନ୍ଦ୍‌ ମାଡ଼ାନ୍‌ ଲେକାମ୍‌, କାଲ୍‌ଉଞ୍ଜ୍‌ ମର୍‌ରେ ପୟିତାନଣ୍ଡ୍‌; ବେନକି ଆଦ୍‌ଉଞ୍ଜ୍‌ ବୁଲ୍‌ ଆଦ୍‌ତଣ୍ଡ୍‌, ଅଣ୍ଡ୍‌ ଜ୍ଞାନ୍‌ତେନଣ୍ଡ୍‌ ଆୟଣ୍ଡ୍‌ । 2 ରାଜାନ୍‌ କପାମ୍‌ ସିଂହଡୁୱୁଦେ ଲେଙ୍ଗ୍‌ଇନା; ବେନ୍‌ ଅନ୍‌ କପାମ୍‌ ଜନମ୍‌ ମାଡ଼ିତଣ୍ଡ୍‌, ଅଣ୍ଡ୍‌ ନିଜର ଜିଉଣ୍ଡ୍‌ ବିରୁଦ୍ଦତେ ପାପ୍‌ ମାଡ଼ିତଡ଼୍‌ । 3 ରାମ୍‌କିନ୍‌କଞ୍ଚ୍‌ ୱେର୍‌ଆଦାନ୍‌ ନାରୁନାଦ୍‌ ଗୌରବ୍‌; ମାତର୍‌ ସାରେ ମୁର୍କ ନାରୁଣ୍ଡ୍‌ ରାମ୍‌କ୍‌ ମାଡ଼ିତଡ଼୍‌ । 4 ମଣ୍ଡି ଚାଲ୍‌ଦେ ମାଇଦିଙ୍କ୍‌ ଉଡ଼୍‌ଦାଙ୍କ୍‌ ଅୟଣ୍ଡ୍‌; ଆଦିଙ୍କ୍‌ କୟିଦାନ୍‌ ସମୟତେ ଅଣ୍ଡ୍‌ ମେଃକେ ବା ବାତେବା ପାହେମ୍‌ ଆୟଣ୍ଡ୍‌ । 5 ନାରୁନାଦ୍‌ ମନ୍‌ଦେ ଚିନ୍ତା ଗୁୟିନ୍ଦେତେ ଏର୍‌ ଇନା, ମାତର୍‌ ବୁଦ୍ଦିମାନ୍‌ ନାରୁଣ୍ଡ୍‌ ଆଦ୍‌ ଟେଣ୍ଡିତଣ୍ଡ୍‌ । 6 ବେସ୍କ୍‌ତଡ଼୍‌ ନାରୁଡ଼୍‌ ନିଜର ନିଜର ଦୟାତେ ପ୍ରଚାର ମାଡ଼ିତଡ଼୍‌; ମାତର୍‌ ସତ୍‌ ନାରୁଣ୍ଡ୍‌ ବେନ ଦର୍‌ସ୍କେ ପାର୍ଦ୍‌ତଣ୍ଡ୍‌ ? 7 ବେନ ଦାର୍ମିକ୍‌ ନାରୁଣ୍ଡ୍‌ ନିଜର ଦାର୍ମିକ୍‌ ବେବାର୍‌ ମାଡ଼ିତଣ୍ଡ୍‌, ଅନ୍‌ ପେର୍‌କେ ଅନ୍‌ ମାର୍‌କିଡ଼୍‌ ଦନ୍ୟ ଆଦ୍‌ତଡ଼୍‌ । 8 ବେନ୍‌ ରାଜାଲ୍‌ ବିଚାର୍‌ ମାଡ଼ାନାଗ୍‌ କୁଦିତଣ୍ଡ୍‌, ଅଣ୍ଡ୍‌ ନିଜର କଣ୍ଡେତଡ଼୍‌ କାରାପ୍‌ ବିଷୟସାରେ ଉଡ଼ା ମାଡ଼ିତଣ୍ଡ୍‌ । 9 ମାମ୍‌ ନିଜର ମନ୍‌ଦିଙ୍କ୍‌ ନର୍ସ ମିନ୍ଦେମ୍‌, ମାମ୍‌ ନିଜର ପାପ୍‌ତେ ସାକ୍‌ସାକା ଆତ୍‌ତମ୍‌, ଇଦ୍‌ ବେନ କେତେପାର୍‌ଦ୍‌ତଣ୍ଡ୍‌ ? 10 ୱେରେୱେରେ ଲେକାମ୍‌ କେଜିଗୁଣ୍ଡ୍‌ ନୁ ୱେରେୱେରେ ଲେକାମ୍‌ ଇସାପ୍‌ ରେଣ୍ଡେଆସ ସାମାନ୍ ଇନା ସଦାପ୍ରବୁନ୍‌ ପାସ୍କାନାଉ । 11 ନିଜର ପାଡ଼୍‌ୟିଦେ ପବିତ୍ର ନୁ ସାୟେ କି ଆୟ, ଇଦ୍‌ ଅଣ୍ଡୟ୍‌ ପେକାଲ୍‌ ବା ନିଜର ପାଡ଼୍‌ୟିଦେ ନିଜର୍‌ତାଦ୍‌ ପରିଚୟ ଇଦ୍‌ତଣ୍ଡ୍‌ । 12 କେଞ୍ଜାନ୍‌ କେଉ ନୁ ଉଡ଼ାନ୍‌ କଣ୍ଢା, ଇ ରେଣ୍ଡିଙ୍କ୍‌ ସଦାପ୍ରବୁ ତିଆର୍‌ ମାଡ଼ିମିନ୍ଦେଣ୍ଡ୍‌ । 13 ଉସ୍‌କାଡ଼୍‌ତିଙ୍କ୍‌ ବଲ୍‌ ପାହେମ୍‌ ଆୟ୍‌ମାଟ୍‌, ଇଲୁକ୍‌ ମିଡ଼୍‌ ଗରିବ୍‌ ଆଦ୍‌ତିଡ଼୍‌; ମି କଣ୍ଢା ଡେକାଟ୍‌, ଆସୁଙ୍କ୍‌ ମିଡ଼୍‌ କାଦି ତିଞ୍ଜ୍‌ ପାଞ୍ଜିତିଡ଼୍‌ । 14 ଆସାନ୍‌ ନାରୁଣ୍ଡ୍‌ କେତିତଣ୍ଡ୍‌, ସାୟେ ଆୟ, ସାୟେ ଆୟ, ମାତର୍‌ ନିଜର ଆର୍‌ଦେ ଆଦାନ୍‌ ୱେଲେ ବଡ଼୍‌ପନ୍‌ ମାଡ଼ିତଣ୍ଡ୍‌ । 15 ସୁନା ମିନ୍ଦେ ନୁ ନାର୍ଗେ ନାର୍ଗେଦାମିନ୍‌ କାଲ୍‌କ୍‌ ମିନ୍ଦେ, ମାତର୍‌ ଜ୍ଞାନମାନ୍ଦାନ୍‌ ପାୟୁର୍‌ ନାର୍ଗେ ଦାମ୍‌ମାନ୍ଦାନ୍‌ ସାମାନ୍‌। 16 ପୁନ୍ଦ୍‌ଇଲ୍‌ୱେ ନାରୁଣ୍ଡ୍‌ ମାଇଦିଙ୍କ୍‌ ବେନ ଗାରେତଣ୍ଡ୍‌ ଆଦ୍‌ତଣ୍ଡ୍‌, ଅନ୍‌ ସିଲେ ଅୟ୍‌ମୁଟ୍‌; ମେଣ୍ଡେ, ବେନଆୟି ବିଦେଶି ନାରୁଡ଼୍‌ ମାଇଦିଙ୍କ୍‌ ସାକ୍ଷି ଆଦ୍‌ତଣ୍ଡ୍‌, ଅଂକିଙ୍କ୍‌ ବାନ୍ଦ୍‌ ୱାଟାଟ୍‌ । 17 ବଲିମେଣ୍ଡେ ଗାଡ଼୍‌ସ୍ତେ କାଦି ନାରୁଙ୍କ୍‌ ମିଙ୍ଗିତ୍‌; ମାତର୍‌ ପେର୍‌କେ ଅନ୍‌ ପାୟୁର୍‌ତାଗ୍‌ ସୁଦୁରାୱ୍‌ କାଲ୍‌ବଦେନେ ନିଣ୍ଡ୍‌ତେ ଲେକାମ୍‌ ଆଦ୍‌ତେ । 18 ଯଜନାତଡ଼୍‌ ସାରେ ଚିନ୍ତା କଟ ଆଦ୍‌ତା: ମେଣ୍ଡେ, ନିମେ ସାୟେତ୍‌ ଆଦେଶ୍‌ ଅସ୍‌ ଯୁଦ୍ଦ ମାଡ଼ାଟ୍‌ । 19 ବେନ ସତ୍‌ମିଚ୍‌ କାଲ୍‌ପି କେସ ଉଡ଼ିତଣ୍ଡ୍‌, ଅଣ୍ଡ୍‌ ମିଞ୍ଜ୍‌ତେ ଗଟି କେତିତଣ୍ଡ୍‌; ଇଦିନ୍‌ ମାଇଦିଙ୍କ୍‌ ବେନ ନିଜର ପାୟୁର୍‌ ତେର୍‌ସ ନେଃତିତଣ୍ଡ୍‌, ଅନ୍‌ତଡ଼୍‌ କାଇଲ୍‌ମାଟ୍‌ । 20 ବେନ ନିଜର ବାବାଙ୍କ୍‌ ବା ୟାୟାଙ୍କ୍‌ ଅବିଶାପ ଇଦ୍‌ତଣ୍ଡ୍‌, ଗାଟି ଇକାଡ଼୍‌ତାଗ୍‌ ଅନ୍‌ ୱେସ୍‌ ପିଃସ୍‌ ଆଦ୍‌ତେ । 21 ପ୍ରତମ୍‌ତେ ବେନଆୟି ଅଦିକାର ହଟାତ୍‌ ଦର୍‌ସ୍କେପାର୍ଦ୍‌ତେ; ମାତର୍‌ ଆସୁଙ୍କ୍‌ ମାରେଙ୍କ୍‌ତେ ଆଶିର୍ବାଦ୍‌ କାୟିଲ । 22 ମାମ୍‌ କାରାପ୍‌ତେ କାୟେ ଇଦ୍‌ତମ୍‌, ମିଡ଼୍‌ ଇସତ୍‌ ଗଟି କେଲ୍‌ମାଟ୍‌, ସଦାପ୍ରବୁନାଗେ କାୟ୍‌ଲାଟ୍‌ , ଅଣ୍ଡ୍‌ ମିକିଙ୍କ୍‌ ଉଦ୍ଦାର୍‌ ମାଡ଼ିତଣ୍ଡ୍‌ । 23 ରକମ୍‌ ରକମ୍‌ତେ କେଜିଗୁଣ୍ଡ୍‌ ସଦାପ୍ରବୁ ପାସ୍କାନ୍‌ ବିଷୟ, ମେଣ୍ଡେ, କରାପ୍‌ କେଜିଡାଣ୍ଡ୍‌ ସାୟେ ଆୟ । 24 ସଦାପ୍ରବୁ ନାଗାଙ୍କ୍‌କଞ୍ଚ୍‌ ନାରୁନାଦ୍‌ ତାକାନା ପାଦାମ୍‌ ଆଦ୍‌ତେ; ଆଦିଙ୍କ୍‌ ନାରୁଣ୍ଡ୍‌ ନିଜର ଆର୍‌ ବେଲାନେ ବୁଜେମ୍‌ ଆଦ୍‌ତଣ୍ଡ୍‌ ? 25 ଇଦ୍‌ ପବିତ୍ର ଇଞ୍ଜ ହଟାତ୍‌ କେତାନାଦ୍‌ ନୁ ମାନତ୍‌ ମାଡ଼୍‌ତେ ପେର୍‌କେ ବିଚାର ମାଡ଼ାନାଦ୍‌, ନାରୁଡ଼୍‌ ପର ଉଡ଼ିୟ୍‌ ଇନା ଆଦ୍‌ତେ । 26 ଜ୍ଞାନି ରାଜାଲ୍ ଦୁଷ୍ଟଡ଼୍‌କ୍‌ ନେଲ୍‌ରାପି ଅଡ଼୍‌କିଙ୍କ୍‌ ବାଣ୍ଡ୍‌ସେକା ବେଞ୍ଜ୍‌ସିତଣ୍ଡ୍‌ । 27 ନାରୁଣ୍ଡ୍‌ନାଦ୍‌ ଆତ୍ମା ସଦାପ୍ରବୁନ୍‌ ୱେସ୍‌, ଅନ୍‌ ହୃଦୟ୍‌ତାଗ୍‌ ସାରେ ବିଷୟ ମେଃକିତ୍‌ । 28 ଦୟା ନୁ ସତ୍‌ ରାଜାଙ୍କ୍‌ ରକ୍ଷା ମାଡ଼ିତେ; ମେଣ୍ଡେ, ଦୟାତଡ଼୍‌ ଅନାଦ୍‌ ସିଂହାସନ୍‌ କଟ ଆଦ୍‌ତେ । 29 ଲେୟଡ଼୍‌ ଶକ୍ତି ଅଡ଼ାଦ୍‌ କେର୍‌ଦାନ୍‌ ସିଙ୍ଗ୍‌ଡ଼ାମ୍‌, ମୁୟିତ୍‌ନଡ଼୍‌ ପାଣ୍ଡ୍‌ତ୍‌ତେ କେଲ୍‌କ୍‌ ଅଡ଼୍‌କିଙ୍କ୍‌ ସୁନ୍ଦର୍‌ତେ ସଜ୍‌ । 30 ରେହ୍‌ଃତେ ପୁଣ୍ଡ୍‌ କାରାପ୍‌ତିଙ୍କ୍‌ ପରିଷ୍କାର୍ ମାଡ଼ିତ୍‌, ମେଣ୍ଡେ, ଦଣ୍ଡ୍‌ ପାହେମ୍‌ ଆତ୍‌ତାଦ୍‌ ହୃଦୟ୍‌ତାଗେ ନେଙ୍ଗିତେ ।