Lucas 24

Mwanza wa Emau

13 Zua idija, waluko waidi wa Yesu wakala mnzila woita mchijiji cha Eamau, utali wa maili saba vino kulawa Yelusalemu. 14 Baho wakala woilongela wenyego kwa wenyego mbuli zose zilawilile. 15 Viwakalile woilongela mbuli izo, bahaja Yesu kalawila na kuilongoza hamwe nao. 16 Mbali wafisigwa meso gao seke wammanye. 17 Yesu kawauza, mbuli zilihi izo zimsimulila kuno mogenda?

Nao wema kuno vihanga vao vooneka vina giogio. 18 Munhu imwe yokemigwa Kiliopa, kamuuza Yesu, Ivo! gweye iyo nyambenyambe uiyeka mui kae ya Yelusalem, manake huzimanya hata mbuli zilawile hano?

19 Yesu kawauza "Mbuli zilihi?" Wamlongela,

'"Mbuli za Yesu wa Nazaleti. Iyo yawile mlagusi wa Mulungu, yeli na udaho mkulu mzimbuli zake na mzisang’hano zake, mbaka haulongozi ha Mulungu na haulongozi ha Wanhu wose. 20 Vilongozi wa wakulu wa nhambiko na Vilongozi wetu wamlava na kulamula yakomigwe, nao wamuwamba mumsalaba. 21 Cheye chimtamanila kua nayo iyo yahailohole isi ya Izilaeli. Mbali lelo zua da kadatu tangia mbuli izo vizilawilile. 22 Kaidi wanachike wamwenga mdibumbila jetu wachisinhusa. Kwa vija imitondo ng’hani waita kudipanga, 23 mbali hawaonile lukuli lwake. Wabwela na kulonga, wagaona malaguso ga wanhu wa kuulunga kwa Mulungu walongile Yesu mgima. 24 Wamwenga wetu waita kugamapanga kulola dija dilongigwe na wao wana chike, mbali hawamonile Yesu."

25 Amala Yesu kawalongela, "Mbona mwawabozi ivo na mioyo yenu midala kutogola gaja galongigwe na walagusi wa Mulungu! 26 Ivo, Kilisito yasaguligwe na Mulungu halondeke kudununzigwa, na baho yengile muukulu wake?" 27 Yesu kawafambulila gaja gose gandikigwe mmayandiko gekigwe kwa mbuli yake kulawa kwa Musa mbaka kwa walagusi wose. 28 Viwakalile behi na kuvika kuchijiji chiwoita, Yesu katenda kama kogendelela na mwanza, 29 mbali wao wampula walonga, "Kala hamwe nacheye kwavija zua diswa, na chilo chokwingila." Baho kengila mchijiji na kakala hamwe nao. 30 Viyakalile hasi nao kuja ndia, kasola gate, kaupulila unovu wa Mulungu, kaubena kaweng’ha. 31 Bahaja meso gao gabunhuligwa, wammanya kua iyo Yesu, mbali nayo kahalawa hamwao. 32 Baho, wailongela wenyego, "Ivo, hachipatile chimuhemuhe cha ndeng’helo mmoyo viyakalile yofambula mayandiko gekigwe kwa mbuli ya Mulungu vichikalile mnzila?"

33 Wasegela bahaja, wabwela Yelusalemu, wawavika waja watumigwa kumi na imwe na waja wamwenga wakalile nao waikunzanya hamwe, 34 na walonga "Kweli Yesu kazilibuka! Nayo kamlawila Simon!"

35 Baho, waja wajalusona wa Yesu waidi wawalongela gaja galawilile mnzila na viwammanyile viyabenile gate.