Uumama 26

Yisihaaqii fi Abiimelek

1 Beela isa bara Ibraahim biyyichatti buʼe sana malee beelli biraa tokko ammas biyya sanatti buʼe; Yisihaaqis gara Geraaraa gara Abiimelek mooticha Filisxeem dhaqe. 2 Rabbii Allaahanis Yisihaaqitti mulʼatee akkana jedhe; "Biyya ani akka ati keessa jiraattuuf sitti himu keessa jiraadhu malee Gibxitti gad hin buʼin. 3 Biyyuma kana jiraadhu; ani si wajjin nan taʼa; sin eebbisas; biyya kana hunda sii fi sanyii keetiif nan kennaatii. Ani kakuun abbaa kee Ibraahimiif kakadhe sana nan guuta. 4 Ani akkuma urjiiwwan shamaayʼun sanyii kee nan baayʼisa; biyya kana hundas isaaniif nan kenna; saboonni lafa irra jiran hundinuus karaa sanyii keetiitiin eebbifamu. 5 Kunis waan Ibraahim dubbii koo dhagaʼee fedhii koo, ajaja koo, labsii kootii fi seera koo eegeef." 6 Yisihaaqis Geraaraa keessa jiraate.

7 Innis yommuu namoonni biyya sanaa waaʼee niitii isaa isa gaafatanitti waan Ribqaan bareedduu taateef, "Namoonni naannoo kanaa sababii isheetiif na ajjeesu taʼa" jedhee yaaduudhaan, "Isheen niitii koo ti" jechuu sodaatee, "Isheen obboleettii koo ti" jedhe.

8 Erga Yisihaaq yeroo dheeraa achi jiraatee booddee, Abiimelek mootichi Filisxeemii foddaa keessaan gad ilaale; utuu Yisihaaq niitii isaa Ribqaa hooqsuu arge.