Matej 12

Koj tani Isuseskiri familija

46 Dži kote o Isus kerela sine lafi e manušencar, i daj leskiri hem leskere phrajla tergjona sine avrik hem adžikerena sine te keren leja lafi. 47 I nekoj phengja leske: "Ti daj hem te phrajla tergjona avrijal hem mangena te keren tuja lafi."

48 A o Isus odgovoringja leske: "Koj tani mi daj hem koj tane me phrajla?" 49 Togaš sikavgja vasteja ko pe učenikija hem vakergja: "Akje akala tane mi daj hem me phrajla. 50 Soske koj kerela i vojla me Dadeskiri soj ko nebo, ov tano mo phral, mi phen hem mi daj."