2 Reis 11

Ataliya ọmaana Joash

1 K’ogbe kw’Ataliya kw’ode ọkka kw’Ahaziya oze bẹ́, nnwa kwẹ kk’ọpa, ọtọma anọng p’ivaartaak njo kibungọ, ofhufhọ. 2 Okenaka, Jehosheba kw’ode ominanwa kw’ọvaar Jehoram, obir ode ọgbaanọkka kw’Ahaziya, ọtọka Joash kw’ode ojinọngnwa kw’Ahaziya m’orubh-orubh ny’ẹkaan ch’ajinọngva p’ọvaarnọng p’makamẹ bẹ́, mafhọ, otima ọrọbh. Ọtọka kẹ ọmaana orirọka kwẹ od-odubh k’idongọ janẹ, ọfha Ataliya oning-ẹ oze. Minna kw’uwa Joash ozeng ọnaanga obo nwo. 3 Kẹ ọmaana orirọka kwẹ, matubha ny’ọsọhm kw’Ọvaar Ibinọkpaabyi k’icho ichadanẹ s’Ataliya ọbaabh ẹkọma ndo.

4 Ttong icho ichenọmfa, Jehoyada ọtọhm ẹkkaabha bẹ́, mayerẹ aso p’agbongnọng p’nkwurọ s’anọng arọbh achen p’mafon Karit, ọttara ayok pad-akkerẹ ibyi. Bẹ mbo p’oyerẹ, makwu akebh-ẹ z’Ọsọhm kw’Ọvaar Ibinọkpaabyi. Kẹ ọmaana bẹ manwọhngọ anang ayok, obir osi bẹ machekẹ ny’Ọsọhm kw’Ọvaar Ibinọkpaabyi. Pira nọkọhk bẹ nnwa kw’ọvaarnọng. 5 Oben bẹ bẹ́, "Ọttọhk f’mm’asi ode bẹ́, bọnga mbo p’maning k’nkwurọ nttaan s’id-isi ọtọhm k’Ẹwọhngkwokawu, ekwurọ danẹ ekkerẹ ọvaardimpa, 6 danẹ ekkerẹ ebhumma ch’Sur, danẹ ekkerẹ ebhumma ch’ening z’nnam-nnam kw’akker-ibyi mbo p’mad-akkerẹ ibyi arik ayok ny’ọsọhm kw’Ọvaar Ibinọkpaabyi. 7 Bọnga mbo maphyir p’nkwurọ njoza mfa s’id-ikwoka ọwọhng k’Ẹwọhngkwokawu, bọnga bọ mm’ad-akkerẹ Ọsọhm kw’Ọvaar Ibinọkpaabyi anang ọvaarnọng. 8 Màbe kọbha ọvaarnọng ọkọbha. Ọnọng-ọnọng ọkwọrọ ogbongttọhk k’ọbọhk. Ọnọng kpenamkpen kw’ọnyọm bọnga, màfhẹ-ẹ. Màninga tuma ọvaarnọng k’ibyi kpenamkpen s’ọta."

9 Minna kw’aso p’agbongnọng nkwurọ s’anọng arọbh achen, masi mbengana k’ose kw’Jehoyada kw’ode ọfọhn-ẹja obenẹ. Ọnọng-ọnọng otima agbongnọng pẹ p’mad-asi ọtọhm k’Ẹwọhngkwokawu, ọttara ayok p’mad-akwoka ọwọhng k’Ẹwọhngkwokawu, makwu akebha Jehoyada kw’ode ọfọhn-ẹja. 10 Jehoyada ọnang aso p’agbongnọng mbo akọhn, ọttara agbongtergba mbo p’uwa made p’ọvaar Devid, p’uwa masokọ z’ọsọhm kw’Ọvaar Ibinọkpaabyi. 11 Akker-ibyi mbo mabe akọbha ọvaarnọng. Ọnọng-ọnọng otima ogbongttọhk fẹ k’ọbọhk, obe ọnyọma ija-byi ọmaana Ọsọhm kw’Ọvaar Ibinọkpaabyi, tọma z’ẹwọn-ẹwọna maa, pyirẹ z’ebir-ebir kw’Ọsọhm nwo kw’Ọvaar Ibinọkpaabyi.

12 Jehoyada otima ojinọngnwa kw’ọvaarnọng oyin ka ọyaankpa, ọfọr-ẹ ivaarkpo. Ọnang-ẹ nnwẹr kw’asana p’ẹvaar, obir ọsẹ-ẹ ẹvaar. Minna kw’mayaan-ẹ, anọng abir akpan mbọhk, mawurọ amọng, maben bẹ́, "Tte ọvaarnọng oruk akpen p’adum-odum!"

13 K’ogbe kw’Ataliya ọbhaang ẹlọ ch’akker-ibyi, ọmaana ch’anọng mbo, obina ọta z’ọsọhm kw’Ọvaar Ibinọkpaabyi bẹ́, od-oze anọng p’ad-alọ ẹkọhr ndo. 14 Opyirẹ za, oze ọvaarnọng ch’obe otuma ẹkpọmmachi, k’ose kw’ẹmmaana chabẹ ede. Asonọng, ọmaana anọng p’mad-aje nnyisa maninga ny’ẹbhaakẹ danẹ ch’ọvaarnọng. Wa anọng maphyir p’ẹkọma ndo mad-asi odidaama, mabir aje nnyisa. Minna kw’Ataliya ọyaakẹ ekpo py’ọfọr, obok bẹ́, "Okwurọdik e! Okwurọdik e!"

15 Jehoyada kw’ode ọfọhnọ-ẹja oben aso p’agbongnọng p’uwa akkerẹ esojakaan bẹ́, "Màtima kwanọng nwo yin k’iyaan m’ottem kw’akker-ibyi, matima ọkkangkkang afhọ ọnọng kpenamkpen kw’otor-ẹ k’odik." Kirẹ ọfọhn-ẹja kk’obena bẹ́, "Kẹ kọbaan bẹ́, mafhẹ-ẹ k’Ọsọhm kw’Ọvaar Ibinọkpaabyi." 16 Minna kw’mabọk-ẹ, matim-ẹ apyirẹ z’ibyi s’nnyanya id-izenga idim z’ọvaarter. Nya kw’maning afhẹ-ẹ.

17 Nya o, Jehoyada kw’ode ọfọhn-ẹja, osi ọvaar Joash ọmaana anọng machekẹ ọmaana Ọvaar Ibinọkpaabyi bẹ́, bẹ mm’ade anọng p’Ọvaar Ibinọkpaabyi. Minna kw’obir osi ọvaarnọng ochekẹ ọmaana anọng mbo. 18 Anọng p’izek njo maphyir mabina, mad-achikẹ ọsọhm kw’Baal abharẹ. Mavọhkọ ọja-byi, ọmaana akpata mbo ma matuku-tuku. Mabir afhọ Mattan kw’ode ọfọhn-ẹja kw’Baal, ny’ititika s’ọja-byi mvo.

Jehoyada kw’ode ọfọhn-ẹja, nọtọhm akker-byi bẹ́, mad-akkerẹ Ọsọhm kw’Ọvaar Ibinọkpaabyi. 19 Minna kw’aso p’agbongnọng p’abaabh nkwurọ s’anọng arọbh achen, ọmaana anọng p’afon Karit, ọmaana akker-ibyi, ọmaana anọng p’izek njo maphyir, mad-atọka ọvaarnọng z’ọsọhm kw’Ọvaar Ibinọkpaabyi, matim-ẹ azenga z’ebhumma ch’akker-ibyi madim z’odimpa. Ofona od-oninga z’ẹvaarkkọhbhọ chẹ. 20 Wa anọng p’izek njo maphyir mayena ottemlebh. Ebhondim ndo maphyir ebir eyena ẹmẹm okurọ ch’nkk’ọkkangkkang atima afhọ Ataliya z’odimpa.

21 Wa Joash ode icho ichenọmfa k’atam, k’ogbe kw’masẹ-ẹ ẹvaar.