Atos 16

Paul penai Silas hebaangki ga

16 Anui kekie ketei henige ga mie keladau, rabe kengkieng teukela releipui gede anui redaulu. Pa reka sam kerang gade peu pe mpaume de mmisüt lula. 17 Aipau puide Paul nah anui caisui eh sahgai, "Mina aidungde au Hutube Tinggwang kilamedung. Penui kelikelu lampuibe nnui dage ndulia la." 18 Pa tingbazie kekiee ge ainzwa ladi. Dede Paul, cipau puide de lunglei zudi eh, nreugwang rabe dage ranggai, "Jisu Khrista zi gade Ih ncu pe dade mpet dilo aja kai gaila." Cidau herakesiabe zette mpetdi.

19 Dede pe mpaume penui rangkang hilu kera ziuyi de gahkedi ngau luge, penui Paul penai Silas de tuilwe litakni ga kengkieng teu kelame dwaga penaide teu kerei gwangdi. 20 Penui penaide Romme kedime da ngngwa gwang luge, penui rangdi, "Mina aikenade anui namdi teukebwak bam dida. Penai au Jewme.✝16:20 1 Heg. 18:17 21 Penai anui Romme zai kemak zaidung de luu lulo nah mzai lulo rangla." 22 Cidau hemaabe ncütlwe Paul penai Silas de mmau cuhdi, nah Romme kedime penai painidung hietdi delwe hegeutiedung le penaide daplo aja kaigai. 23 Penui penaide pia kekiee ge dap kedicai, penui penaide hebaangki gage kelien gaidi delwe hebaangki kekwabe de penaide kwasiakte lulo aja kaigai. 24 Hebaangki kekwabe aja de siu ngau luge, penaide hebaangki lung kecok gage banglwe penai pi tsingkang kerütdung gage kang nzeudi. 25 Tingmui muisum dauge paul penai Silas kekie tei nah Tinggwang de ketwa lei teibam, nah hebaangme kedamedung penai kwa kingnei bam. 26 Zette cika nluiteu sütdi, iciu eh hebaangki tsiadung teu kelaidi; nah zette kikamdung pelane ngkeidi, nah pelane dade hegeuriadung de nlwak mpetdi. 27 Hebaangki kekwabe zip kebam gade mrak gwanglwe hebaangki kikamdung ngkei pwa kebam ngau luge; pa pe kingtie züt mpetlwe pekatei pecu teitsetdi kera mteilu, kedanemene hebaangme pakdi de ha pa cet kelune. 28 Dede Paul sahbak eh ranggai, "Nkatei ncu tei rejam diso, kedanemene anui pelane aika bamlu." 29 Cine hebaangki kekwabe kebaa kielwe paklüt, mbeu nah ngngi eh Paul penai Silas dwaga kauzeudi, 30 nah penaide teumpetlwe keteu, "Kedibe kena, Ih kelilu kerane daipai tei maisia no?" 31 Penai keligai, "Rampaube Jisu de nlumlu, iciude ncu kelilu zie, nang de nah n kilungme de." 32 Penai pe dage nah pe kilungme pelane dage Rampaube sam ranglia. 33 Cipau ziu cipau bamdakkak dau hebaangki kekwabe penaide ngngwalwe penai zamdung huidi, nah zette pecu nah pe kilungme pelane de duipum teilu. 34 Pecai pa Paul penai Silas de pe ki ga ngngwa gwanglwe ketyeipok penaide kaibeu, nah pa Tinggwang de nlum kelu ziemne pe kilungme pelane de ngngwa pe suiyisüt bamdi.

35 Pecai benai tingcang, kedime kekwame dage, "Peu penaide tetdi lulo," de sam kaigai. 36 Hebaangki kekwabe Paul dage sam paubeu eh ranggai, "Kedimedung nnaide peu tetdi lulo a dage sam langgai beu. Ciziemne mpetlu delwe nnai lung nciep eh tet lulo." 37 Dede Paul penui dade rangdi, "Penui mteibe dwade hetutiak mene anaide dap, anai Romme deuketme ge liede, nah penui anaide hebaangki gage tuigai. Cu penui ngkim eh anaide langgidi neu lani? Lak! Meliene, penui depeu gwang eh anaide lungmpet lulo." 38 Pecai hebaangki kekwame Romme kedimedung de sam aide paubeu, nah penui Paul penai Silas Romme lie kecu siu luge, penui ngngidi. 39 Cine penui gwang penai dade penui mau kie nah penaide lungmpet beu, nah namdibe gade tetdi lulo penai dade kiedi. 40 Cine Paul penai Silas hebaangki gade mpetlwe Lydia kiga gwanglu. Penai kenlummedung de ngau ngau luge, penuide kecunggai eh namdibe gade tetdi.