1 सुरुवातीमेहें देवे जुग आन धरती बोणायी. 2 धरती विण आकारोअ आन सामसुम पोड़ीत रोयीते, उंडा पाअयोंपोअ आंदारो ओतो; आन देवोअ आत्मा पाअयोंपोअ फिर्‍या कोअतुतो. 3 जाहां देवे कोयो, "उजालो ओव," ताहां उजालो ओत गोयो. 4 आन देवे उजालाहा पाल्यो के तों हाजो होय; आन तिये उजालाहा आंदारा रोत आलाग कोअयो. 5 आन देवे उजालाहा "दिही" आन आंदाराहा "रात" कोयो. हांज ओवी आन फाश्योअ वेगीइ हुज्यो, एहेंकोइत पेहलू दिही ओवू.

6 फाश्योअ देवे कोयो, "पाअयोंअ विसमेहें एक एहेलोहो गालो ओव के पाईं बेन भाग ओत जाय." 7 ताहां देवे एक गालो ठरवित कोइत तियाआ निसेए पाअयोंहों आन तियाआ उसेए पाअयोंहों आंगे-आंगेज कोअयो; आन तेहेंज कोइत ओत गोयो. 8 आन देवे तिया उसेए गालाहा "जुग" कोयो. आन हांज ओवी फाश्योअ वेगीइ हुज्यो, एहेंकोइत दुसरु दिही ओत गोयु.

9 फाश्योअ देवे कोयो, "जुगोअ निसेए पाईं एकी जागे टोलू वोलीत जा आन उगाअली पुंय देखाइ वोल," आन तेहेलोज ओत गोयो. 10 देवे उगाअली पुंयींहीं "धरती" कोयो, आन जों पाईं टिग वोल्योतो तियाहा "दोर्‍या" एहें कोयो, आन देवे पाल्यो के ओं हाजो होय. 11 फाश्योअ देवे कोयो, "धरतीपोअ रोत निलु सारु, मिंजोवाले हाने-हाने साड़े, आन फोलनारे साड़े बी उगुहूं जोवे, जियां साड़ोअ मिंजे तियांजमेहें एकेक जातीइ पुरमाणे रोय," आन तेहेंज कोइत ओवो. 12 एहेंकोइत धरतीपोअ निलु सारु, आन हाने-हाने साड़े जियांमेहें तियां तियांआं जातीइ पुरमाणे मिंजे रोतेहे, आन फोलनारे साड़े जियांआं मिंजे एकेक जातीइ पुरमाणे तियांजमेहें रोतेहे तें उगे: आन देवे पाल्यो के हाजो होय. 13 ताहां हांज ओवी आन फाश्योअ वेगीइ हुज्यो. एहेंकोइत तिसरु दिही ओत गोयु.

14 फाश्योअ देवे कोयो, "दिहीन रात आलाग कोइलाआ काजे जुगोअ विसगालामेहें दिवा ओत जाअहूं जोवे; आन ते निशाणी, वेल, दिही, आन वोर्ह्ये देखाड़नारा जोवे; 15 आन ते दिवा जुगोअ गालाम रोत धरती पोअ उजवड़ आपनारा बी बोणुहूं जोवे." आन तेहेंज कोइत ओत गोयो. 16 ताहां देवे बेन वोडा दिवा बोणाया; तिहींमेएं वोडा दिवाहा दिहोपोअ राज कोए तेहें काजे आन हाना दिवाहा रातीपोअ राज कोए तेहें काजे बोणाया; तारामोंड्लो बी बोणायी. 17 देवे तों जुगोअ गालामेहें याअकाजे मिक्यो काहाके तिहीं वाअहीं धरतीपोअ उजवड़ पोड़ुहूं जोवे, 18 दिहीन रातीपोअ तों राज कोअहूं जोवे, आन उजालाहा आंदाराप रोत आलाग कोअहूं जोवे. आन देवे पाल्यो के ओं हाजो होय. 19 ताहां हांज ओवी आन फाश्योअ वेगीइ हुज्यो, एहेंकोइत शोवथु दिही ओत गोयु.

20 फाश्योअ देवे कोयो, "पाईं जिवता जनवारोवाअहीं जाअखो पोआइत जाअहूं जोवे, आन सिड़े धरतीइ आन जुगोअ गालामेहें उडुहूं जोवे." 21 तियाहा काजे देवे बातीवानीइं वोडे वोडे पाणीवठ्ये-जनवारे, आन एहला आखा जिव जनवारोहो बी बोणाये, जें जोरे सालते-फिरतेहे, जियां वाअहीं पाईं जास्ती पोआत गोयो, आन एकेक जातीइ उड्नारा सिड़ाहां बी बोणाये: आन देवे पाल्यो के ओं हाजो होय. 22 आन देवे ओं कोत कोइत तियांहां आशिर्वाद आप्यु, "फुला-फोला, आन दोर्‍यामेहें पोआत जावा, आन सिड़े धरतीपोअ वादीत जावा." 23 हांज ओवी आन फाश्योअ वेगीइ हुज्यो, एहेंकोइत पासवू दिही ओत गोयु.

24 फाश्योअ देवे कोयो, "धरतीप रोत एकेक जातीइ जिवते जनवारे, मोन्ज्ये कोर्‍येए जनवारे, आन होरतींडनारे जिवतोर, आन धरतीपोऱ्येए रानठ्ये जनवारे, राज्या राज्यामेहें पुरमाणे उत्पन्न ओवा," आन तेहेंज कोइत ओत गोयो. 25 एहेंकोइत देवे धरतीइ राज्या राज्यामेहें रानठ्ये जनवारे, आन राज्या राज्यामेहें कोर्‍येए जनवारे, आन धरतीपोअ आखे राज्या राज्यामेहें होरतींडनारे जिवतोर बोणाये: आन देवे पाल्यो के ओं हाजो होय.

26 फाश्योअ देवे कोयो, "आपू आपाआ रुपोअ पुरमाणे आपाआ होसर्‍योअ एक माहुंउं बोणावता;✝1:26 1 करिन्थ 11:7 आन तों दोर्‍यामेर्‍याआ मासांपोअ, जुगोमेर्‍याआ सिड़ापोअ, कोर्‍याआ जनवारोपोअ, आन पुरी धरतीपोअ, आन आखा होरतींडनारा जिवतोरोपोअ, जें धरतीपोअ फिरतेहे, तियांपोअ आधिकार मिकीत सेके." 27 ताहां देवे माहुंहूं सोताआ रुपोम बोणायो, आन सोताआज होसर्‍योअ देवे तियाहा बोणायो; माटी आन बोईं कोत तिये माहुंउं बोणायो.✝1:27 मत्तय 19:4 28 आन देवे तियांहां आशिर्वाद आप्यू, आन तियांहां कोयो, "फुला-फोला, आन धरतीपोअ पोआत जावा, आन तियीही तुमाआं ताबाम कोइत ल्या; आन दोर्‍यामेर्‍येए मासे, जुगोमेर्‍येए सिड़े, आन धरतीपोअ होरतींडनारे आखे जिवतोर यांपोअ आधिकार मिका." 29 फाश्योअ देवे तियांहां कोयो, "उनाआ, जेते मिंजोवाले हाने-हाने साड़े पुरी धरतीपोअ होय, आन जेता साड़ोमेहें मिंजोवाले फोलवे रोतेहे, तें आखे आंय तुमुहूं आप्येहे; आन तें तुमाआं खाअलाआ काजे होय. 30 आन जेते धरतीइ जनवारे, आन जुगोमेर्‍येए सिड़े, आन धरतीपोअ होरतींडनारे जिवतोर होय, जियांमेहें जिवनोअ हावा होय, तियां आखाआ काजे खायतेहें कोत आखे निले-निले हाने साड़े आप्येहे," आन तेहेंज कोइत ओत गोयो. 31 ताहां देवे जों किबी बोणायो तों आक्खो पाल्यो, ताहां की देख्यो के, तों जास्ती भारी होय, आन हांज ओवीन फाश्योअ हुज्यो, एहें कोइत साहावू दिही ओत गोयु.