1 शिनारोअ राजा अम्रापेल, आन एल्लासारोअ राजा अर्योक, आन एलामोअ राजा कदोर्लाओमेर, आन गोयीमोअ राजा तिदालोअ दिहोमेहें एहेलोहो ओवो, 2 के तियां सदोमोअ राजा बेरा, आन गोमोराआ राजा बिर्शा, आन अदमाआ राजा शिनाब, आन सबोयीमोअ राजा शमेबेर आन बेला जियाहा सोअर बी कोतेहे, यां राजाआ विरुद्दाम लड़ाय कोअयी. 3 ए पासू जोआं खारा दोर्‍याआ जागे होय तिया सिद्दीम नावोअ काटोम टोलू वोल्या. 4 बारा वोरह्ये जाआं ते कदोर्लाओमेरोअ ताबाम रोया; पोन तेरावा वोरह्योमेहें तियाआ विरुद्दाम उठ्या. 5 शोवदावा वोरह्योमेहें कदोर्लाओमेर आन तियाआ दोस्ती राजा आया, आन अशतरोत्कर्नेमोमेहें रपाइयांहां, आन हामोमेहें जूजियाहां, आन शावे किरीयातीम मेहें एमियाहां, 6 आन सेईर नावोअ डोगोपोअ होरीयांहां देता देता तिया एल्पारानोअहीं जाआं जो जंगलोमेहें होय, पोतीत गोया. 7 तिहीं रोत ते वोलीत कोइत एन्मिशपातोम आया, जो कादेश बी कोवाअहे, आन अमालेको वालाआ पुरा देसोहो आन तियां एमोरीहीं बी जिकीत लेदो, जे हससोन्तामारोमेहें रोतेते.

8 ताहां सदोम, गोमोरा, अदमा, सबोयीम आन बेला, जो सोअर बी कोवाअहे; यांआं राजा निहीया आन सिद्दीम नावोअ काटोमेहें, तियांअरी लड़ाय कोआ गोया: 9 मोन्ज्ये एलामोअ राजा कदोर्लाओमेर, गोयीमोअ राजा तिदाल, शिनारोअ राजा अम्रापेल, आन एल्लासारोअ राजा अर्योक, यां शारु जोओंअ विरुद्दाम तियां पासू जोओं लड़ाय कोअयी. 10 सिद्दीम नावोअ काटोम जिहीं डांबर्‍याआ खाणीन खाणी ओती; सदोम आन गोमोराआ राजा गुगदी गुगदीइ तियी खाणीमेहें जात पोड़्या, आन बाकी डोगोम गुगदा वोल्या. 11 ताहराआ शारु जोओं सदोम आन गोमोराआ पुरी मालमिलकत आन खाअलाआ वस्तुहू लुटीत कोइत लेत जाता रोया. 12 आन अब्रामोअ पायहोअ पोर्‍यू लोट, जो सदोमोमेहें रोतुतो, तियाहा तोइत लेत जाता रोया आन मालमिलकत बी ते लेत जाता रोया.

13 ताहरोअ एक जोओं जो भागीत कोइत वासाअयोतो तिये जात कोइत इब्री अब्रामोहो खोबर आप्यी; अब्राम ते एमोरी मम्रे, जो एश्कोल आन आनेरोअ पाही ओतू, तियाआ मम्रेए सोका साड़ोअ विसमेहें रोतुतो; आन एं माअहें अब्रामोअरी शप्पत लेत रोयेते. 14 पाअंजाह्हाहा गुलाम कोइत लेत जाते रोयेहे ओं उनाइत कोइत अब्राम तियाआ कुटुंबामेहें उब्जीइल्या आन लड़ायीइ विद्यामेहें सिकाअला तियां तिन होव एडार पावरोहो लेत कोइत दान जाआं तियांहां ओड़ीत लागू; 15 आन तियाआ पावरोअ आलाग आलाग टोली बोणावीत रातीइ वेले जात कोइत तियांहां माइत टाक्ये आन दमिश्कोअ पालामाआ वोल्याआ होबा यी जागे जाआं तियांहां ओड़ीत लागू. 16 आन तो पुरी मालमिलकत आन लोटोहो आन तियाआ मालमिलकत, तियाआ बोअह्हीं, आन आखा बांदाअला माअहुंहूं वापिस लेत आयू.

17 जेहेलाम अब्राम कदोर्लाओमेर आन तियाआ हेंगात्या राजाहां जिकीत कोइत वोलीत आवतुतो ताहां शावे नावोअ बारामेहें, जियाहा राजाआ बारु बी कोतेते, तिहीं सदोमोअ राजा तियाहा मिलीइलोअ काजे आवयू. 18 ताहां शालेमोअ राजा मलकीसेदेक, जो वोडाम वोडा देवोअ पुंजारु ओतू, रोटू आन दाराक्शाआ रोहो लेतायु.✝14:18 इब्री 7:10; भजन 110:4 19 आन तिये अब्रामोहो ओ आशिर्वाद आप्यु, "जो जुगोअ आन धरतीइ आधिकारी होय तिया वोडाम वोडा देवोअहीं रोत ताहूं आशिर्वाद जोड़े. 20 आन जिये वोडाम वोडे देवे ताआ दुस्मोनोहों ताआ ताबाम कोई देदाहा तो हाजू होय." ताहां अब्रामे तियाहा आखी वस्तुउ दाहवू भाग आप्यू.✝14:20 इब्री 7:1-10

21 ताहां सदोमोअ राजा अब्रामोहो कोयो, "जनवारे माहूं आपी दे, आन मालमिलकत तू तापोअ रोअहूं दे."

22 अब्रामे सदोमोअ राजाहा कोयो, "वोडाम वोडू देव यहोवा, जो जुग आन धरतीइ आधिकारी होय, 23 तियाआ आंय ए शप्पत खाहो, के जो किबी ताआ होय तियामेहें रोत आंय ने एक हुत, आन एका खाहड़ाआ दोअड़ी, ने कोड्ली बिहीरी वस्तु लेनारु के तू एहेलोहो ने कोअहूं जोवे के अब्राम माआंज वाखरी मालदार बोण्यु. 24 पोन जो किबी यां जुवान्या खात लेदोहो आन तियांआं भाग, जे माअरी गोयाते मोन्ज्ये आनेर, एश्कोल, आन मम्रे, आंय ने आपनारु, ते तोम जिवज्योअ भाग मिकीत लेएहूं जोवे."