उत्पत्ती 26

गरारोमेहें इसाहाक

1 पेल अब्राहामोअ दिहोम पोड़्यु तेहलुहू काल तिया देसोमेहें पोड़्युतो, ओ तिया पेल्लाआ कालोअ रोत आलाग ओतू. तियाहा काजे इसाहाक गरारोम पलिश्तीइं राजा अबीमेलेकोअ जागे गोयु. 2 ताहां यहोवा देवे तियाहा दर्शन आपीत कोयो, "मिसरोम मा जाही; जो देस आंय ताहूं कोहीं तियाजमेहें रो. 3 तु याज देसोम रो, आन आंय ताअरी रोहीं, आन ताहूं आशिर्वाद आपिहीं; आन ओ आखु मुलख आंय ताहूं आन ताआ पारवाड़ीही आपिहीं; आन जे शप्पत आंय ताआ आब्हा अब्राहामोअरी खादीते, तियीही आंय पुरी कोअहीं. 4 आंय ताआ पारवाड़ीही जुगोमेर्‍याआ ताराआ होस बोणावीहीं; आन आंय ताआ पारवाड़ीही ओ आखु मुलख आपीहीं, आन धरतीपोर्‍याआ आक्खा देसोहो ताआ पारवाड़ी वाअहीं मापरोत आशिर्वाद जोड़े.✝26:4 उत्प 22:16-18 5 काहाके अब्राहाम माआ गोठ मान्यू, आन जो आंय तियाहा होप्योतो तियाहा आन माआ आदेशोहो, कायदा आन नियमोअ पालन कोअयो."

6 तियाहा काजे इसाहाक गरारोमेहें रोयु. 7 जेहेलाम तिहींइं माअहें तियाआ लाडीइ बाप्तिमेहें फुश्यो, ताहां तिये ओं इतवीत कोइत बियुन ताहरुउ कोयो, "ए माआ बोअह्हीं होय कोत देदो." काहाके, "ए माआ लाडी होय," एहें कोअलोअ तियाहा बिक लागी, काहाके रिबीका जाअखी भारी ओती आन तियीइ वाखरी तियाहा तिहींइं माअहें माइत टाकी देय एहें लागोतो.✝26:7 उत्प 12:13; 20:2 8 जेहेलाम तियाहा तिहीं रोअहूं वारुज दिही ओत गोया, ताहरुउ एक दिही पलिश्तीइं राजा अबीमेलेके खिड़कीमेहें उसावीत इसाहाक तियाआ लाडी रिबीकाअरी गिगलात रोमत्त्लाहा देख्ये.