Gênesis 37

योसेफ आन तियाआ पाही

1 याकोब कनान देसोम रोतुतो, जिहीं तियाआ आब्हू पारकू ओत कोइत रोयुतो. 2 याकोबोअ पारवाड़ीइ इतिहास ओ होय:

योसेफ सातरा वोरह्योअ ओतू आन तियाआ पायहोअरी मेडे आन बोकड़े सारतुतो; आन तो पोर्‍यू तियाआ आब्हाआ लाडी*37:2 आब्हाआ लाडी जिजीह्ही बिल्हा आन जिल्पाआ पोर्‍याअरी रोया कोअतुतो; आन तियांआं खाराब कामोअ खबर तियाआ आब्हाआ जागे पोताड़तुतो.

3 इस्राएल तियाआ आखा पोर्‍या रोत वादार योसेफोपोअ मेर कोअतुतो, काहाके तो तियाआ डायावारामेए पोर्‍यू ओतू: आन तिये तियाआ काजे एक आंगड़ो हिंवाण्यो. 4 पोन जाहां तियाआ पायहों देख्यो के आपाआ आब्हू आपा आखा पायहोप रोत वादार मेर तियाज पोअ कोअहे, ताहां ते तियाअरी डांबराय कोआ वोल्या आन तियाअरी वारुहूं गोठ्यी बी ने कोअताते.

5 योसेफे एक होपनो पाल्यो, आन तियाआ पायहोहो कोताप्य; ताहां ते तियाअरी फाश्याआ बी वादार डांबराय कोआ वोल्या. 6 योसेफे तियांहां कोयो, "जों होपनो आंय पाल्योहो तों उनाआ: 7 आपू आखे खेतोमेहें पुला बांदतेते, आन उसकाहीज माआ पुलू उठीत उबू रोत गोयु; ताहराआ तुमाआ पुला माआ पुलाहा शारुसोमकीर केंडीत लेदू आन तियाहा पागे पोड़्या."

8 ताहराआ तियाआ पायहों योसेफोहो कोयो, "खोरीज तू आमापोअ राज कोअनारु होय के? खोरीज तू आमाआं राजा बोणनारु होय के?" तियाहा काजे ते तियाआ होपना वाअहीं आन तियाआ गोठ्यी वाअहीं तियाअरी फाश्याआ बी जाअखाज ठोटाल्लाहा साला वोल्या.

9 फाश्योअ योसेफे एक होपनो देख्यो, आन तियाआ पायहोहों तों होपनो बी कोताप्य, "उनाआ, आंय फाश्योअ एक होपनो पाल्योहो, के दिहीन सांद आन आकरा तारा माआ पागे पोड़ताहा."

10 या होपनाहां योसेफे तियाआ आब्हाहा आन पायहोहो कोताप्य, ताहां तियाआ आब्हे तियाहा बावराइत कोइत कोयो, "ओं केहेलोहो होपनो होय, जों तुमे पाल्योहो? हुदाअलीज आंय आन ताआ आयही आन ताआ पाही आखे जात कोइत ताआ आगाड़ी पागे पोड़नारेहे के?" 11 तियाआ पाही तियाअरी ठोटाय कोअताते;✝37:11 प्रेशित 7:9 पोन तियाआ आब्हे तियाआ ते गोठी ओर मिक्यी.

योसेफोहो वेसीइलो

12 योसेफोअ पाही तियाआ आब्हाआ मेडेन बोकड़े सारीइलोअ काजे शकेमोम गोया. 13 ताहां याकोबे योसेफोहो कोयो, "ताआ पाही शकेमोमेहेंज सारताये. जा, आंय ताहूं तियांआं जागे मोकलोहो."

योसेफे आब्हाहा कोयो, "आंय तियार होय."

14 याकोबे योसेफोहो कोयो, "जा, ताआ पायहोअ आन मेडेन बोकड़े हाजे होय के नाहां तों पालीत आव, ताहरुउ माआं जागे खबर लेताव." ताहां तिये तियाहा हेब्रोनोअ बारीज मोकली देदू, आन तो शकेमोम जात पोतू. 15 आन एक माहुंउं तियाहा एहें-तेहें भटकीइत्लू देखीत कोइत तियाहा फुश्यो, "तू कि होदेहे?"

16 योसेफे कोयो, "आंय माआ पायहोहों होदोहो. ते मेडेन बोकड़े का सारताहा तुमू माहूं कोहा के?"

17 तिये माअहें कोयो, "ते इंहीं रोत जाता रोयाहा; आन आंय तियांहां एहें कोत्ला उनाअयुहू, के ‘साला, आपू दोतानोम जाता.’" ताहरुउ योसेफ तियाआ पायहोंअ फाटी वाट लागू, आन तियांहां दोतानोम ओलग्या.

18 योसेफोअ पाही योसेफोहो सेटेज रोत आवत्लु देख्यू, ताहराआ तियाआ आहने आवीइलोअ पेलुज तियाहा माइत टाकीइलोअ कदर काड्यी. 19 आन ते तियां तियांआंज कोना वोल्या, "पाला, तो होपने पालनारु आवेहे. 20 तियाहा काजे साला, आपू तियाहा माइत कोइत एखा खाडामेहें टाकी देहूं; आन एहें कोत देहूं के एखो रानोमेर्‍योअ जनवार तियाहा खात गोयोये. ताहराआ आपू याआ तों होपनो कि कोइत पुरो ओवेहे तो पालहूं."

21 ओं उनाइत कोइत रूबेने योसेफोहो तियांआं आथोम रोत वासाड़ीइलोअ विसारोवाअहीं कोयो, "आपू याआ जिव नाहां लेता." 22 फाशुउ रूबेन तियांहां कोयो, "याहा तारास नाहां देता, पोन याहा उजाड़ीमेहें या खाडाम टाकी देता." तो तियाहा तियांआं आथोम रोत वासाड़ीत कोइत आब्हाआ जागे वापिस पोताड़ीलोअ काजे तेहें कोअतुतो. 23 ताहरोअ एहेलोहो ओवो के जाहां योसेफ तियाआ पायहोंअ जागे पोत्यु ताहां ते तियाआ आंगड़ो जों तो पोवित रोयुतो काडीत लेदो; 24 ताहराहा योसेफोहो तोइत कोइत खाडामेहें टाकी देदू. तो खाडू उगाअलू ओतू आन तियामेहें जारिक बी पाईं ने ओतो.

25 ताहराआ ते रोटू खाना बोहीत गोया; आन जाहां तियां नजर टाकीत पाल्य ताहां तियांहां इस्माइलीइ एक टोली माअहें उटड़ापोअ ओत्तर, आन मासालो मिकीत कोइत, गिलादोम रोते मिसर देसोम जात्ले देखाअये. 26 ताहरुउ यहुदे तियाआ पायहोंहों कोयो, "आपाआ पायहोहो माइलाआ आन खुन निकाड़ीइलाआ आपुहूं की फायदू? 27 साला, आपू तियाहा इस्माइलीही वेसी देता, आन आपू तियाहा आथ नाहां लागाड़ता; काहाके तो आपाआ पाही होय आन आपाआज आड आन रक्त होये." आन तियाआ पायहों तियाआ गोठ मानित लेदी. 28 ते मिद्यानी वापार्‍या तियांआं जागे पोत्या. ताहराआ योसेफोअ पायहों तियाहा तिया खाडाम रोत आपकीत काड्यू, आन तियाहा सांदीइ विही रुप्यामेहें इस्माइली माअहुंहूं वेसी देदू;✝37:28 प्रेशित 7:9 तें योसेफोहो मिसरोम लेत गोये.

29 जाहां रूबेन तिया खाडाअहें वोलीत कोइत योसेफोहो पालु गोयु, पोन तो तिहीं खाडाम ने देखाअयू, ताहां तिये सोताआ आंगड़े सिरीत उडाड़्ये. 30 आन तियाआ पायहोंअ जागे वोलीत कोइत कोनु वोल्यू, "पोर्‍यू तिहीं कायनाहां जी; ओमे आंय का जांव?"

31 ताहां ते योसेफोअ आंगड़ो लेत लेदोन ताहराआ एका बोकड़ाहा माइत कोइत तियाआ रक्तामेहें तों बुली देदो. 32 ताहराआ तिया आंगड़ाहा तियाआ आब्हाआ जागे लेत जात कोत मोकल्यो, "ओं आमुहूं सापड़्योहो, ओं ताआ पोर्‍याआ आंगड़ो होय के नाहां तों ओलखीत पाल."

33 आब्हे आंगड़ाहा ओलखीत लेदो आन कोयो, "होव, ओं माआंज पोर्‍या योसेफोअ आंगड़ो होय; रानठ्यो जनवार तियाहा खात गोयोये; तियाहा वेतरीत टाक्योये." 34 ताहरुउ याकोब तियाआ आंगड़े फाड़्ये आन कंबरेम गोंठो बांद्यो, आन तियाआ पोर्‍याआ काजे जाअखीलाहा दिही जाआं विखु कोअतू रोयू. 35 तियाआ पोर्‍यान पोर्‍यी आखे तियाहा होमजाड़ीलोअ कोशित कोअयी; पोन तो ने होमजीइयू; आन तो ओंज कोतू रोयू, "आंय तारास कोअतू कोअतू माआ पोर्‍याअ जागे पातालोम*37:35 मोल्या माहुंउं जागू उतरीत पोड़ीहीं." एहें कोइत तियाआ आब्हू तियाआ काजे रोड़तुज रोयू.

36 तिहीं मिद्यानी माअहों योसेफोहो मिसरोम लेत जात कोइत पोतीपार नावोअ फारो राजाआ एका आधिकारीही वेसी देदू, आन पोतीपार ओ राजाआ राखवाल्योअ मुख्यू ओतू.