1 पुरे बेन वोरह्ये सेकीत गोये तिहींइं फासाड़ी फारो राजा नील नोयीइ मेरे उबोइत रोयुहू एहलोहो होपनो पाल्यो. 2 आन तियी नोयीम रोत हांत बाहरी एतीज आन मात्ली वासड़ी मेरे निहीत कोइत दुंगलाम सोरी वोल्यी. 3 आन तियींइं फासाड़ी फाश्यीइ हांत हाजीन्ने आन लुल्लीही वासड़ी नील नोयीम रोत बारथे निहींयी आन बिहीरी वासड़ीइ जागे नोयीइ मेरेपोअ जात कोइत उबी रोयी. 4 ताहरीइ ए हाजीन्ने आन लुल्लीही वासड़ी तियीं बाहरी एतीज आन मात्ली वासड़ीही खात गोयी. ताहरुउ फारो राजा जागीत गोयु. 5 तो फाश्यु हुवीत गोयु आन बिहीरो होपनो देख्यो के एकाज डांड्लोम रोत हांत वोड्डेहे आन हाजे हाजे कोहें निहीव्ये. 6 तियांआं फासाड़ी हाने आन वारा वाअहीं फास्टाअले एहलेहे हांत कोहें निहीव्ये. 7 ताहरेए तें हाने कोहें तियां हांतू वोड्डाहा आन दाणा वाअहीं पोआला कोहांहां गिईंत लेदे. ताहरुउ फारो जाग्यू आन तियाहा सोमजाअयो के ओं होपनोज होय. 8 वेगीइ फारो राजा होपना वाअहीं सिंताम ओतू, तिये मिसरोमेर्‍याआ आखा बोड़वाहा आन जाणकारोहो हादाड़्या;✝41:8 दानि 2:2 आन तियांहां तियाआ होपने कोत आप्ये; पोन तियांमेर्‍योअ कोडोज तियांआं अर्थ फारोहो कोत नाहां सेको.

9 ताहरुउ पिवाड़नाराआ आधिकार्‍ये फारोहो कोयो, "माआं गुना आज माहूं ओर आया: 10 जाहां तु आमापोअ खिजवाअयुतो, तेहलाम माहूं आन रांदीत आपनाराआ आधिकारीही तोइत कोइत फारोअ राखवाल्योअ मुख्याआ कोअमेर्‍यीइ जेलेम टाकी देदाते; 11 ताहां आमू बेनू एकीज राती एकेक होपनो देख्यो, हारेक होपनाआ अर्थ आलाग ओतो. 12 तिहीं आमाअरी एक इब्री जुवान ओतू, जो फारोअ राखवाल्योअ मुख्याआ पावर ओतू; ताहां आमू तियाहा कोत आप्यो आन तिये आमाआ होपनाआ अर्थ आमुहूं कोयो, आमामेर्‍याआ एकेका होपनाआ अर्थ तिये कोत आप्यो. 13 आन जेहेलोहो तिये आमुहूं अर्थ कोत आप्योतो, तेहेलोज बी ओवयो, मोन्ज्ये माहूं माआ पद फाश्योअ मिल्यो, पोन तियाहा साड़ोअ उसे टांगी देदू."

14 ताहरुउ फारो योसेफोहो हादू मोकल्यू; आन तियाहा तावणी कोइत जेलेम रोत बारथे काड्यू, आन तो सिंग्ये ओखवीत कोइत आन आंगड़े बोदलीत कोइत फारोअ आगाड़ी आवयू. 15 फारो राजा योसेफोहो कोयो, "आंय एक होपनो पाल्योहो आन तियाआ अर्थ कोत आपनारो कोडोज कायने; आन आंय ताआ बाप्तिमेहें उनाअयुहू के तू होपनो उनाअताज तियाआ अर्थ कोत सेकेहे."

16 योसेफ फारोहो कोयो, "माहूं ते किज ने मुंदू:*41:16 मोन्ज्ये, माआ सिवाय देवुज फारोअ कोअते हाजो वसन आपे."

17 ताहरुउ फारो योसेफोहो कोनु वोल्यू, "होपनामेहें आंय पाल्यो के आंय नील नोयीइ मेरे उबू रोयुहू. 18 ताहरीइ नील नोयीम रोत हांत बाहरी एतीज आन मात्ली वासड़ी निहीत कोइत दुंगलाम सोरी वोल्यी. 19 आन तियींइं फासाड़ी फाशीइ हांत हाजीन्ने आन लुल्लीही वासड़ी निहींयी; आंय पुरा मिसर देसोमेहें एतीही लुली वासड़ी जोलोम नाहां देख्यी. 20 यीं लुल्लीही आन हाजीन्ने वासड़ी तियीं पेल्लीइ मात्ली हांत वासड़ीही खात लेदी; 21 आन जाहां ते तियीं वासड़ीही खात गोयी, ताहां एहेलोहो ने सोमजाअतोतो के ते तियीं मात्ली वासड़ीही खात गोयीही, काहाके ते पेल होय तेहेलीज लुल्लीही ओती. ताहरुउ आंय जागीत गोयु. 22 फाश्योअ आंय बिहीरो होपनो देख्यो, के एकाज डांड्लोमेहें वोडे आन हाज्जेहे कोहें निहीव्ये. 23 तियांआं फासाड़ी फाश्ये हाने आन वारा वाअहीं कोमाअले कोहें निहीव्ये, 24 आन एं हाने कोहें तियां वोडा आन हाजा कोहांहां गिईंत लेदे. या होपनाहां आंय बोड़वाहा कोत आप्यो, पोन याआ अर्थ कोत आपनारो इंहीं कोडोज नाहां."

25 ताहरुउ योसेफे फारोहो कोयो, "ताआ बेनू होपनाआ अर्थ एकुज होय, देव जों काम कोअनारु होय, तों काम तिये ताहूं देखाड़्योहो. 26 ते हांत हाजी हाजी वासड़ी हांत वोरह्ये होय; आन ते हांत हाजे हाजे कोहें बी हांत वोरह्ये होय; होपनो एकुज होय. 27 आन फाशीइ तियींइं फासाड़ी जे हाजीन्ने आन लुल्लीही वासड़ी निहींयी, आन जें हांत हाने आन वारा वाअहीं फास्टाअलेहे कोहें निहीव्ये, तें कालोअ हांत वोरह्ये रोय. 28 ए तेज गोठ होय जे आंय फारोहो कोयी के देव जो काम कोअनारु होय तों ताहूं देखाड़्योहो. 29 देख, पुरा मिसर देसोम जाअखी कामायीइ हांत वोरह्ये रोनारे. 30 पोन तिहींइं फासाड़ी हांत वोरह्ये काल पोड़नारु. पुरा मिसर देसोमेहें माअहें यां खुशालीइ हांत वोरह्योंहों विहराइत जानारे; आन कालो वाअहीं देस आरवाय. 31 आन एतुहू वोडु काल पोड़े के हाजी कामायीइ आन ओनोअ ईतवुउ जाआं ने कोडाहा आवे. 32 आन फारो राजा जो ओं होपनो बेनवारी पाल्योहो याआ अर्थ एकुज होय के ए गोठ देवोअहीं रोत ठरवाअयीही आन देव याहा वेगुज पुरो कोए.

33 "तियाहा काजे ओमे फारो एखा हानाला आन समजदार माट्योहो होदीत कोइत तियाहा मिसर देसोपोअ प्रधान मंत्री ठरवुहूं जोवे. 34 फारो ओं कोअहूं जोवे के देसोमेहें आधिकार्‍योहो ठरवुहूं जोवे आन जाअहूं जाआं खुशालीइ हांत वोरह्ये रोये ताअहूं जाआं ते मिसर देसोअ कामायीइ पासवू इसु लेया कोअहूं जोवे. 35 आन ते यां हाजा वोरह्योमेहें आखी जातीइ खाअलोअ वस्तु टोलू वाले, आन गावों होयरोमेहें दाणा मिकीइलाअ कोअ ओंनोअ काजे, फारोअ ताबाम कोइत तियाआ राखवाली कोअहूं जोवे. 36 तो खाअलाअ वस्तु कालोअ तियां हांत वोरह्योअ काजे, जें मिसर देसोम आवनारेहे, देसोअ खाअलोअ काजे मिकीत रोअहूं जोवे, जियावाअहीं देसोअ तिया कालो वाअहीं आरवाइत ने जाअहूं जोवे."

37 ए गोठ फारोहो आन तियाआ आखा सेवकोहों पोट्यी. 38 फारो तियाआ सेवकोहों कोयो, "आपुहूं एहेलुहू माटी, जेहेलुहू ओ होय जियामेहें देवोअ आत्मा रोहे, जोडीत सेकेहे के?" 39 ताहरुउ फारो योसेफोहो कोयो, "देवे जो ताहूं एतीही ओकल आप्यीही के ताआ होस कोडोज समजदार आन बुद्दीमान कायनाहां; 40 तियाहा कोअते तू माआ कोओअ आधिकारी रोजी, आन ताआ आदेशोअ पुरमाणे माआ माअहें साले, निस्तु राजगादीइ बाप्तिम आंय तापरोत वोडु रोहीं."✝41:40 प्रेशित 7:10 41 फाशुउ फारो योसेफोह कोयो, "देख, आंय ताहूं आखा मिसर देसोपोअ प्रधान मंत्री ठरवी देहो." 42 ताहरुउ फारो तियाआ आथोम रोत मुंदी काडीत कोइत योसेफोअ आथोम पेवाड़ी देदी; आन तियाहा भारी मोवोमोवोज आंगड़ो पेवाड़ी देदो, आन तियाआ गोलाम होनाआ हाकोल टाकी देदी;✝41:42 दानि 5:29 43 आन तियाहा तियाआ बिहीरा कोडाअ गाडापोअ बोहाड़्यू; आन माहें तियाआ आगाड़ी आगाड़ी ओं परसार कोअते जाताते के मांड्या पोड़ीत कोइत पागे पोड़ा, आन तिये तियाहा पुरा मिसर देसोपोअ प्रधान मंत्री ठरव्यू. 44 फाश्योअ फारो योसेफोहो कोयो, "राजा ते आंय होय; पोन पुरा मिसर देसोम कोडोज बी ताआ आदेशोअ सिवाय आथेन गुडा ने आलवे." 45 ताहरुउ फारो योसेफोअ नाव सापेनात्पानेह*41:45 या मिसरवाला शब्दाआ अर्थ: देव गोगेहे, नेताहां कांय "तो जिवतू होय" ओत सेकेहे. मिक्यो; आन ओन गावोंअ पुंजारु पोतीपारोअ पोर्‍यी आसनतेएरी तियाआ वेहेवाल कोइत आप्यो. एहेंकोइत योसेफ पुरा मिसर देसोपोअ आधिकारी बोण्यु.

46 जेहेलाम योसेफ मिसरोअ राजा फारोअ सामने आयू, तेहेलाम तो तीस वोरह्योअ ओतू. तो फारोअ राजवाडाम रोत निहीत कोइत पुरा मिसर देसोम फिरु वोल्यू. 47 खुशालीइ हांत वोरह्योम धरती जाअखीलोह*41:47 खोरो शब्द, मुठ पोइत ओन पाकाड़ती रोयी, 48 आन योसेफ तियां हांत वोरह्योमेहें आखी जातीइ खाअलाअ वस्तु, जे मिसर देसोम पाकतीते, टोलू वालीत कोइत गावों होयरोम मिकतू गोयु; आन हरेक गावोंअ आसे पासेए खेतोमेर्‍याआ ओनोहों तो तियाज गावोंमेहें टोलू वालतु गोयु. 49 एहें कोइत योसेफे ओनोहों दोर्‍याअ रेटाआ होसे टोलू वाल्या, एतोह के तिये तियाहा मोजीइलोअ बी सोड़ी देदो काहाके तो जाअखीलोहो ओत गोयोतो.

50 कालोअ वोरह्ये लागीइलोअ पेल योसेफोअ बेन पोर्‍या, ओन गावोंअ पुंजारु पोतीपारोअ पोर्‍यी आसनतेप रोत उबज्या. 51 योसेफ तियाआ डाया पोर्‍याआ नाव देवे माहूं माआ आखु तारास आन माआ आब्हाआ आखा घराणाहा विहीरावी देदोहो, एहें कोत कोइत मनश्शे*41:51 मनश्शे मोन्ज्ये, विहीरावनारु मिक्यो. 52 हानीइलाआ नाव तिये, जिहीं माहूं तारास वेठुहूं पोड़्यु तिया देसोमेहें देवे माहूं पान्गाड़ी देदू एहें कोत कोइत एफ्राईम*41:52 एफ्राईम मोन्ज्ये, जाअखो फोलनारो मिक्यो.

53 मिसर देसोअ हाजी पाक पाकीइलोअ हांत वोरह्ये सेलात गोये; 54 आन योसेफोअ कोइलाआ पुरमाणे हांत वोरह्योअ कोअते कालोअ सुरुवात ओत गोयी. आखा देसोम काल पोड़ू वोल्यू,✝41:54 प्रेशित 7:11 पोन पुरा मिसर देसोम ओन ओतो. 55 जाहां पुरा मिसर देसो मेर्‍येए माअहें फुके मोए वोल्ये; ताहां माअहें फारोपोअ आअडी आअडीइ दाणा मागे वोल्ये; आन मिसरोम रोनारा आखा माअहुंहूं कोया कोअतुतो, "योसेफोअ जागे जावा; आन जो किबी तो तुमुहूं कोये, तोज कोआ."✝41:55 योहान 2:5 56 जाहां काल पुरी धरतीपोअ पसरीत गोयु, आन मिसर देसोमेहें कठीण काल पोड़्युतो, ताहरुउ योसेफ आखे दाणा मिकीइलाअ कोएं उगाड़ीत कोइत मिसरोम रोनारा माअहुंहूं ओन वेसू वोल्यू. 57 तियाहा काजे आखे धरती पोर्‍येए माअहें मिसर देसोम ओन वेसातो लेअलोअ कोअते योसेफोअ जागे आवे वोल्ये, काहाके पुरी धरतीपोअ कठीण काल पोड़्युतो.