5 Henela, Apetulo pabhakibha mu nyuumba ja kutabhila bhandu, nambo kwa ntima gumo chibhoga cha bhandu bhabhahobhalela Akilisito chitendita kwajopela kwa Annoongo.
Apetulo atendakujogolekwa kubhoka mu nyuumba ja kutabhila bhandu
6 Kilo chenichela tangu Ahelode Gilipa jwangampia Apetulo nnongi ja bhandu kupala kwahukumula, Apetulo akagoloka pakati ja manyemba gabhele. Akatabha kwa minyololo jibhele, na manyemba gatendita kulendela panlyango. 7 Nga’ng’anu antumichi bha kunani kwa Annoongo akaabhokela na nhana gukaamulikila monimola mu nyuumba ja kutabhila bhandu. Antumichi jwa Annoongo jonojwe akaakwaa Apetulo palibhega na kwaajimuha, na kwalobholela, "Mmoke chindema!" Palapala jenijela minyololo jijibhakaatabha Apetulo mmabhoko jikahengeleka na kugwee pahi. 8 Jono antumichi jwa kunani kwa Annoongo akaalobholela, "Ntabhe nkanda gwinu," Apetulo akatenda henela. Ngapena akaalobhalela, "Nhwale likoti linu ngagule." 9 Apetulo akabhoka monimola mu nyuumba ja kutabhila bhandu abhi alongine na jonijola antumichi bha kunani kwa Annoongo. Kongo abhi tangu kuimanya kubhee gagabhokile gakibha ga kweli, akaganikia kubhee abhi mu malolo. 10 Bhakapetanga nlyango gugukajemeka na gwa bhele, ngapena bhakaikanga ku nlyango gwa chiano gwa kujingilila kunnyini. Nlyango gukajogoka guyene, na bhenaangota bhakapitanga paanja. Pabhatendita kujenda mu ndela jimo na kachoko jonijola antumichi bha kunani kwa Annoongo akaaleka Apetulo jika jabhe.
11 Ngapena Apetulo pabhakagamanya gagabhokile akalobhola, "Nangocheni ndenda kuimanya kweli Hangwana antumite antumichi bha kunani kwa Annoongo kunhokoa kubhoka mmabhokoa ga Ahelode na kubhoka mu genigala goa gabhatendita kuhobhalela bha Isilaeli."
12 Kachoko Apetulo pabhakaimanya akajaula kaja kwa Amalia, anyoongo bhabhe Ayohana jwakemitwa Amaluko, konokwe bhandu bhajingi bhakakongananga ligongo lya kwajopa Annoongo.