1 Nɛ kibe ɛlɛ Amrafɛl gɛenu ekusi kɔ Shina, Ariok ekusi kɔ Elasa, Kɛdɔlaoma ekusi kɔ Elam nɛ̀ Tidal ekusi kɔ Gɔim 2 bavɛ adɛ ta keyu nɛ Bera, gɛenu ekusi kɔ Adma, Shemɛba ekusi kɔ Zebɔim, nɛ̀ ekusi kɔ Bela (gɛenu Zoa). 3 Bekusi gɔgɔ̃ɛ babhɛtɛ tenikpo nɛ Sidim (gɛenu bɔmɔɛ kelĩkekpuɔ) kɛdadasiɛ mɛ. 4 Agɔ lɔfɔ nɛ̀ taabha mɛɛ, bakpɛ kɛtakpuesi akɔ Kɛdɔlaoma pɔɔ nɛ kɛgɔ lɔfɔ nɛ̀ taata mɛɛ, balɔ kititi nɛ yɛishu.

5 Nɛ kɛgɔ lɔfɔ nɛ̀ taalɛ̃ mɛ, Kɛdɔlaoma nɛ̀ bekusiɛ gɛenu belée akɔɛ avɛ keyu kɛlɛ baŋã Refaitianɛ, Zuzaitianɛ nɛ Xam, Emaitianɛ nɛ Shavɛ Kiriatam 6 nɛ Xoraitanɛ nɛ Sɛya, butú ɔmaa ɛmɛ, dɛ ɔkpɛnɔ Ɛl Paran nɛ oxuiɛ ɔbha. 7 Kidegba betsyina avɛ En Mishpat (gɛenu Kaɖɛsh), kɛlɛ beté Amalekianɛ nɛ̀ Amorianɛ gɛ bazã Xazazin Tamar.

8 Kɛlɛ Sodom ekusiɛ, Gomoɖa ekusiɛ, Adma ekusie, Zebɔim ekusiɛ nɛ̀ Bela (gɛenu Zoa) ekusiɛ batsà ɔhà ekoeyi kɛlɛ bakpɛ keyu tatá esi nɛ̀ Sidim kɛdada mɛ 9 nɛ̀ Kɛdɔlaoma gɛenu Elam ekusiɛ, Tidal gɛenu Gɔim ekusiɛ, Amrafɛl gɛenu Shina ekusiɛ nɛ̀ Ariɔk gɛenu Elasa ekusiɛ-bekusi taalɛ̃ balɔkɔ keyu nɛ bekusi teeti shu. 10 Otsinɔ aŋɔzĩ zã Siddim kɛdada mɛ gbĩ, kliso gɛ Sodom nɛ̀ Gomoɖa bekusiɛ ebu tɛtsɛɖɛ mɛɛ, balɛ beyuta teli adɛ tsɛku ɛlɛ mɛ kɛlɛ bagɔgɔ̃ɛ nɔ ebu tɛtsɛɖɛ mɛ avɛ beetu nabha. 11 Bekusi taalɛ̃ ayɛkɛ balɛ ahɔɛ mɛ bɔdɔ̃ nɛ̀ balɛ bɔŋaŋãa nɛ tɛgagalĩ mɛ; kɛlɛ bashɛ̃. 12 Baza gbana Abram yɛadzya eyiɛ pɛ bayɛkɛ yɛahɔɛ mɛ bɔdɔ̃ tsyɛ nɛ yɛahɔɛ ashɛ̃nɔ ɔmɔsɛ azã Sodom nɛ kibe ɛlɛ mɛ.

13 Kidegba anɔ tenikpo teli gɛebu tɛtsɛɖɛ mɛ edikpũ pɛ ashɛ̃ nɛ keyuɔ mɛɛ, abaɖɔ kibui ɛlɛ etseɖe Abram gɛenu, Hebrieyie. Kibe ɛlɛ mɛ Abram azã Mamrɛ beesi gbagbla Amorieyi ɔbha gɛenu Eshkɔl nɛ̀ Ana balɛ adzya, gɛenu ɛbhià akɔ Abram. 14 Gɛ Abram ebelũ asɛ bevũ yɛadzya ɛyiɛ, ekulu beeyuta alafa taata nɛ̀ kɛfɔ nɛ̀ taasɛ̃ gɛ bamɔ́ nɛ yɛɔpãa mɛɛ, kɛlɛ bakpatɔnɔ alɛ ɔdɔkpɛ nɔ Dan. 15 Nɛ elishiɛ mɛɛ, Abram ama yɛ beyuta ɔsɛ tɛ badɛtsyɔa kitelũ naalɛ, kɛlɛ bete alɛ, kɛlɛ bakpa tɔnɔ alɛ ɔdɛ kpɛnɔ Xoba, nɛ Damaskus kiwiɛ otukɔ. 16 Etsodzi amɔ yɛɔdɔ petee gɛ balɔkɔ kɛlɛ agbana yɛelĩeyiɛ Lot, nɛ̀ baadzɛ nɛ̀ baanɔ bhlatɔ amana kepi.

17 Gɛ Abram etsyina aba nɛ kibeɛ gɛ adɛŋã Kɛdɔlaoma nɛ yɛ bekusi gɛenu bagɛ akpɛ abhalà akɔɛ nɔ, Sodom ekusiɛ abatsyana yɛ nɛ Shavɛ kɛdada mɛ (gɛenu ekusiɛ yɛ kɛdada mɛ).

18 Kidegba Salɛm ekusie Mɛlkizɛdɛk amana abolo nɛ̀ bunu. Yɛedzi akpukpudzi akɔ Owusoso Akaa galɛ Kititíɛayɛ Fãa, 19 kɛlɛ eyula akɔ Abram, pɛ aɖɔ asɛ,

"Owusoso Akaa, Kititíɛayɛ Fãa nɔ eyula kɔ Abram,

Agɛ yɛabhɛtɛ kititi nɛ̀ kesiakpa.

20 Kɛlɛ bebeyula akɔ Owusoso Akaa Kititíɛayɛ Fãa nɔ,

agɛ alɔkɔ bagɛ atɛ adɛmɛ nɛ wɔ kpɛ wɔ ahɔɛ mɛ."

Kɛlɛɛ Abram alɔkɔ yɛahɔɛ mɛ bɔdɔ̃ kanyiaka bɔlɛ kɛfɔ mɛ akɔɛ.

21 Sodom ekusiɛ aɖɔ etseɖe Abram asɛ, "Lɔkɔ banɔdzrameɛ ɔkɔmɛ tɛ ɔlɔkɔ bɔdɔ̃ɔ kɔ ishu."

22 Pɔ Abram aɖɔ etseɖe Sodom ekusiɛ asɛ, "Ɛkpɛ ahɔɛ nɛ kititíɛ kɔ Apalete Akaa Kititíɛayɛ Fãa nɔ, gɛebu kititíɛ nɛ̀ kesiakpa, kɛlɛ ɛtanaɛ 23 sɛ ɛtɛba yɛkɛ kɛdɔ kanyiaka gɛenu wɔɛyɛ, wɔ oɖoti ohui pɛnɔsɛ wɔ ɔtsɛɖɛkɔlɔ ohui, tɛ ɔbɔɖɔ ɔsɛ, 'Mɛ bhɛtɛ Abram ehoeyi elete.' 24 Ɛtɛba yɛkɛ kɛdɔ̃ nyia kɛdɔ̃ dɛ bɔdɔ̃ɔ gɛ mɛ beyuta baŋã nɛ̀ baanɔnɔ gɛ bavɛ keyuɔ mɛ aplɛnɛ mɛ ɔŋãkɔ-bɔvɛ kɔ Ana, Eshkɔl nɛ Mamrɛ. Kɔ bamɔ balɛ ɔŋãkɔ.