1 Apaleteɛ ebu yɛishu akasɛ Abraham nɛ Mamrɛ beesi gbagbala ɔbha nɛ kibeɛ gɛ azã kesi nɛ yɛ kɛpɔtɛ kagba niedulũɔ nɛ kibeɛ gɛ kiwuiɛ vũ kifuɔ. 2 Gɛ Abraham ebu bamɛ ewunɔ kabhaa, amɔ banyɛ taata teli gɛ balɔɛtiti nɛ kɛwɔã ɔkɔ toli. Kibeɛ gɛ amɔ alɛɛ, akɔ yɛ tɛtsɛɖɛ tsɔ̀ odenɔ yɛagba niedulũɔ pɛ adɛ tsyana alɛ kɛlɛ ezhyi ekumũ kesiakpa.

3 Aɖɔ asɛ, "Onupɛ ɔdɛmɛ mɛibuiɛ, mɛ apaleteɛ, tɛdɔ wɔaxɔɛdɛ ɔfala. 4 Nɔkɔ bamana bulĩ bɔbhlui tɛ nopulu wɔnɔ bɔtsɛɖɛkpɔ tɛ nomoele nɛ busi alɛ niesi. 5 Nɔkɔ mɛpɛ kɛdɔ teli kɔ wɔnɔ nɔŋã, sɛtɛ nɔmɔ ohumi tɛ nɔvɛ wɔnɔ kidzo gagã nabha-otsiɛ gɛ nɔba wɔnɔ axɔɛdɛ ɔkɔ."

Bebuiliulũ asɛ, "Abɔ ana, bhɛtɛ asɛ ana gɛ ɔɖɔɔ." 6 Kliso Abraham ebu tɛtsɛɖɛ mɛ avɛ Sara ɔbhà nɛ kɛpɔtɛ kagba mɛ. Etseɖe yɛasɛ, "Kɔ yatsɔ lɔkɔ bɔna butoroe tɔɔta tɛ ɔvɔ̃ yɛ tɛ ɔpɔɛ abolo teli."

7 Kɛliedeɛ ebu tɛtsɛɖɛ mɛ avɛ nɛntsyɔɛza ɔbhà, ebu abhɛtɛ tibubu gbangbã gɛ egishè kɛlɛ alɔkɔ ɔlɛ akpɛ ahɔɛ akɔ yɛaxɔɛdɛ gɛ ebu tɛtsɛɖɛmɛ pɛ ediyii pɛ atɔɛ. 8 Kɛlɛ adɛ lɔkɔ nɛntsyɔɛ bɔmɔlĩkpã nɛ bɔmɔlĩ nɛ̀ nɛntsyɔɛ eyiɛ gɛ batɔ, elu balɛ otugba. Nɛ kibeɛ mɛ gɛ baza aŋã bɔdɔ̃ɔ, azã kitití nɛ balɛ ɔbhà nɛ busi niesi.

9 Bebisi yɛasɛ, "Fakɔ wɔedzini Sara avɛ?" Aɖɔ asɛ, "Ɛkɛlɛɛ nɛ kɛpɔtɛ kagbaa mɛ."

10 Kɛlɛ Apaleteɛ aɖɔ asɛ, "Eba tsyina ba kɛgɔana epitalɛ gɛ ɛtɛba tsyina ɛlɛ, kɛlɛ Sara gɛenu wɔedziniɛ abamɔ eyianyɛ."

Otsinɔ Sara azatatɔ elũ nɛ kɛpɔtɛ kagba kedulũɔ gɛazã yɛedeɛ aza. 11 Abraham nɛ̀ Sara betishè gɛ balɛ agɔ mɛ avɛ otugba, kɛlɛ Sara etishè afala eyi mɔmɔ̀ agɔ shu. 12 Kliso Sara amɔɛ akɔ yɛishu gɛ azanyɔ̃ kibuiɛ nɛ yɛishuɔ mɛ, "Gɛ ɛhɔlɔ̃ beke pɛ mɛ apaleteɛ etisheɛ, otsi mɛbà mɔ ɔdzyɛ ɔlɛ dza?"

13 Kɛlɛ Apaleteɛ etseɖe Abraham asɛ, "Kiɖeso pɛ Sara amɔɛmɔɛ pɛ aɖɔ asɛ, 'Ɛzɛ balà mɔ eyi, otsiɛ gɛ itisheɛ dza?' 14 Kibui tili lɛ gɛ kɛgagãlĩ falanɔ ɔkɔ Apaleteɛ dza? Ɛba tsyina ba wɔkɔ nɛ kibe tɔtɔɖɔ nabha nɛ kɛgɔana, kɛlɛ Sara abamɔ eyianyɛ."

15 Kifù yi Sara soɔ asɛ asɛnɛ aɖɔ asɛ, "Ɛgɛ mɔɛ kɛmɔɛ nanà." Pɔ anyɛ aɖɔ asɛ, "Kɛgbã, ɔmɔɛ kɛmɔɛ."

16 Kibeɛ gɛ beefuɔ alɔ asɛ bashɛɛ, beɖi kesiɛ asɛsɛ nɛ Sodom, kɛlɛ Abraham agã aplɛnɔ alɛ sɛtɛ akpɛ balɛ kidzo. 17 Kɛlɛ Apaleteɛ aɖɔ asɛ, "Ɛbàkpũ Abraham kibuiɛ gɛ ɛɛba babhɛtɛ dza? 18 Abraham ebedzì ohumi kɛmadi gbagbla, kɛlɛ bebe yula amadiɛ petee nɛ kesiakpa nabha ɔganà yɛabha. 19 Pɔ mɛibu yɛ, tɛ aba kasɛ yɛeyialɛ nɛ̀ yɛ bɔpã gɛ babà nɛ yɛedeɛ tɛ banyanà Apalete nɛidzoɔ ovunũ nɛ kibui gbangbã nɛ̀ kibui gɛlɛ ɛlɛ ɔzãkɔ tɛbhɛbhɛtɛ mɛ, tɛ Apaleteɛ akɔ kɛgɛ aɖɔ elu akɔ Abraham baɛlɛ mɛ."

20 Kɛlɛ apaleteɛ aɖɔ asɛ, "Oziɛ gɛ bakpɛ nɛ Sodom nɛ̀ Gomoɖa shuɔ ɔgagalĩ kɛlɛ balɛ ebuikpa bhɛbhɛtɛ kɛfala kifú 21 kliso ɛba zhyivɛ tɛ mɛidiɖi ɔsɛ ebuiɛ gɛ babhɛtɛ kizĩ asɛ ozĩ kpɛkpɛ gɛ ɔbɔtɔnɔ mɛ dza. Kɛma ɛlɛ mɛ anaa, ɛba tì."

22 Banyɛ betsyina pɛ bavɛ Sodom kibé, pɔ Abraham xɔnɔ azã kitití nɛ Apaleteɛ namɛ. 23 Kɛlɛ mɛ Abraham etso buni pɛ aɖɔ asɛ, "Ɔbɔ gbã banɔ gbangbãa ɔtɛɛ ɔplɛnɔ banɔ kpa dza? 24 Enu asɛ banɔ gbangbã afɛeti balɛ ɔmã gbagbla mɛ xɔ̃ɔ? Ɔbɔlà ɔmã mɛ ɔgbã ɔdɛ tɛɛ gɛ otiboɖi banɔ gbangbã afɛetiɛ gɛ bakpasɛ ɔlɛ mɛɛ soɔ dza? 25 Kitsovɛ fãa nɛ wɔshu sɛtɛ ɔbhɛtɛ kibui ɛlɛ nɛidi-tɛ oyí banɔ gbangbã nɛ̀ banɔ kpaa, tɛ ɔbhɛtɛ banɔ gbangbã nɛ̀ bakpa tenikpo. Kitsovɛ fãa nɛ wɔshu! Kebhuekuluɔ akɔ kesiakpa petee, atɛ babhɛtɛ kibui gbangbã dza?"

26 Apaleteɛ aɖɔ asɛ, "Ɛmɔ banɔ gbangbã afɛeti nɛ Sodom ɔma gbagbla mɛɛ, ɛba shɛnɛ ahɔɛ ɔlɛ petee shu nɛ balɛ kɛtakpu so."

27 Kɛlɛ Abraham ewuli azaɖɔ asɛ, "Otsiɛ gɛ ɛkpité ana pɛ ɛɖɔ kaɖɔ nɛ̀ Apaleteɛ, itinu kɛdɔ nanà pɔ osubhududu nɛ̀ bɔtɔ̃, 28 enu asɛ banɔ gbangbã tɛkakalà ezhyi esi nɛ̀ banɔ teeti odenɔ banɔ afaeti mɛ xɔɔ? Ɔma gbagbla petee nɛ banɔ teetiɛ shu soɔ dza?"

Aɖɔ asɛ, "Ɛmɔ baanɔ afɛtaalɛ nɛ̀ teeti nɛ ɛkɛlɛɛ, ɛtɛ bazĩ ɔlɛ."

29 Ezewuli aɖɔaɖɔ etseɖe yɛasɛ, "Enu asɛ banɔ afɛtaalɛ yete bamɔ nɛ ɛkɛlɛ xɔ̃ɔ?" Aɖɔ asɛ, "Nɛ banɔ afɛtaalɛ kɛtakpu soɔ, ɛtɛ babhɛtɛ ɛlɛ."

30 Kɛlɛ aɖɔ asɛ, "Kɛtɛ baɛlɛmɛ sɛ tɛ Apaleteɛ akpɛ ɔmɔpɔɛ, pɔ kɔ mɛɖɔ kaɖɔ. Enu asɛ banɔ afɛataa yete babamɔ̃ nɛ ɛkɛlɛ xɔ̃ɔ?"

Ebuiliulũ asɛ, "Ɛtɛ babhɛtɛ ɛlɛ gɛ onupɛ ɛmɔ banɔ afɛata nɛ ɛkɛlɛ."

31 Abraham aɖɔ asɛ, "Otsiɛ gɛ ɛkpɛ kité ana pɛ ɛɖɔaɖɔ nɛ̀ Apaleteɛ, enu asɛ banɔ afɛtaabha yete babamɔ̃ nɛ ɛkɛlɛ xɔ̃ɔ?"

Ebuiliulũ asɛ, "Nɛ banɔ afɛtaabha kɛtakpu soɔ, ɛtɛ bazĩ ɔlɛ."

32 Kɛlɛ aɖɔ asɛ, "Kɛtɛ baɛlɛmɛ sɛ tɛ Apaleteɛ akpɛ ɔmɔpɔɛ, pɔ kɔmɛ wuli ɖɔaɖɔ bɔɖɔ tenikpo. Enu asɛ banɔ lɔfɔ yete bamɔ̃ nɛ ɛkɛlɛ xɔ̃ɔ?" Ebuiliulũ asɛ, "Nɛ banɔ lɔfɔ kɛtakpuɔ soɔ, ɛtɛ bazĩ ɔlɛ."

33 Gɛ Apaleteɛ aɖɔ kaɖɔ nɛ̀ Abraham ebekeɛ, ashɛ, kɛlɛ Abraham etsyina avɛ bɔpã mɛ.