1 Ɔgana kidzo ɛlɛ abha babhɛtɛ owusoso nɛ̀ kesiakpa beke nɛ̀ kɛsiaka gɛ kpasɛ balɛmɛɛ.

2 Tɛ kiwui gegenemiɛ ba naa, Owusoso Akaa ɛxɔɛ gɛ áwɔa kibele; kliso emoele nɛ yɛ kanɔmɛbubu kɛxɔɛ wɔawɔa nyɔ̃ɔ ishu. 3 Kɛlɛ Owusoso Akaa eyula tɔɖɔ kiwui gegenemiɛ kɛlɛ adãlɛ kɛlɛ ishu, ɔmɔsɛ kiwui ɛlɛ nabha emoele nɛ yɛ kanɔmɛ tibubu kɛxɔé nyɔ̃ɔ gɛ awɔa ishu.

4 Kitití nɛ̀ kesiakpa gɛ bebu balɛ ebuiɛ naalɛ.

Kibe ɛlɛ gɛ Apalete Owusoso Akaa abhɛtɛ kesiakpa nɛ̀ kititíɛ. 5 gɛ tɛwa nɛ beesi bekeyi nɛ kesiakpa nabhaa, pɛ bɔŋaŋa beyie bekeyi, ɔmɔsɛ Apalete Owusoso Akaa aka sɛsɛ subha nɛ kesiakpa nabha, kɛlɛ anɔdzrame anana ma gɛ aba awa bɔyaa, 6 pɔ adzidza ekoeyi nɛ kesiakpa mɛ pɛ akpɛ bulĩ nɛ kesiakpa tisiɛ mɛ- 7 Apalete Owusoso Akaa abhɔ anɔdzrame edenɔ tisi osubhu nɔ mɛ kɛlɛ afuiã ɛkpã ɔfɔfuĩa nɔ akpɛ yɛ anyɔtɔ̃ mɛ kɛlɛ anɔdzrameɛ ebedzi enunu.

8 Otsi Apalete Owusoso Akaa akpɛ bɔkã nɛ kiwuiɛ otukɔ, nɛ Eɖen; kɛlɛ alɔkɔ anɔdzrameɛ akpɛ ɛkɛlɛ. 9 Apalete Owusoso Akaa akɔ asɛ beesi ediedi bekoeyi nɛ tisie mɛ-beesi gɛ bapɔɔɖi nɛ̀ baagɛ bapɛ̃ kɔ bɔŋaŋa. Nɛ bɔkã yɛ kishitɛbha busi gɛ akɔ ɛkpã, kibuititi, kibui gbãŋgbã nɛ kibuikpa azã.

10 Kelĩ gɛ akpɛ bulĩ nɛ bɔkaã mɛ azakpɛ denɔ Eɖen; denɔ bɔkã mɛ, kelĩɛ aya eku bulĩodi taãlɛ mɛ. 11 Beekulu bulĩodiɛ gɛ eputɔɔ asɛ Pison; akpɛ kana Xavila kesiakpa nabha nyɔ̃ɔ, ɛkɛlɛ sikã ɔɖa dzadzã alɛ. 12 (Sikã ɔɖaa dzadzã gɛ alɛ kesiakpa alɛ nabha pɛ; beesie gɛiyu kɛmatã huhuhuɔ nɛ onis keklagbu tsyɛ alɛ ɛkɛlɛ.) 13 Bulĩodi ɔbhala ɔlɛ kinyie ɔlo nu Gixɔn; lɔ kana Kush kesiakpaa nyɔɔ abha. 14 Bulĩodi ɔtrameɛ ɔlɛ kinyie ɔlo nu Tigris; lɔ kana Asiria nɛ yɛ kiwiɛ otuɔkɔ. Bulĩodi ɔlɛlɛ mɛ ɔlɛ onu Yufratis.

15 Apalete Owusoso Akaa alɔkɔ anyɛ akpɛ Eɖen bɔkaã mɛ tɛ awɔa bɔlɛmɛ. 16 Kɛlɛ Apalete Owusoso Akaa akpɛ ɔsha kɔ anyɛ asɛ, "Obɔla ɔŋã bɔdɔ̃ denɔ busi kanyiaka mɛ nɛ bɔkaã mɛ; 17 pɔɔ tɛŋã bɔdɔ̃ odenɔ busiɛ gɛ akɔ kibuititi nɛ̀ kɛgbaŋgbaŋ nɛ̀ kɛkpa shuɔ mɛ, obotsi gɛ onupɛ ɔŋã bɔdɔ̃ odenɔ busi ɛlɛ mɛ."

18 Apalete Owusoso Akaa aɖɔ asɛ, "Agɛ pɛ sɛ anyɛ yɛ tenikpo azã. Ɛba bhɛtɛ apɛplɛnɔ gɛ aba shɔ̃ akɔɛ."

19 Otsiɛ nɔ Apalete Owusoso Akaa atɛ bhɛtɛ kifutumɛ baagã petee nɛ̀ kɛlɛɛmɛ bɔzhɔɛ nɔ nyɔ̃ɔ odenɔ tisiɛ mɛ. Alɔkɔ balɛ amana anɔdzrameɛ tɛ eɖi kinye nɔnɔ gɛ aba kɔ balɛ; kɛlɛ kinye kanyiaka gɛ akɔ baagã bedzi balɛ kinye. 20 Kliso anyɛ akɔ kinye kepi baagã, kifutumɛ bɔzhɔɛ nɔ nɛ kifutumɛ baagã.

Pɔɔ apɛplɛnɔ kɔ Adam agɛ zã. 21 Kliso, Apalete Owusoso Akaa akɔ anyɛ eku taramɛ; kɛlɛ gɛ adɔ tara, ebu anyɛ yɛ kɛnxɔã tenikpo kɛlɛ alɔkɔ kɛdza dã ɛkɛlɛ. 22 Kidegba Apalete Owuŋsoso Akaa abhɛtɛ adzɛ odenɔ kɛnxɔã gɛ ebu odenɔ anyɛɛ mɛ, kɛlɛ alɔkɔɛ amana anyɛ.

23 Anyɛ aɖɔ asɛ,

"Kɛnxɔã odenɔ mɛ kɛnxɔã mɛ

nɛ kɛdzya odenɔ mɛ kɛdzya mɛ otsi alɛ;

bebekului asɛ 'adzɛ,'

ɔmɔsɛ bebui odenɔ anyɛ mɛ."

24 Kliso anyɛ abashɛ̃ nɛ yɛakaa nɛ yɛelĩ ɔkɔ tɛ abhɛtɛ tenikpo nɛ yɛ edzini, tɛ babhɛtɛ ishudza tenikpo.

25 Anyɛ nɛ adzɛ bazã kɛdɔ makpɛmakpɛ, kɛlɛ kiŋui gi yi balɛ.