1 Otsinɔ, Apaleteɛ ebhui Sara ebu asɛ gɛ atɛɖɔ afala ana, kɛlɛ Apaleteɛ abhɛtɛ kɛgɛ atɔɖɔ elu akɔ Sara. 2 Sara emunù ɛya, kɛlɛ amɔ́ eyianyɛ akɔ Abraham, nɛ yɛ tishesheɛ mɛ, nɛ kibeɛ mɛ gɛ Owusoso Akaa atɔɖɔ elu akɔɛ. 3 Abraham akɔ eyianyɛ gɛ Sara amɔ́ akɔɛ nɛinye asɛ Isak. 4 Kibeɛ gɛ yɛeyianyɛ Isak aŋã ewui tasɛɛ, Abraham ebhui bɔnyɛnyɛ akɔɛ asɛ gɛ Owusoso Akaa etseɖe yɛasɛ abhɛtɛ. 5 Abraham atɛŋã agɔ kɛkpã zɛzɛ nɛ kibeɛ mɛ gɛ bamɔ yɛeyianyɛ Isak akɔɛ.

6 Sara aɖɔ asɛ, "Owusoso Akaa akɔ mɛmɔɛ kɛmɔɛ, kɛlɛ anɔnyianɔ gɛ elũ kibui ɛlɛ tsyɛ abamɔɛ aplɛnɔ mɛ." 7 Kɛlɛ azaɖɔ aplɛnɔ asɛ, "Afana gɛ atɛɖɔ etseɖe Abraham eɖi asɛ kiwui tili Sara abakɔ eyi kɛmɔ dza? Pɔ ɛmɔ́ eyianyɛ akɔɛ nɛ yɛ tisheshe ɛlɛ mɛ."

8 Eyiɛ ebeshè kɛlɛ bebhuì kɛmɔ̃ akɔɛ, kɛlɛ nɛ kiwui ɛlɛ nabha gɛ bebhui kɛmɔ akɔ Isak ebekeɛ, Abraham atɔɖɔ ketsukpu pɛ ekulu banɔ̃. 9 Pɔ Sara amɔ̃asɛ eyianyɛ gɛ Haga gɛedzi Egipte dziɛ amɔ̃ akɔ Abraham soɔ azamɔɛ yɛ, 10 kɛlɛ etseɖe Abraham asɛ, "Shɛnɛ̀ ahɔɛ nɛ adzɛ dzidzì alɛ́ nɛ̀ yɛeyianyɛ shu, ɔmɔsɛ adzɛ dzidzì alɛ́ yɛeyianyɛ atɛ bamɔ̃ ɔŋãkɔ ɔplɛnɔ mɛeyianyɛ Isak odenɔ kaŋãsi alɛ mɛ."

11 Kibui ɛlɛ batɔɖɔ Abraham abha fala kifu ɔmɔsɛ kibuiɛ kpà ɔplɛnɔ yɛeyianyɛ. 12 Pɔ Owusoso Akaa etseɖe yɛasɛ, "Tɛkɔ kɛnana tɔɖɔ wɔabha nɛ anyɛnuvɔɛ nɔ nɛ̀ wɔadzɛ axɔɛdɛ shu. Lũ kibui nɔnɔ gɛ Sara etseɖe wɔ, ɔmɔsɛ ganà Isak abha babà kalà wɔeyì mɔmɔ̃ alɛ. 13 Ɛbakɔ adzɛ dzidziɛ yɛeyianyɛ tsyɛ edzì kɛmadi, ɔmɔsɛ wɔeyi mɔmɔ yɛenu."

14 Kelizaza kalɛ kɛvɔlɔ plii nɔ, Abraham alɔkɔ bɔŋaŋã tuli nɛ̀ agãpi kipulì gɛ bulĩ kpasɛ ɛlɛ mɛ pɛ alɔkɔ ɔlɛ akɔ Haga. Alɔkɔ bɔdɔ̃ atɔɖɔ yɛ iwũdɔ kɛlɛ akpɛ yɛ nɛ̀ anyɛnuvɔɛ nɔ kidzo. Atɔnɔ̃ yɛidzoɔ kɛlɛ adaa kanà nɛ Biɛshɛba oxui kesiakpa mɛ.

15 Gɛ buliɛ̃ nɛ agãpi kipuli nɔ mɛ beleɛ, alɔkɔ anyɛ nuvɔɛ nɔ elu kɛvɔkɔ̀ tinikpo nɔ tili esi. 16 Kɛlɛ avɛ adɛzã kɛwɔã nɛ okɔ toli, asɛ bɔnyɔ̃ tɛtatà tidzedze mɛ ana, ɔmɔsɛ abhɛtɛ ekpoɖekpoɖe mɛasɛ, "Ɛtɛ balà ɖi anuvɔ pɛ ebetsí." Kɛlɛ adɛzã kɛwɔã, kɛlɛ akpà yoyo bi.

17 Owusoso Akaa elũ gɛ anyɛnuvɔɛ nɔ eebieyo, kɛlɛ Owusoso Akaa yɛaxɔɛdɛ ekulu Haga odenɔ kititíɛ pɛ ebisi yɛasɛ, "Haga, kibui ɖuwoelu gɛba? Tɛosi kifù, Owusoso Akaa elũ gɛ anyɛnuvɔɛ nɔ eebieyo nɛ kibeɛ gɛ awɔsɔ̃ ɛkɛlɛ. 18 Feke anyɛnuvɔɛ nɔ wunɔ kabhà nɛ̀ yɛhɔɛɛ, ɔmɔsɛ ɛbakɔ̀ yɛedzì kɛmadi gbagbla."

19 Kɛlɛɛ, Owusoso Akaa adãlɛ yɛaŋuhũɔ pɛ amɔ̃ ozĩ toli gɛ bulĩ ɔkpasɛ ɔlɛ mɛ. Kliso avɛ edi shi bulĩɛ akpɛ agãpi kipuli nɔ mɛ kiyukù pɛ akɔ anyɛnuvɔ̃ɛ nɔ bulĩɛ pɛ awɔɛ.

20 Owusoso Akaa azãplɛnɔ anyɛnuvɔɛ nɔ nɛ kibeɛ gɛ eesheɛ. Azã oxui kesiakpa mɛ kɛlɛ ebedzì anɔ gɛ azata bɔnyɔ̃. 21 Nɛ kibeɛ gɛ azã Para oxui kesiakpa mɛɛ, yɛelĩ amɔ adzɛ odenɔ Egipte akɔɛ yɛagbanà.

22 Nɛ kibe mɛɛ, Abimɛlɛk nɛ̀ Fikɔl gɛedzi yɛ keyuta gbagbala anɔlũazazã akɔ yɛ keyuta kɛzaa, betseɖe Abraham asɛ, "Owusoso Akaa alɛ aplɛnɔ wɔ nɛ kɛkanyiaka gɛ ɔbhɛtɛ mɛ." 23 Otsiɛnɔ, tanã bɔdɔ̃ kɔmɛ nɛ ɛkɛlɛ̀ nɛ Owusoso Akaa namɛ sɛ ɔtɛbɔ bhɛtɛ asɛnɛ kibui ɔmanà mɛ pɛnɔsɛ mɛeyialɛ pɛnɔsɛ mɛ kihui nɔkɔ. Bhɛtɛ ɛyamɛ gbangbã ɛlɛ nɛidi ɔkasɛ mɛ nɛ̀ kɛmadiɛ gɛ kɛlɛ mɛ wɔonu efùɔ asɛ gɛ mɛtsyɛ bhɛtɛ kɔwɔ ana."

24 Abraham aɖɔ asɛ, "Ɛtanà ɛlɛ."

25 Kɛlɛ Abraham aɖɔ kibui gɛ tɔɖɔ yɛabha akɔ Abimɛlɛk nɛ bulĩ ozĩ toli gɛ Abimɛlɛk yɛaxɔɛdɛ bedzu ahɔɛ nɛ ɔlɛ abha shu. 26 Pɔ Abimɛlɛk aɖɔ asɛ, "Itinyi anɔnɔ gɛ yɛabhɛtɛ kibui ɛlɛ. Ogitseɖe mɛ, pɔ obuɔ yete mɛilũ kibuiɛ."

27 Kliso Abraham adɛ mana ibhoshi nɛ̀ banɛntsyɔɛ pɛ alɔkɔ akɔ Abimɛlɛk, kɛlɛ banyɛ taabha alɛ abhɛtɛ olugbù nyanyã. 28 Abraham ebú ibhoshi eyiadzɛ tegegene nɛ kɛzaa mɛ, 29 kɛlɛ Abimɛlɛk ebisi Abraham asɛ, "Ibhoshi eyiadzɛ tegegene alɛ gɛ obu olu ɔtɔ pɔ, kɛlɛ esi sɛ ɛlɛ?"

30 Ebuiliulũ asɛ, "Yɛkɛ ibhoshi eyiadzɛ tegegene alɛ odenɔ mɛahɔɛ mɛ asɛ, ɔzã pɛ ɔmɔsɛ mɛibu bulĩ ozĩ ɔlɛ."

31 Kliso bekulu ɛkɛlɛ asɛ Biɛshɛba, ɔmɔsɛ banyɛ taabha atanà bɔdɔ̃ nɛ ɛkɛlɛ.

32 Gɛ babhɛtɛ olugbù nyanyã nɛ Biɛshɛba ebekeɛ, Abimɛlɛk nɛ̀ Fikɔl geɛdzi beyuta anɔluazazã gbagbala betsyina avɛ Filistiane kesiakpa nabha. 33 Abraham edzu busi nɛ Biɛshɛba, ɛkɛlɛ yɛekulu Apaleteɛ nɛinyeɛ, Owusoso akaa gɛ alɛ nɛkpã tihɔɔ nɔ. 34 Kɛlɛ Abraham azã Filistiane kesiakpa nabha kibè dzololo.