1 Kliso Isak eklu Yakɔb pɛ eyulà akɔɛ kɛlɛ akɔ yɛ ɔsha asɛ: "Tɛ gbanà Kanadzì. 2 Vɛ Paɖan Aram odunũ ɔlɛ́, vɛ wɔelũdzua Betuɛl bɔpãmɛ. Gbanà adzɛ kɔ wɔshu nɛ ɛkɛlɛ, odenɔ Laban gɛenu wɔelũdzua yɛ beyiadzɛ nɛishi. 3 Tɛ Owusoso Akaa Ohumielete eyulà akɔ wɔ tɛ akɔ wɔmɔ́ beeyi ɔvɛnɔ ɔsɛ balɛ tɛkakalà mɛ dzi ɔmã. 4 Tɛ akɔ wɔ nɛ̀ wɔeshui alɛ tiyuyulà gɛ akɔ Abraham, sɛ tɛ kesiakpa alɛ abha gɛ nɔotsiɖi otsiɛ asɛ befùɔ kedzì wɔnɔ ayɛ, kesiakpa gɛ Owusoso Akaa akɔ Abraham." 5 Kɛlɛ mɛ Isak akpɛ Yakɔb kidzo, kɛlɛ avɛ Paɖan Aram, nɛ Laban gɛenu Betuɛl yɛeyianyɛ gɛede Aɖamea, pɛenu Rebeka gɛenu Yakɔb nɛ̀ Esawuɔ balɛ elũdzua ɔkɔ.

6 Otsiɛ nɔ Esawu etì asɛ Isak eyulà akɔ Yakɔb kɛlɛ asɛsɛ yɛ nɛ Paɖan Aram tɛ adɛ gbanà adzɛ nɛ ɛkɛlɛ, kɛlɛ gɛ eyulà akɔɛ ebekeɛ, akɔ yɛ ɔsha asɛ, "Tɛ gbanà Kanadzì," 7 kɛlɛ Yakɔb elũatɔ̃ akɔ yɛaka nɛ̀ yɛelĩ pɛ avɛ Paɖan Aram. 8 Kliso Esawu abamɔ kana gɛ Kanadzɛ kibui gɛzã yɛaka Isak uli; 9 kliso avɛ Ismael ɔkɔ pɛ agbanà Mahalat, gɛenu Nebaiot yɛada pɛenù Ishmael gɛenu Abraham yɛeyianyɛ yɛeyiadzɛ pɛ alɔkɔ aplɛnɔ yɛedziniɛ gɛalɛ yɛahɔɛ.

10 Yakɔb ashɛ nɛ Biɛsheba kɛlɛ atɔnɔ kidzo avɛ Xaran. 11 Gɛ eku ɔkɔtoliɛ, aza ɛkɛlɛ elishi alɛ ɔmɔsɛ kiwuiɛ tɛdɔ̀. Gɛ alɔkɔ kɛklagbu tili nɛ ɛkɛlɛ, alɔkɔ ɛlɛ eseɖe, kɛlɛ awɔsɔ̃ kesi pɛ eku taɖa mɛ. 12 Aza bɔlalà teli gɛ amɔ antyurɛ gɛ etsiɖi kesiakpa nabha pɛ eli ewu kititíɛ, kɛlɛ Owusoso Akaa yɛaxɔɛdɛ ezewu pɛ bezezhyi nɛ yɛabha. 13 Apaleteɛ alɔɛtiti nɛ yɛadamɛ ɔkɔ ibeɛ pɛ aɖɔ asɛ: "Mɛinu Apaleteɛ, wɔaka Abraham nɛ̀ Isak balɛ Owusoso Akaa. Ɛba lɔkɔ kesiakpa gɛ kalɛ abha wɔ ɔwɔsɔ̃ akɔ wɔ nɛ̀ wɔeshui alɛ. 14 Wɔ eshui alɛ ebekpè asɛ kesiakpa abha osubhududu ana, kɛlɛ ɔbɔ nɛɛ ɔvɛ kiwuiɛ ɔdɔkɔ, kɛlɛ otukɔ, ɔvɛnɔ kesiakpa adamɛ ɔkɔ nɛ̀ kalɛ kesi ɔkɔɔ. Bebe yulà akɔ banɔnɔ petee nɛ kesiakpa nabha ɔganà wɔ nɛ̀ wɔ bɔmɔ̃ɔ nabha. 15 Ɛlɛ ɔplɛnɔ wɔ kɛlɛ mɛanhũ abazã wɔabha nɛ ɔkɔnyiakɔ gɛ ɔvɛɛ, kɛlɛ ɛbadzinì wɔ manà kesiakpa alɛ abha. Ɛtɛbà shɛnɛ ahɔɛ nɛ wɔshu ɔdɛkpɛnɔ ɔsɛ gɛ ɛbhɛtɛ kɛgɛ ɛɖɔlu sɛ ɛba bhɛtɛ kɔ wɔ beke."

16 Kibeɛ mɛ gɛ Yakɔb anyɛmɛ odenɔ yɛ taɖa dɔdɔ mɛɛ, abhɛtɛ yɛ asɛ "Kɛgbã Apaleteɛ alɛ ɛkɛlɛ pɛ itinyi." 17 Kifù yii kɛlɛ aɖɔ asɛ, "Ɛkɛlɛ oku ifù! Ɛkɛlɛ̀ otinu ɔkɔ nanà ɔdɛ Owusoso Akaa yɛɔpãmɛ; ɛkɛlɛ ɔlɛ onu kitití kedulũɔ."

18 Kelizaza nɛvɔlɔ plii nɔ, Yakɔb alɔkɔ kɛklagbuɔ gɛ eseɖeɛ edzu kititi asɛ kɛklagbu osi pɛ abalɛ bɔbɔ atɔɖɔ kɛlɛ adamɛ. 19 Akɔ ɛkɛlɛ kinye asɛ Bɛtɛl, gɛ beze kulu ɔmã ɔlɛ asɛ Luz flogo.

20 Kɛlɛ Yakɔb aɖɔ kibui elu pɛ aɖɔ asɛ, "Onupɛ Owusoso Akaa abazã aplɛnɔ mɛ pɛ yɛanhũ abazã mɛabha nɛ mɛ kidzo ɛlɛ gɛ ɛgã mɛ pɛ abakɔ mɛ kɛŋaŋã mɛŋã nɛ̀ akpɛkpɛ mɛkpɛɛ, 21 sɛ tɛ itsyina avɛ mɛaka bɔpãa mɛ̀ nɛ ishuyɔyɔ mɛɛ, kɛlɛ Apaleteɛ ebedzì mɛ Owusoso Akaa 22 kɛlɛ kɛklagbu ɛlɛ gɛ idzu kititíɛ asɛ kɛklagbu osiɛ badzì Owusoso Akaa bɔpãmɛ, kɛlɛ nɛ bɔdɔ̃ gɛ ɔkɔ mɛ petee mɛɛ, ɛbadzinì bɔlɛ edi lɔfɔ mɛ kɔ wɔ."