1 Otsiɛ nɔ eblidza edzi anɔwɔe adɛ kifutumɛ baagaã petee gɛ Apalete Owusoso Akaa abhɛtɛ. Ebisi adzɛ asɛ, "Kɛgbã bɔɖɔ Owusoso Akaa aɖɔ asɛ, 'Nɔtɛ ŋã bɔdɔ odenɔ busi kanyiaka abha nɛ bɔkaã mɛ dza'?''

2 Adzɛ etseɖe eblidza asɛ, "Bɔbala ŋã busi eyuyu denɔ beesiɛ mɛ nɛ bɔkaã mɛ, 3 pɔɔ Owusoso Akaa aɖɔ asɛ, 'Nɔtɛ ŋã busi eyuyu odenɔ busiɛ gɛedzi bɔkaã kishitɛbha mɛ, kɛlɛ noti hunu ɔlɛ, onu ginɛ kanaa nobo tsi.' "

4 Eblidza etseɖe adzɛ asɛ, "Noti botsi." 5 "Ɔmɔsɛ Owusoso Akaa enyi asɛ nɔŋã bɔdɔ̃ denɔ busi nabhaa, wɔnɔ anhũ abakpa asɛ Owusoso Akaa ana, gɛ noboti kɛgbaŋgbaŋ nɛ kɛkpa shu."

6 Gɛ adzɛ amɔ asɛ busi eyuyuɔ apɛ kɔ tɛŋãŋã kɛlɛ apɔɔ ɖiɛ, pɛ apɛ̃ kɔ bubuti mɔmɔ tsyɛ, apɔ̃ teli pɛ aŋãɛ. Akɔ yɛnyineɛ gɛ alɛ yɛɔbha tsyɛ teli pɛ aŋãɛ 7 Kɛlɛ balɛ taabha anhũɔ bakpa, kɛlɛ beti asɛ balɛ kɛdɔ makpɛmakpɛ; kliso bakamɛ awulakpa plɛnɔ baagɔlɔ kɛlɛ babhɛtɛ akpɛkpɛ kɔ balɛ kishu.

8 Kɛlɛ kidemɛ anyɛ nɛ̀ yɛedzini belũ Apalete Owusoso Akaa yɛɔdɔ̃ gɛ agã nɛ bɔkaã mɛ nɛ owlagoɔ mɛ, kɛlɛ bedi kpũ kɔ Apalete Owusoso Akaa nɛ beesie gɛ balɛ bɔkaã mɛ. 9 Pɔɔ Apalete Owusoso Akaa ekulu ebisi anyɛ sɛ, "Wɔɔ xɔ̃?"

10 Adɛmɛ asɛ, "Ilũ wɔdɔ̃ nɛ bɔkaã mɛ, kɛlɛ kifu dɛmɛ ɔmɔsɛ ɛlɛ kɛdɔ makpɛmakpɛ; kliso idi kpũ."

11 Kɛlɛ Owusoso Akaa ebisi asɛ, "Afa gɛ etseɖe wɔ asɛ ɔlɛ kɛdɔ makpɛmakpɛ dza? Ɔŋã bɔdɔ̃ denɔ busiɛ gɛ ɛkpɛ ɔsha kɔwɔ sɛ ɔtɛŋaã mɛ dza?"

12 Anyɛ ebuilɛulũ asɛ, "Adzɛɛ gɛ ɔlɔkɔ kpɛ ɛkɛlɛ plɛnɔ mɛ-yɛakɔ mɛ busi eyuyu denɔ busie mɛ, kɛlɛ mɛŋãɛ."

13 Kliso Apalete Owusoso Akaa ebisi adzɛɛ asɛ, "Keɖe nɛ alɛ gɛ ɔbhɛtɛ?"

Adzɛɛ ebuilɛulũ asɛ, "Eblidzya yɛ awɛɛ mɛ, pɛ ɛŋã."

14 Kliso Apalete Owusoso Akaa etseɖe eblidzaa asɛ, "Gɛ ɔbhɛtɛ kanaana kibui ɛlɛ soɔ,

"Kibuiɖɔkpɛanɔ gɛ abadɛ kepi baagãã

nɛ̀ kifutumɛ baagãã nyɔɔ ayɛ abazã wɔ abha!

Obotsì nɛ wɔ kevũ naabha

kɛlɛ ɔbɔŋã osubhududu nɛ wɔ ɛkpã mɛ.

15 Kɛlɛ ɛbalɔkɔ anɔ tɛnyanyana

kpɛ ɛyamɛ kpɛ wɔ nɛ̀ adzɛ nɛishi,

kɛlɛ kpɛ wɔ kihwui nɔ nɛ yɛayɛ mɛ;

aba yɛɛ wɔ kɛtakpu,

kɛlɛ wɔtsyɛ obo nemì yɛ katsrɛkpɔ niede."

16 Otsi yɛaɖɔ etseɖe adzɛɛ tsyɛ asɛ,

"ebakɔ wɔ eyamumunɔ ishumɛ tɛtatãnɔ ekpe tɔɖɔ;

ishumɛ tɛtatãnɔ kɛtɛkɛtɛ mɛ wɔbɔzã pɛ ɔbɔmɔ beeyi.

Wɔ ishumɛ tɛpɛpɛnɔ abazã wɔ enyini abha,

kɛlɛ abaŋã wɔ abha."

17 Otsi etseɖe Aɖam tsyɛ asɛ, "Gɛ olũ kɛgɛ wɔ edzini aɖɔ pɛ ɔdɛŋã bɔdɔ̃ denɔ busiɛ gɛ ɛkpɛ ɔsha kɔ wɔnɔ sɛ, 'Nɔtɛ ŋã bɔdɔ̃ denɔ yɛabhaa,'

"Baɖɔ kibui akpɛ kesiakpa nɛ wɔ kɛtakpu;

odenɔ bɔtɔ kɛtɛkɛtɛ mɛ flogo pɛ ɔbɔŋã bɔdɔ̃ odenɔ kalɛ mɛ

nɛ wɔ ekpã ewiɛ mɛ nyɔɔ.

18 Kesiakpa ebe bu ewu tɛwa kɔ wɔ,

kɛlɛ ɔbɔŋã ayakpamɛ tɛwa.

19 Nɛ wɔ ketu buhehetata mɛ

ɔbɔŋã wɔdɔ̃

odenɔ gɛ otsyina ɔvɛ tisiɛ mɛ,

ɔmɔsɛ tisi mɛ bebu wɔ;

kliso osubhududu wɔ onu

kɛlɛ osubhududu wɔ obotsyina odzi."

20 Adam akɔ yɛedzini kinye asɛ Eva, ɔmɔsɛ ebedzi elĩ akɔ banɔdzrame galɛ nɛ ɛkpã nyɔɔ.

21 Apalete Owusoso Akaa abhɛtɛ bagaã bupi akpɛkpɛ akɔ Adam nɛ yɛedzini kɛlɛ alɔkɔ akpɛ akɔ alɛ. 22 Kɛlɛ Apalete Owusoso Akaa aɖɔ asɛ, "Otsialɛ anyɛ edzi bɔlɔmɛ ayɛ tenikpo, gɛ enyi kegbaŋgbaŋ nɛ̀ kɛkpa. Kɛma sɛ bakɔ yɛidzo tɛ akpɛ ahɔɛ nɛ ɛkpã busie mɛ tɛ alɔkɔ bɔdɔ̃ aŋã, tɛ abazã nɛ ɛkpã tihɔɔ." 23 Kliso Apalete Owusoso Akaa akaka yeɛbu nɛ Eden bɔkaã mɛ tɛ adɛwa kesiakpa mɛ gɛ bebu yɛ denɔ. 24 Gɛ akaka anyɛ ebu bekeɛ, alɔkɔ kerubim agã bedzu bɔkaã bɔlɛ kiwuie otuɔkɔ kɛlɛ akɔ bhɛtɛ ilũgbu tɛbha gɛibu kifuɔ azã epo kidzoɔ gɛ ɔvɛ ɛkpã busieɛ ɔkɔ.