Gênesis 37

Yosɛf yɛ Balaláa

1 Yakɔb azã kesiakpa gɛ kalɛ abha yɛaka azã nɛ Kana.

2 Yakɔb yɛishu ebuiɛ naalɛ.

Yosef ayisɔ̃ gɛ aŋã agɔ lɔfɔ nɛ̀ tegegene, ezeɖi baagã nabha ɔplɛnɔ yɛadzalɛ, Bilxa yɛeyianyɛ nɛ̀ Zilpa yɛeyianyɛ, yɛakaa edzinalɛ, gɛ alɔkɔ balɛishu ibui gɛinu kibui kpa amanà balɛ akaa.

3 Otsi nɔ Israɛl adɛmɛ Yosɛf kibui ɔdɛ yɛadzya gɔgɔɛ alɛ, ɔmɔsɛ yɛ bamɔ akɔɛ nɛ yɛ tishesheɛ mɛ; kɛlɛ abhɛtɛ akpɛkpɛ gɛ sikã bɔdɔ̃ zã yɛishu gelee akɔɛ. 4 Gɛ yɛadzalɛ amɔ̃ asɛ balɛ akaa adɛmɛ yɛibui adɛ akanyiaka nɛ balɛishiɛ, batɔɖɔ yɛelu kɛlɛ bazatɛ kanyã ɔkpɛ yɛɔkɔ.

5 Yosɛf aza bɔlala, kɛlɛ gɛ aɖɔ bɔlalaa etseɖe yɛadza alɛɛ, baza anyanã yɛakpɛ ɛyamɛ adɛ. 6 Etseɖe alɛ asɛ, "Nɔtaatɔ tɛ nɔolũ bɔlala lɛ gɛ ɛzaa. 7 Budzìbu agɔ̃lɛ nɛ bayaa mɛ pɛ bɔɔnyã alɛ asɛ agɔlɛsà, kɛlɛ odunũ nɔ mɛ agɔlɛsà ɔlɔ ɔzã kitití, kɛlɛ wɔnɔ agɔlɛsà shogo nɛ mɛ ɔyɛ shu kɛlɛ lɛizhi ekumũ ɔkɔ ɔlɛ."

8 Yɛadzalɛ etseɖe yɛasɛ, "Bɔpɛ wɔpɛ ɔsɛ tɛ ɔŋã bukusi nɛ bɔlɔ abha dza? Ɔbɔŋã bɔlɔ abha kɛgbã dza?" Kɛlɛ baza nyanã yɛakpɛ ɛyamɛ adɛ nɛ yɛ bɔlalá nɛ̀ kɛgɛ aɖɔɔ shu.

9 Kɛlɛ azaza bɔlalà bhlatɔ, kɛlɛ aɖɔ ɔlɛ etseɖe yɛadza alɛ. Aɖɔ asɛ, "Nɔtaatɔ tɛ nɔolũ, iwuli za bɔlalà bhlatɔ kɛlɛ nɛ kibe ɛlɛ mɛ xɔnɔ̃ ɛmɔ̃ kiwuiɛ́ nɛ̀ woele nɔ nɛ̀ awɔɛ lɔfɔ nɛ̀ tooli gɛ lezezhyi ekumũ akɔ mɛ."

10 Gɛ etseɖe yɛaka nɛ̀ yɛadzalɛ kibui ɛlɛɛ, yɛaka etseɖe nii pɛ aɖɔ asɛ, "Bɔlalà ɖuwoelu nɔɔlɛ pɔ wɔza? Pɔ wɔelĩ nɛ̀ mɛ nɛ̀ wɔadza alɛ ezhyi ekumũ akɔwɔ dza?" 11 Yɛadza alɛ azakpɛ yɛawɔ̃, pɔ yɛakaa xɔnɔ evũ kibuiɛ akpɛ yɛtakpu mɛ.

Yosɛf Yɛadzalɛ Adɛ yɛ

12 Otsinɔ yɛadzyalɛ agbana balɛ akaa baagã avɛnɔ bɔdɔ̃ ɔŋãkɔ nɛ Shikɛm ɔbhà, 13 kɛlɛ Israɛl etseɖe Yosɛf asɛ, "Asɛ kanà gɛ onyiɛ, wɔadzalɛ agbanà baagã avɛnɔ bɔdɔ̃ ɔŋãkɔ nɛ Sekɛm ɔbhà. Ba, ɛbakpɛ wɔ kɛxɔɛ nɛ balɛ ɔkɔ."

Ebuiliulũ asɛ, "Yoo ilũ."

14 Kliso etseɖe yɛasɛ, "Vɛ tɛ odi lu awɔ̃ oɖi ɔsɛ kɛkanyiaka vɛ kɛlɛ abha piapii nɛ̀ wɔadzalɛ nɛ̀ baagã nɛishi dza, tɛ obotseɖe mɛ." Kɛlɛ akpɛ yɛidzo odenɔ Hebrɔn kadadasiɛ.

Kibeɛ gɛ Yosɛf ediku Shikɛmuɔ, 15 anyɛ teli gɛ amɔ̃ yɛ gɛ anyɔ̃ akanà nɛ bayaa mɛ ebisi yɛasɛ, "Kiɖe wɔpɛɛ?"

16 Ebuiliulũ asɛ, "Ɛpɛɛ mɛadzalɛ. Ɔbɔlà kasɛ mɛ ɛkɛlɛ gɛ bakɔ balɛ bagãa nɔŋaŋãa dza?"

17 Anyɛ ebuiliulũ akɔɛ asɛ, "Batɛ shɛ nɛ ɛkɛlɛ̀. Ilũ gɛ baɖɔ asɛ 'Nɔkɔ tɛ bɔvɛ Dotan.' "

Kliso Yosɛf atɔnɔ̃ yɛadzalɛ niede kɛlɛ adɛ mɔ alɛ nɛ Dotan ɔbhà. 18 Pɔ batɛ mɔ yɛasɛsɛ nɛ odzololokɔ, kliso flogo tɛ ebeku balɛ ɔbhàa, batɛ nyã ɛlɛ asɛ bebeyii.

19 Baɖɔ etseɖe bagɔlɔ asɛ, "Bɔlalàzaza eleteɛ yɛaba alɛ mɔ̃! 20 Nɔbà tsiɔ̃ tɛ buyii tɛ bɔlɔkɔ yɛ tɛɔkpɛ ozĩ ɔlɛ mɛ tɛ bɔɖɔ ɔsɛ agãhohoe teli yɛevũ yɛatã. Kɛlɛ́ɛ bɔbà ɖi kɛgɛ bade koeyi nɛ yɛ balalà mɛ."

21 Gɛ Rubɛn elũ kibui ɛlɛ, apɛ asɛ tɛ ayɛkɛ yɛ odenɔ yɛadza alɛ ahɔɛ mɛ. Aɖɔ asɛ, Nɔtɛ kɔ bubú yɛkpã oyinɔ. 22 Nɔtɛ balɛ dzyosu nanà esi. Nɔtɛɛ yɛɔkpɛ ozĩɛ mɛ nɛ ɛkɛlɛ nɛ oxuiɛ mɛ, pɔ nɔtɛkɔ ɔsɛ wɔnɔ ɔhɔɛ lɔpà nɛ yɛishu." Rubɛn aɖɔ kibui ɛlɛ asɛ tɛ ebù yɛ odenɔ balɛ ahɔɛ mɛ tɛ edzinì yɛavɛnɔ yɛakaa.

23 Kliso gɛ Yosɛf eku yɛadzalɛ ɔbhàa, batsyɔ̃ɛ akpɛkpɛ nɛ yɛishu, akpɛkpɛ gɛ bakpɛ sikã bɔdɔ̃ nɛishu pɛ azakpɛɛ- 24 kɛlɛ bagbanà yɛadɛ tsɛkpɛ ɔzĩɛ mɛ. Otsinɔ kɛdɔ̃ nanà gɛzã ɔzĩɛ mɛ; bulĩ nanà gɛzã ɔlɛ mɛ.

25 Gɛ bezhyi azã kesi asɛ tɛ baŋã bɔdɔ̃ɔ, bebu bamɛ wunɔ kabha kɛlɛ bamɔ̃ beedzigãelete kɛza tili gɛinu Ishmael yɛeshui alɛ gɛede Gilaɖ pɛ baaba. Bakpɛ ɔsà, kivee, babɔ gɛalɔ̃ huhuuhu nɛ̀ aɖuɖo etuku atɔɖɔ balɛ kipuasɔ nɔ abha, pɛ balɔkɔ avɛnɔ Egipte.

26 Yuɖa etseɖe yɛadzalɛ asɛ, "Kiɖe bɔbà mɔ nɛ kɛlɛ mɛ gɛ onupɛ buyí bɔlɔ adza, pɛ bɔlɔkɔ bɔdɔ̃ dã yɛ dzyosu abha? 27 Nɔba, nɔkɔ bɔdɛ yɛ ɔkɔ Ishmael yɛeshui alɛ tɛ bɔlɔ ahɔɛ ɔtɛ bapá nɛ yɛishu; nɛidzo kanyiaka abha tsyɛɛ, bɔlɔ adzya yɛenu, bɔlɔ ahɔɛ ishudza nɛ̀ dzyosu." Yɛadzalɛ adɛmɛ atɔɖɔ kɛlɛ abhà.

28 Kliso gɛ Miɖianɛ edzigãeleteɛ ebeku ɛkɛlɛɛ, Yosɛf yɛadzalɛ edibui oyinɔ nɛ ɔzĩɛ mɛ kɛlɛ badɛ yɛkɛ sikãfufù ehoeyi afɛtaabha akɔ Ishmael yɛeshui alɛ, gɛ balɔkɔ yɛavɛnɔ Egipte.

29 Gɛ Rubɛn etsodzi avɛ ɔzĩɛ shu pɛ amɔ̃ asɛ Yosɛf amã ɔlɛ mɛɛ, atsyɔ̃ɛ yɛakpɛkpɛ mɛ. 30 Etsyina avɛ yɛadzalɛ ɔbhà kɛlɛ aɖɔ asɛ, "Anyɛnuvɔɛ nɔ abhamã ɛkɛlɛ́! Kiɖe mɛbà bhɛtɛ otsiɛ?"

31 Kɛlɛ balɔkɔ Yosɛf yɛakpɛkpɛ, bebhui epigya teli kɛlɛ batsɛ yɛakpɛkpɛ nɔ akpɛ dzyosu nɔ mɛ. 32 Balɔkɔ akpɛkpɛ gɛ sikãdɔ̃ zã yɛishuɔ edzinɔ avɛnɔ balɛ akaa kɛlɛ betseɖe yɛasɛ, "Bɔdɛ mɔ kɛdɔ̃ ɛlɛ. Lu awɔ̃ oɖi yɛ sɛ gɛnɛ wɔeyianyɛ akpɛkpɛ dza."

33 Amɔ̃ asɛ yɛdɔ nyinyi kɛlɛ aɖɔ asɛ, "Mɛeyianyɛ akpɛkpɛ yɛenu! Agãhoe teli evũ yɛatã. Batsã Yosɛf mɛ wuliwuli kɛgbã."

34 Kɛlɛ Yakɔb atsyɔ̃ɛ yɛahɔɛ akpɛkpɛ mɛ, adɛ lɔkɔ kɛpɔtɛ tutũ adã kɛlɛ awɔã ɔwɔnyɔ̃nɔ̃ akɔ yɛeyianyɛ ewui gelee. 35 Yɛeyianyɛ nɛ̀ beyiadzɛɛ petee abayɔ yɛishu mɛ, pɔ agɛ dɛmɛ asɛ bayɔ yɛishu mɛ tsyɛ. Aɖɔ asɛ, "Oho, nɛ mɛ ɔwɔnyɔ̃nɔ ɛlɛ mɛɛ, mɛtsyɛ bavɛ odzeɖeɛ mɛ ɔplɛnɔ mɛeyianyɛ." Kliso yɛakaa ebieyo akɔɛ.

36 Pɔ nɛ kibe ɛlɛ mɛ, Miɖianɛ tsyɛ atɛdɛ Yosɛf nɛ Egipte akɔ Potifa, Farao yɛ keyuta anɔ̃, agɛ yɛalɛ otugbà akɔ bagɛ eepo yɛɔpã nulũ azazã.