1 Gɛ agɔ taabha bafalaa, Faɖawo aza bɔlalá: Alɔɛtiti nɛ Nail kelĩɛ ishu, 2 kɛlɛ odenɔ kelĩɛ mɛ banɛntsyɔɛ tegegene bekoeyi, balɛ ishupiɛ apɛ̃ kɛlɛ beluubɔ́, kɛlɛ bazatã bɔdɔ̃ nɛ bulĩɛ tɛwa ɛmɛ. 3 Kɛlɛ idiɛ, banɛntsyɔɛ tegegene bhlatɔ gɛ begɛiyunɔ kɛlɛ bazhyɔlɛ, bekoe nɛ Nail kelĩɛ mɛ kɛlɛ babalɔ baagɛ balɛ kelĩɛ ishu ɔbha. 4 Kɛlɛ banɛntsyɔɛ nɔ gɛ begiyiunɔɔ bevũ banɛntsyɔɛ tegegeneɛ gɛ balɛ ishupiɛ pɛ̃ pɛ beluubɔ́ atã. Kɛlɛ Faɖawo anyɛmɛ.

5 Aza vɛnɔ taɖamɛ kɛlɛ azaza bɔlala bhala: Nikpè atakpu tegegene, gɛ bakpɛ eyi pɛ bapɛ̃ piapii nɔ, betsiɖi osi tenikpo abha. 6 Nɛ́ balɛ kidiɛ, nikpè atakpu tegegene bhlatɔ beyì ekoeyi-gɛ begi gbogblo kɛlɛ bakpáa odenɔ kɛlɛɛ nɔ gɛide kiwuiɛ otukɔɔ mɛ. 7 Nikpè atakpuɔ gɛ legi gbogbloɔ bamɛnɛ nikpè atakpuɔ tegegeneɛ, gɛ lakpɛ eyi pɛ atakpúɔ leyúkuɔ. Kɛlɛ Faɖawo anyɛmɛ; bɔlalá naalɛ.

8 Yɛ ekpeɖekpeɖeɛ mɛ akpɛ yɛuluhũ nɛ kɛvɔlɔ mɛ, kliso ekulu yɛ bakpukpudziɛ nɛ̀ Egipte bebutinɛ. Faɖawo etseɖe balɛ yɛ balalá, pɔɔ ananà agɛlà bale kesi ebu akɔɛ.

9 Kɛlɛ mɛɛ bunueshishi eleteɛ otugbaanɔ etseɖe Faɖawo asɛ, "Obuɔ, babakamɛ mɛ kesitatá. 10 Faɖawo atɛ akpɛ ɔmɔpɔɛ nɛ yɛ baxɔɛdɛɛ ishu eɖi, kɛlɛ akpɛ mɛ nɛ̀ abolopɔpɔɛ eleteɛ otugbanɔ buvũ nɛ banɔepopoelete otugbanɔ yɛ bɔpã mɛ. 11 Bɔlɔ ɔmayɛmɛ akanyiaka azá bɔlala nɛ elishi tenikpo, kɛlɛ kesi bubu azã kɔ bɔlala kanyiaka. 12 Otsinɔ Hɛbrieyi teli azã ɛkɛlɛ nɛ̀ bɔlɔ, axɔɛdɛ akɔ banɔepopoelete otugbanɔ. Bɔɖɔ bɔlɔ bɔlala tseɖe yɛ, kɛlɛ ebu balɛ esi akɔ bɔlɔ, akɔ anɔ kanyiaka yɛ bɔlalaa kesi bubu. 13 Kɛlɛ ebuiɛ aba alɛ mɛ asɛ kana gɛ ebu balɛ kesi akɔ bɔlɔ: bedzini mɛedzu mɛ ɔzãkɔ, kɛlɛ anɔ bhala xɔnɔ bakpɛ yɛasɔ̃."

14 Kliso Faɖawo akpɛ banɔ nɛ Yosef ede, kɛlɛ bebu yɛ amana tsĩɔ ɔlɛ odenɔ ɔɖa buvũɔ mɛ. Gɛ ashɛ yɛɔtɔ̃mɛɛ pɛ etsyina yɛ bakpɛkpɛ ebekeɛ, aba Faɖawo amɛ.

15 Faɖawo etseɖe Yosɛf asɛ, "Ɛza bɔlala, kɛlɛ ananà agɛ la bɔlɛ kesi ebu. Pɔɔ ilũ baɖɔ nɛ wɔishu asɛ olũ bɔlalaa ɔbɔla bɔlɔ kesi ebu."

16 Yosɛf etseɖe Faɖawo asɛ, "ɛtɛ balà bhɛtɛ, pɔɔ Owusoso Akaa abakɔ Faɖawo kesi bubu asɛ kana gɛ apɛ nɔ."

17 Kɛlɛ Faɖawo etseɖe Yosɛf asɛ, "Nɛ mɛ bɔlala mɛɛ, ɛlɔɛtiti nɛ Nail ogbogboɔ, 18 odenɔ kelĩɛ mɛɛ banɛntsyɔɛ tegegene, gɛ beluubɔ́ pɛ ishupiɛ apɛ̃, kɛlɛ batã bɔdɔ̃ nɛ bulĩ tɛwa mɛ. 19 Balɛ kidiɛ, banɛtsyɔɛ tegegene bhlatɔ ekoeyi-bazã kpɛkpɛlɛɛ kɛlɛ begɛiyu bɔnɔ ɛkamɔ̃ banɛtsyɔɛ gɛ begiyì bɔnɔ nɛ Egipte kesiakpaa alɛ petee abhaa. 20 Banɛtsyɔɛ gɛ bedzi kpɛkpɛlɛɛ, pɛ begɛiyu bɔnɔ batã banɛtsyɔɛ tegegene gɛ beluubɔ́ pɛ bekoeyi akpɛ otugbaa. 21 Pɔɔ gɛ batã balɛ bekeɛ tsyɛ, ananà agɛmɔ asɛ batã kɛdɔ nanà; balɛ bɔnɔmayimayi azã asɛ kana gɛ bazã kpɛ otugbaa. Kɛlɛ ɛnyɛmɛ.

22 "Nɛ mɛ balala mɛɛ ɛmɔ tsyɛ sɛ nikpè atakpu tegegene, gɛ bekoeyi piapii pɛ bapɛ̃, bezeshè nɛ osi tenikpo abha. 23 Nɛ balɛ niedeɛ, atakpu tegegene bhlatɔ epú koeyi-gɛ awalakpa egumũ atɔɖɔ lazhɔlɛ̃ batãpɔɛ nɛ kiwuiotukɔ kɛlɛɛ nɔ ishu. 24 Nikpe atakpu gɛ azhɔlɛ̃ bamɛnɛ atakpuɔ gɛ bapɛ̃ɛ. Ɛɖɔ bɔlɛ tseɖe bakpukpudziɛ, pɔɔ balɛ ɔmayɛmɛ ananà agɛ la bɔlɛ kesi ebu akɔmɛ."

25 Kɛlɛ Yosɛf etseɖe Faɖawo asɛ, "Faɖawo balala benu tenikpo kɛlɛ bashɔ̃. Owusoso Akaa ebu akasɛ Faɖawo kɛgɛ apɛ asɛ tɛ abhɛtɛ. 26 Banɛtsyɔɛ gbangbã tegegeneɛ benu agɔ tegegene, kɛlɛ nikpe gbangbã tegegene benu agɔ tegegene; bɔlaláa enu tenikpo kɛlɛ bashɔ̃. 27 Banɛtsyɔɛ tegegene kpɛkpɛlɛɛ nɔ gɛ begɛiyu bunɔɔ pɛ bekoeyi kidegbaa benu agɔ tegegene, bashɔ̃ nɛ̀ nikpe atakpuɔ gɛ lazhɔlɛ̃ pɛ latãpɔɛ odenɔ kɛlɛ́ɛ nɔ gɛide kiwuiotukɔ: Benu bɔbhɛ dɔdɔ agɔ tegegene.

28 "Edzi asɛ kana gɛ itseɖe Faɖawo: Owusoso Akaa ebu akasɛ Faɖawo kɛgɛ apɛ asɛ tɛ abhɛtɛ. 29 Agɔ tegegene aaba gɛ bɔŋaŋã gelee bazã Egipte kesiakpa petee mɛ, 30 pɔɔ bɔbhɛ dɔdɔ agɔ tegegene aba kpatɔnɔ alɛ. Kɛlɛ babadzɛkɛ bɔŋaŋã gelee ibe nɛ Egipte, kɛlɛ bɔbhɛ dɔdɔ bazĩ kesiakpa falanɔ. 31 Batɛ babaka bɔŋaŋã gelee kibeɛ nɛ kesiakpa nabha, ɔmɔsɛ bɔbhɛ dɔdɔ gɛ bakpà tɔnɔ bɔlɛ aba gagalĩ falanɔ kifu. 32 Kibui nɔnɔ shu sopɛ bakɔ Faɖawo balalaa yɛedi taabha kɛlɛinu ɔsɛ Owusoso Akaa atɔɖɔ ɛlɛ gagãlĩ, kɛlɛ Owusoso Akaa aba bhɛtɛ kɛlɛ odunũ.

33 "Otsinɔ kɔ Faɖawo apɛ anɔ gɛenu etinɛ pɛ bubuti lɛ yɛahɔɛ tɛ alɔkɔ Egipte kesiakpa akpɛ yɛahɔɛ mɛ. 34 Kɔ Faɖawo apɛ bɔdɔ̃abha eɖiɖielete tɛ beɖi kesiakpa nabha tɛ bebu bɔdɔ̃pɔ̃pɔ̃ bɔlɛ teeti mɛ odenɔ Egipteanɛ balɛ bɔdɔ̃pɔpɔ̃ mɛ nɛ agɔ tegegeneɛ gɛ bɔŋaŋã gelee abazãa mɛ. 35 Balɔkɔ bɔŋaŋã nɛ agɔ alɛ mɛ gɛ abaa akpɛ kitsu tɛ babalɛ bɔdɔ̃eyi nɛ Faɖawo yɛ ohumi esi nɛ ɛmã gbagblaa mɛ asɛ bɔŋaŋã. 36 Bà balɛ bɔŋaŋã alɛ elu akɔ kɛmadiɛ petee, tɛ bawɔa bɔlɛ ishu axɔ̃ɛ nɛ agɔ tegegeneɛ gɛ bɔphɛ dɔdɔ bàba Egipte mɛ, tɛ bɔbhɛ dɔdɔ tɛbazĩ kɛmadiɛ."

37 Kibui tɔtɔɖɔ ku Faɖawo nɛ̀ yɛɔzãkɔanɔ petee awɔ̃. 38 Kliso Faɖawo ebisi alɛ asɛ, "Bɔbalá amɔ anɔ asɛ anyɛ alɛ, gɛ Owusoso Akaa ofuafuĩa nɔ ɔkpasɛ yɛ mɛ ana dza?"

39 Kɛlɛ Faɖawo etseɖe Yosɛf asɛ, "Gɛ Owusoso Akaa ebu ebui alɛ nyɔɔ akasɛ wɔɔ, ananà ama gɛenu etinɛ pɛ bubuti lɛ yɛahɔɛ aasɛ wɔ ana. 40 Oboɖi mɛ bukusi bɔpã nabha, kɛlɛ mɛ anɔnyianɔ abakpɛ kɛtakpuesi akɔ wɔ ɛshaa. Bukusi ɔŋãkɔ yete bɔlɛ bakɔ asɛ ɛɖama dɛ wɔ."

41 Kliso Faɖawo etseɖe Yosef asɛ, "Ɛlɔkɔ wɔ dzu Egipte kesiakpa petee kpɛ ulũ." 42 Kɛlɛ Faɖawo ebu yɛ kesikpɛ nɔ odenɔ yɛ kɛwɔɛ nɔ kɛlɛ alɔkɔ akpɛ Yosɛf yɛ kɛwɔɛ nɔ. Akpɛ akpɛkpɛ odenɔ kɛpɔtɛ gbangbã mɛ akɔɛ kɛlɛ alɔkɔ sikã kɔwala akpɛ yɛ oliɛ. 43 Akɔ asɛ bekũ yɛ nɛ ɔɖapa ohuɔ mɛ asɛ ɔmã ekusiɛ yɛ abhala ana, kɛlɛ banyɛɛ bakpɛ ozĩ nɛ yɛ otugba asɛ "Nɔkɔ yɛidzo!" Kliso alɔkɔ yɛedzu Egipte kesiakpa petee akpɛ yɛahɔɛ.

44 Kɛlɛ Faɖawo etseɖe Yosɛf asɛ, "Mɛinu Faɖawo, pɔɔ ɔgɛɖɔ kibuiɛ, ananà atɛba efeke yɛɔhɔɛ pɛnɔsɛ yɛ ɔtsɛɖɛ nɛ Egipte petee." 45 Faɖawo akɔ Yosɛf kinye asɛ Zafɛnaf-Pania kɛlɛ alɔkɔ Asɛnɛnaf gɛenu Pɔtifɛra, akpukpudzi akɔ Oni yɛeyiadzɛ akɔɛ asɛ edzi yɛedzini. Kɛlɛ Yosɛf agã afala nɛ Egipte kesiakpa petee abha.

46 Yosɛf aŋã agɔ afɛata pɛ etsoku Faɖawo Egipte ekusiɛ yɛaxɔɛ mɛ. Kɛlɛ Yosɛf ashɛ nɛ Faɖawo ɔbhà pɛ azagã kidzo fala nɛ Egipte. 47 Nɛ bɔŋaŋã gelee agɔ tegegeneɛ mɛɛ, kesiakpa ebu bɔŋaŋã gbĩ. 48 Yosɛf abalɛ bɔŋaŋã petee gɛ bebu nɛ bɔŋaŋã gelee agɔ tegegeneɛ mɛ nɛ Egipte, kɛlɛ abalɛ ɔlɛ nɛ ɛma gbagblaa mɛ. Nɛ ɔma gbagbla akanyiaka mɛɛ, abalɛ́ bɔŋaŋãa gɛebu nɛ bayàa gɛ bakanà ɔlɛ shu. 49 Yosɛf abalɛ bɔdɔ̃eyi gelee, aasɛ kelĩ shu ayinsɛ; bɔdɔ̃ɔ kpe kliso ayɔlɔ bɔlɛ tɛkakalà mɛ ɔmɔsɛ bukpe ɔfala nɔ ifu.

50 Kpɛ otugba kɔ bɔbhɛ dɔdɔ agɔɔ, Asenɛnaf gɛenu Pɔtifɛra, akpukpudzi akɔ Oni yɛeyiadzɛ amɔ beeyi tabbha akɔɛ. 51 Yosɛf akɔ yɛeyi ekusiɛ nɛinye asɛ Manase kɛlɛ aɖɔ asɛ, "Owusoso Akaa yɛabhɛtɛ sopɛ ɛdzɛkɛ mɛ bɔtɔ petee gɛ ɛmɔ̃ nɛ mɛaka ɔpãa." 52 Akɔ eyi bhala nɛinye asɛ Efraim kɛlɛ aɖɔ asɛ, "Owusoso Akaa yɛabhɛtɛ sopɛ iyu eyuyũ nɛ mɛ bɔtɔ kesiakpaa nabha."

53 Bɔŋaŋã gelee agɔ tegegene nɛ Egipte aba fala, 54 kɛlɛ agɔ tegegene bɔbhɛ dɔdɔ akpɛ kesi, asɛ kana gɛ Yosɛf aɖɔ. Bɔbhɛ dɔ nɛ kesiakpa akanyiaka abha, pɔɔ nɛ Egipte kesiakpa petee abhaa, bɔŋaŋã azã. 55 Gɛ Egipteanɛ nyɔɔ akpà bɔbhɛ dɔdɔ̃ lukũɔ, bebieyo asɛsɛ Faɖawo sɛ akɔ balɛ bɔŋaŋà. Kɛlɛ Faɖawo etseɖe Egipteanɛ petee asɛ, "Nɔvɛ Yosɛf ɔkɔ tɛ nɔbhɛtɛ kɛ gɛ etseɖe wɔnɔ."

56 Gɛ bɔbhɛ dɔdɔ yɛkɛ kɛmadiɛ petee nɔ, Yosɛf adalɛ iwoleɛ nulũ kɛlɛ adɛ bɔdɔ̃eyi akɔ Egipteanɛ, ɔmɔsɛ bɔbhɛ dɔdɔ nulũ gagãlĩ ɔfalanɔ nɛ Egipte petee. 57 Kɛlɛ kɛmadi kanyiaka abá Egipte tɛ bebedzi bɔdɔ̃eyiɛ odenɔ Yosɛf ɔkɔ, ɔmɔsɛ bɔbhɛ dɔdɔ nulũ gagãlĩ nɛ kanɔnɔ mɛ petee.